Mas Kos sau cov lus hais txog lub caij Yes Xus yuav pib tshaj lub Moo Zoo nyob hauv lub xeev Nkas Lis Lais. Mas Kos hu Yes Xus ua ‘Yes Xus Pleev’. Lo lus ‘Pleev’ (Anointed) ntxeev los ntawm lus Hes Las ‘Christ’ thiab lus Hes Nplaws ‘Messhiah’. Txheej puag thaum ub, cov His Xas Lais yuav tsa ib tug neeg ua vaj, mas lawv muab roj los pleev rau tus yuav ua vaj ntawd. Cov roj yog ib lub cim tias ‘muaj zog’, vim lawv saib tus yuav ua vaj yog ib tug neeg muaj zog tiag. Li ntawd, Yes Xus Pleev thiaj txhais tias ‘tus vaj Yes Xus’.
Mas Kos hais tias Yes Xus yog tseem ‘Tswv Ntuj Leej Tub’ (Son of God). Yes Xus ua kom pom Tswv Ntuj kev nyiam thiab Tswv Ntuj lub hwj chim nyob hauv Yes Xus cov hauj lwm, ces Mas Kos thiaj sau txog Yes Xus cov hauj lwm ntau dua Yes Xus cov lus hais.
Ua ntej Zam yuav tuaj, cov Yus Das tsis muaj Yaj Saub tau 400 xyoo. Mas Las Kis yog tus Yaj Saub kawg hauv Ntawv Cog Lus Qub, nws hais txog ‘tus tub tshaj xo’ (Messenger). Mas Kos muab Mas Las Kis zaj 3 qib 1 los ntxiv rau His Xais zaj 40 qib 3 hais txog ‘tus qw hauv teb chaws quav poj’ (the voice that is shouting in the desert) los hais txog Zam.
Mas Kos hais tias “Muaj ib lub suab qw nyob teb chaws suab puam.” Qib lus no yog ua paj lug hais xwb, muaj lub ntsiab hais tias “Tswv Ntuj yuav cia ib tug yaj saub tshaj Tswv Ntuj Lo Lus nyob hauv lub teb chaws suab zeb suab puam, uas yog ib lub teb chaws quav poj. Lub suab ntawd yog Zam Ntxuav Plig ntag. Zam yog tus qhia tsoom sid kom sawv daws tig los yuav lub siab tshiab, thiab kom lawv paub Huab Tais Yes Xus. Tswv Ntuj siv Zam los ua Tswv Ntuj lub suab vim tias Zam yog tus tshaj Tswv Ntuj Lo Lus. Zam cov lus qhuab qhia raug sawv daws siab ua kom lawv ras dheev thiab xeev los ua zoo, npaj tos tus Huab Tais uas tuaj yuav txog tom ntej no.
Cov pej kum neeg yog lawv xav tig los nrog cov Yus Das teev hawm Tswv Ntuj raws li cov Yus Das txoj cai, mas lawv tsum ua kab ke ntxuav tso. Thaum Zam tshaj kom tsoom sid hloov siab tshiab, nws kuj ua li ntawd. Zam ua kab ke ntxuav nyob hauv tus dej Yos Las Das. Nws qhuab qhia cov neeg tuaj txais kab ke ntxuav kom lawv ‘hloov siab los yuav lub siab tshiab’, ua kom lawv lub siab dawb huv tsim nyog txais lub Moo Zoo uas Yes Xus yuav tshaj rau lawv.
Kab ke ntxuav Zam pub rau cov His Xas Lais yog ib lub cim qhia tias yus xav los nyob hauv Tswv Ntuj haiv neeg, mloog Mais Xes txoj cai thiab mloog cov lus qhuab qhia uas nyob hauv phau ntawv Cog Qub Lus. Cov neeg tuaj txais kab kev ntxuav ntawm Zam mas lawv yuav tig los ua ib lub neej haum cov lus qhia uas nyob hauv phau ntawv Cog Qub Lus, thiab lawv tso siab tias Tswv Ntuj yog Leej Txiv pub txiaj ntsim rau cov neeg vam txog Tswv Ntuj.
Zam cov kab ke ntxuav tsuas yog ib lub cim rau cov neeg xav tig los yuav lub siab tshiab, tab sis Yes Xus lub Cim Ntxuav yog lub cim ntxuav neeg cov txhaum pov tseg.
Zam qhia tsoom sid kom ua neeg xyuam xim ceev faj, vim tias ib hnub tom hauv ntej Tswv Ntuj yuav muab txim rau cov neeg phem uas pheej ua tej yam nkaus. Zam hu sawv daws kom tso txoj kev ua phem ua nkhaus pov tseg thiab tig los yuav lub siab tshiab. Zam kuj hais tias tus xav ua zoo mas kom ua li no “Tus muaj ob lub tsho kom nws faib ib lub rau tus tsis muaj. Tus muaj noj yuav faib pub rau tus tsis muaj noj. Tus pom ib tug neeg raug kev txom nyem yuav tsum cev tes pab. Tus neeg sau se, kom nws txhob noj paj ntau dhau cai.”
Zam tsuas muaj ib lub siab tos tus yuav tuaj cawm ntiaj teb neeg ntawm lawv txoj kev ua txhaum. Zam tsis quav ntsej ntiaj teb lub cuab tam, nws tsis ntshaw tsoos tsho zoo nkauj hnav. Zam tsis ntshaw tej txhiam xws noj qab qab. Nws coj lub neej xws li ib tug neeg xav them txim txhaum tiag. Nws muab tej daim tawv tsiaj los hnav, nws noj me kab me kooj thiab haus zib ntab zib mus yug nws lb cev xwb. Zam yoog noj yoog haus, nws yuam nws lub cev kom txhob ntshaw noj ntshaw hnav, thiab txhob poob hauv txoj kev ua txhaum.
Mas Kos xav qhia peb tias Zam yog Tswv Ntuj ib tug tseem yaj saub, Zam tos txog tus yuav tuaj cawm ntiaj teb neeg, ces Zam thiaj muab ib daig tawv tsiaj los npua xwb. Zam rau siab ntso qhia zeej tsoom kom lawv npaj tos tus Huab Tais tab tom yuav tuaj.