Ntawv Xwm (Book of Chronicles)

Ntawv Xwm muaj 2 phau; yog Xwm Phau Ib thiab Xwm Phau Ob.
Cov Yus Das pib sau ntawv Xwm ze ntawm peb puas xyoo ua Yes Xus ntej; yog lub caij cov Yus Das yuav tsum tiv cov Xas Mas Lias vim cov Xas Mas Lias xyaw kev teev dab rau kev teev Ntuj. Lub caij ntawd, cov Leej Choj nyob Yes Lus Xas Les kuj faib ua 2 pab sib txeeb ua Leej Choj.
Cov Yus Das cav tias tus sau ntawv Xwm yog “Es Nras’, nws yog ib tug Les Vis ua kab xwm nyob hauv lub Tuam Tsev Teev Ntuj nyob Yes Lus Xas Les; nws thiaj piav ntau yam txog cov hauj lwm nyob hauv lub Tuam Tsev Teev Ntuj.
Chiv thawj tus sau ntawv Xwm tis npe rau nws phau ntawv ua ‘cov xwm tsis nco qab sau tseg’ vim tias nws sau tej xwm rov hais txog cov vaj His Xas Lais tab sis ntau zaus yog tej zaj uas lawv tsis tau xub sau tseg nyob hauv ntawv Xas Muas los ntawv Vaj.
Tus sau ntawv Xwm tau nrhiav cov xwm nyob hauv ntawv Hauv Paus, ntawv Xam Phaj, ntawv Xas Muas, thiab ntawv Vaj. Nws kuj nrhiav cov xwm nyob hauv cov kwv huam piav txog cov vaj His Xas Lais thiab Yus Das tuaj ntawm cov tub tseem hwv nrog cov vaj ua kab xwm lawv tau sau tseg. Nws kuj nrhiav cov xwm nyob hauv tej phau ntawv uas nyem no ploj lawm; zoo li ib phau ntawv piav txog cov vaj uas nws tuaj tsis txog peb, thiab tej phau ntawv me piav txog cov Yaj Saub lawv tej hauj lwm. Thiab nws tseem khaws tej zaj ntawm cov laus uas lawv tau piav rau nws mloog.
Ntawv Xwm xav qhia cov His Xas Lais tias yog thaum lawv ua ncaj rau Tswv Ntuj mas lawv teb chaws thiaj tau nyob nyab xeeb. Lawv yuav ua ncaj rau Tswv Ntuj li no; yam li mloog Mais Xes txoj cai, thiab teev Tswv Ntuj tas siab tas ntsws. Ntawv Xwm tseem qhia tias tus vaj His Xas Lais ua ncaj rau Tswv Ntuj yog tus vaj Das Vis. Tswv Ntuj thiaj cog lus rau Das Vis tias nws tsev neeg yuav kav Tswv Ntuj haiv neeg mus ib txhiab ib txhis.
Dhau ntawd, ntawv Xwm kuj xav qhia tias haiv His Xas Lais yuav yog ib haiv neeg ntshiab. Yog nyob hauv haiv His Xas Lais mas thiaj yuav muaj tuaj raws li cov lus Tswv Ntuj cog rau Das Vis.
Ntawv Xwm tsis xav qhia tias cov xwm tshwm sim loj tshaj tsis yog cov xwm kav teb chaws, tab sis cov xwm loj tshaj yog hais txog ‘kev teev Tswv Ntuj’ thiab cov hauj lwm loj tshaj uas cov vaj tau ua mas yog ‘txhim lub Tuam Tsev Teev Ntuj’ thiab ‘rov tshaj Mais Xes txoj cai’ rau tsoom pej xeem.
Ntawv Xwm phau Ib tus txheej txheem:

1. Txij lub hauv paus los txog Das Vis (1X 1-10) muaj 9 nqe:
   • Txij As Das los txog His Xas Lais (1X 1); hais txog Is Mas Es, His Xas Lais thiab cov Es Doos caj ces.
   • Yus Das (1X 2); hais txog His Xas Lais tus tub Yus Das cov xeeb ntxwv tias muaj ib tug yog tus vaj Das Vis.
   • Das Vis lub keeb (1X 3); hais txog cov vaj tawm hauv Das Vis tsev neeg los.
   • Cov xeem His Xas Lais nyob qab teb (1X 4) yam li cov Yus Das thiab cov Xis Mes Oos.
   • Cov xeem His Xas Lais nyob ntawm tus dej Yos Las Das sab hnub tuaj (1X 5) yam li cov Lus Npes, cov Nkas, thiab cov Mas Nas Xes ib nrab.
   • Cov Les Vis (1X 6).
   • Cov xeem His Xas Lais nyob qaum teb (1X 7) yam li cov Is Xas Kas, cov Npes Yas Mis, cov Nas Thas Lis, cov Mas Nas Xes, cov Es Fais, cov As Xes.
   • Lub xeem Npes Yas Mis thiab lub tsheej Yes Lus Xas Les (1X 8-9).
   • Tus vaj Xas Ws (1X 10) thiab nws tsev neeg hauv lub xeem Npes Yas Mis.
2. Tus vaj Das Vis yog tus tsim txoj Tuam Kev Teev Ntuj His Xas Lais nyob Yes Lus Xas Les (1X 11-28) muaj 3 nqe:
   • Das Vis pib ua vaj, nws txeeb tau lub tsheej Yes Lus Xas Les (1X 11-14).
   • Lawv coj lub Xab Cog Lus los nyob hauv Das Vis lub tsheej (1X 15-20).
   • Das Vis npaj tas txhua yam tsim txoj kev teev Ntuj thiab npaj ntoo, npak pob zeb txhim lub Tuam Tsev Teev Ntuj (1X 21-28).
     Ntawv Xwm phau Ob tus txheej txheem:
3. Xas Los Moos txhim lub Tuam Tsev Teev Ntuj (2X 1-9).
4. Cov vaj kav His Xas Lais teb thiab Yus Das teb (2X 10-27).
5. Tus vaj Es Xes Kias thiab Yos Xias coj cov Yus Das rov los taug txoj kev teev Tswv Ntuj xws li Das Vis tsim (2X 28-36).
   Cov xwm hauv ntawv Xwm.
6. Das Vis nqa lub Xab Cog Lus mus hauv Das Vis lub tsheej.
7. Xas Los Moos nqa lub Xab Cog Lus mus hauv Tswv Ntuj lub Tuam Tsev.
8. Tus vaj Yuas ua txhaum.
9. Tsoom Yus Das ua txhaum ntau, lawv raug txim ib ntus.