Nkos Lias txoj kev tuag thiab sawv rov los (17)

17. Lub cuab tam sab ntsuj plig

Tswv Ntuj hu kuv los tu lub ntiaj teb no kom zoo nkauj tuaj thiab siv Tswv Ntuj lub txiaj nyiag uas yog kuv rab peev xwm los koom tes nrog Tswv Ntuj tsim Ntuj lub Ceeb Tsheej rau ntiaj teb no. Tiam sis kuv tsis ua li ntawd, qhov kuv tau ua yog ntxeev Tswv Ntuj txoj kab xwm no, kuv qhuab ntuas lwm tusk om ua tej yam tsis zoo, kuv coj lawv mus poob hauv txoj kev phem. Mas Huab Tais Yes Xus thiaj nug kuv tias ‘koj tau nqa lub cuab tam dab tsi los rau kuv?’

Kuv ntsia hauv kuv ob txhais tes mas ua cas tsis muaj ib yam dab tsi li. Ces Huab Tais Yes Xus hais rau kuv tias ‘koj lub tsev, koj chav hauj lwm uas koj cav tias yog koj li yog koj lub peev xwm tsim tau los, ziag no pab puas tau koj mas? Tej zaum koj yuav nqa tau ib ob daim av thwv cib tuaj tau ntawm no? Tej ntawd muaj qab hau dab tsi rau koj mas? Koj teev koj lub cev, koj muab tas koj tej nyiam los hawm koj lub cev, pub tau dab tsi rau koj mas? Koj yoo mov, koj yuam koj lub cev kom koj ntag ntsum zoo nkauj zoo saib, pab tau dab tsi koj mas?

Koj ua neeg siab zoo, yog tiag! tiam sis yog koj ua kom lawv qhuas koj xwb, koj muab koj cov nyiaj muas sawv daws lub siab kom lawv tau ua tej yam rau koj. Koj hais qhia saib, koj coj tau dab tsi tuaj cia ntawm no?

Thaum kuv pom koj lag luam ntog, mas tsis tias kuv muab lub txim rau koj xws li koj xav, tab sis yog kuv muab koob hmoov rau koj. Yog lawm, qhov koj tej lag luam piam tas mas yog kuv cov koob hmoov pab kom koj dim hauv tej nyiaj txiag koj muab saib ua koj tus tswv ntuj, yog rub kom koj rov los nrhiav kuv uas yog koj tus tseem Huab Tais. Tab sis saib qhov koj ua mas, koj tsis kam mloog, tsis kam thim, koj tsis kam tawm los, koj tseem cia koj ua nyiaj txiag qhev li qhov qub. Koj xav tias yog koj lub peev xwm, koj kev txawj ntse thiab koj lub zog nquag mas koj yuav rov tsa tau koj tej lag luam. Tsis yog li koj xav, koj ntsia mas muaj puas tsawg leej txawj ntse dua koj, kawm ntawv siab dua koj, zoo dua koj, ua hauj lwm nquag dua koj, tsis kav lawv tau raws li qhov lawv tsim nyog tau txais xwb. Koj tau ntau dua lawv, mas koj yuav tau saib hauj lwm kom ntau dua lawv thiab.

Kuv pom lub neej thaum yau, mas peb txom nyem heev, kuv niam hau taum rau peb noj xwb, kuv tsis nyiam noj mas kuv thiaj tsis noj, kuv yws rau kuv niam tias ‘pluas twg los yog taum, ua cas yuav noj taum li taum xwb. Muaj ib hnub mas kuv yuav tsum muaj nyiaj ntau thiab yuav tsis nog cov niag taum no ntxiv li lawm.’

Muaj ib hnub kuv muab cov taum kuv niam ua coj mus nchuav pov tseg, kuv niam pom kuv lub tais mas du du ces kuv niam xav tias yog kuv tshaib plab dhau ces kuv thiaj noj ua du ntais, ces kuv niam thiaj qee nws qhov rau kuv noj, hnub ntawd mas kuv niam yoo ib hnub.

Zaj no Huab Tais Yes Xus xav qhia kuv tias muaj ib tug yeem cia nws tshaib plab kom kuv txhob tshaib.

Peb tsev neeg muaj 7 nus muag, mas muaj ntau zaus kuv niam nrhiav zaub mov kom peb txhob tshaib, tab sis nws mas yoo yoo tshaib. Muaj tej hnub mas cov neeg txom nyem tuaj thov khawv txog peb tsev, mas kuv niam hlub lawv, nws muab nws qhov pub rau lawv. Kuv niam tshaib tas npaud tsis kav nws tsis pub kom peb paub.

Vim kuv niam mas Tswv Ntuj thiaj pub txiaj ntsim thiab foom koob hmoov ntau rau kuv. Kuv niam niaj hnub mus teev Ntuj, nws cev nws tej kev txom nyem rau Huab Tais Yes Xus, nws tso siab rau Huab Tais Yes Xus.

Huab Tais Yes Xus hais tias ‘tsis muaj leej twg yuav hlub koj npaum koj niam lawm’, ces Huab Tais Yes Xus pub kuv pom tias thaum kuv mus ua tej rooj qav noj lom zem tsau plab, noj seem noj pov tseg, mas kuv niam nyob yam tshaib plab tos kuv.

Huab Tais Yes Xus hais ntxiv tias ‘koj ntsia koj cov nus muag mas, lawv tab tom tshaib plab, yog kuv nrog lawv tshaib plab.’

Kuv pom tias nyob hauv kuv tsev mas kuv muaj tsoos tsho zoo nkauj tus nqi kim kim nyob puv tas, ces Huab Tais Yes Xus rov hais rau kuv tias ‘koj muaj tsoos tsho zoo hnav ntau tis ntau hnav tsis tas, tab sis kuv mas liab liab qab tsis muaj ib lub tsho npog lub cev.’

Nyob hauv kuv lub neej mas yog kuv pom tias cov phooj ywg muaj dab tsi mas kuv tsum muaj xws li lawv, vim kuv lub siab khib, ces Huab Tais Yes Xus lub suab rov ntxiv rau kuv tias ‘koj ua neeg muab hlob, koj muab koj mus piv nrog cov neeg muaj dua koj, koj tsis ntsia cov neeg pluag txom nyem, koj tsis pub rau lawv noj lawv hnav.’

Kuv rov pom txog thaum kuv tseem me me mas kuv niam yuav ib nkawm khau ntaub rau kuv, ces muaj ib hnub kuv pom ib tug me nyuam yaus nyob tom tag kev, nws tsis muaj khau rau, kuv khuv leej nws, kuv thiaj pub txhais khau ntaub rau nws. Kuv xuas taw do los txog tsev mas kuv niam thiab kuv txiv nkawd cem kuv thiab yws kuv vim tias nkawd muab tag nrho nkawd cov nyiaj khaws los muas nkawm khau ntawd rau kuv tau rau. Txawm tias nkawd npau taws rau kuv, tsis kawv qhov kuv tau ua no ntxim Tswv Ntuj siab, ces Tswv Ntuj thiaj pub txiaj ntsim ntau rau kuv. Qhov no yog kuv lub neej thaum yau, thaum tsis tau mus taug txoj kev txhaum, kuv muaj lub siab zoo siab hlub lwm tus.

Yog tias kuv qhib qhov rooj txais Leej Ntuj Plig Ntshiab thiab Ntuj lub txiaj ntsim mas kuv yuav tau pab ntau leej neeg raws li rab peev xwm Tswv Ntuj pub rau kuv.

Huab Tais Yes Xus qhib rau kuv pom tas ntiaj teb neeg, pom cov neeg ua neej raws nraim Huab Tais Yes Xus tus lw, lawv muab lub siab npuab Tswv Ntuj thiab cia Leej Ntuj Plig coj lawv kev, lawv ua raws li Tswv Ntuj kom lawv ua, ces Huab Tais Yes Xus ntuas kuv tias ‘yog koj ua xws li cov neeg no mas dab phem yuav chaw los nyob hauv koj lub neej tsis tau, ces koj tus plig yuav tsis lwj li ziag no.’

Huab Tais Yes Xus kom kuv ntsia tus me nyuam txiav siab dai tuag, ces hais rau kuv tias yog kuv thov Ntuj rau nws mas nws yuav tsis txo nws txoj sia li ntawd. Kuv pom tus me ntxhais mus muab tus me nyuam hauv nws lub cev kaus tawm, mas Huab Tais Yes Xus hais tias yog thaum ntawd koj thov Ntuj rau nws mas nws yuav tsis ua txhaum li ntawd.

Huab Tais Yes Xus hais rau kuv ntxiv tias yog kuv thov Ntuj mas nws yuav muab ib lub tswv yim cia rau saum kuv, kom tau coj mus pab lwm tus, nws yuav ua tus coj kuv kev mus nrhiav cov neeg raug xwv txheej txom nyem ntawd.

Kuv pom cov neeg txom nyem nyob thoob lub qab ntuj, kuv muaj peev xwm pab tau lawv, tab sis vim kuv tsis qhib siab cia Leej Ntuj Plig los nyob hauv kuv, los tshoj kuv, ces kuv lub siab thiaj ntxhib tsis mob siab thaum pom cov neeg raug kev txom nyem. Huab Tais Yes Xus xav kom kuv mob siab txog lawv mas nws thiaj tso tus mob los raug kuv tsev neeg kom kuv pom txog lawv kev txom nyem, mas nyaj kuv lub siab yuav muag tuaj, txawj hlub cov neeg muaj mob thiab, tab sis kuv tsuas mob siab thaum kuv paub tias kuv tus txiv cov nyiaj mas rho tawm los siv tsis tau xwb.

Kuv thov muab hais dua rau nej mloog txog tej yam nyob hauv ntawv txheeb txoj sia li no: kuv tau ua yam tsis yog, yog kuv ua neeg siab nkhaus, kuv ua neeg ntoo ob lub ntsej muag, kuv hais rau tus nrog kuv tham mas kuv hais zoo hais qhuas nws tab sis thaum nws dhau mus lawm mas kuv cem nws hais qhov tsis zoo txog nws. Xws li kuv tau hais rau ib tug poj niam tias ‘koj zoo nkauj tshaj li, koj hnav tsoos tsho tau phim kawg tiag’, tab sis hauv kuv lub siab mas yws yws tias ‘niag pog no mas ua cas yuav dab tuag ua luaj, txawm muaj plhus hnav lub tsoo ntawd thiab yuad!’

Nyob hauv peb phau ntawv txheeb txoj sia mas txhua yam peb tau ua, tau xav twj ywm hauv nruab siab yuav nthuav tawm tas los rau sawv daws pom, yam npog hauv qhov tsaus ntuj yuav tawm tuaj nyob hauv qhov pom kev.

Kuv nyiag kev tawm mus ua si puas tsawg zaus los yuav tawm tuaj, puas tsawg zaus uas kuv hais lus dag lus cuav los yuav tawm tuaj. Nyob ntawd mas kuv niam thiab kuv txiv tab tom saib tej yam kuv tau muab npog cia tshwm tawm los cuag cas. Lub caij no mas kuv txaj muag rau tej kuv tau zais tau npog cia no.

Nyob hauv kuv lub neej yav hluas mas kuv tsuas npaj siab kom zoo mus lees txhaum tib zaug xwb, thaum ntawd yog muaj ib tug poj niam tau ntxiv nyiaj tshaj rau kuv, tab sis vim kuv maj mus ua hauj lwm thiab tsheb los sib tos ua kab sab ntev ntev ces kuv yws yws tias ‘saib mas! Niag poj ruam ntxiv nyiaj tshaj rau kuv lawm, tsis yog kuv txhaum, yog nws kev txhaum as.’ Tab sis hauv kuv lub siab mas hais rau kuv kom tu siab tias ua cas kuv tsis rov mus muab qhov nyiaj tshaj ntawd rov rau nws, ces txog Hnub Chiv, kuv mus lees txhaum, kuv hais rau Txiv Plig tias ‘Txiv! Kuv lees rau koj tias kuv tau nyiag lwm tus li nyiaj thiab kuv tsis tau rov coj mus rau nws.’ Kuv tu siab tiag tab sis kuv tsis quav ntsej mloog tias Txiv Plig ntuas kuv li cas vim kuv xav tias kuv lees lawm mas yuav tsis muaj leej twg hais tau tias kuv ua tub sab.

Ces Huab Tais Yes Xus hais tias kuv tu siab thiab mus lees txhaum mas zoo, tiam sis kuv tsis muaj lub siab khuv leej tus poj niam ntawd, mas kuv thiaj tsis tau coj nyiaj rov mus rau nws. Qhov nyiaj ntawd mas kuv xav tias me me xwb tab sis kuv pom tias tus poj niam ntawd thiab nws tu me nyuam mos nkawd yoo tshaib tsis tau mov noj txog 2 hnub sib law.

Yog li mas kuv thiaj paub tias txhua yam kuv ua yuav muaj feem raug rau lwm tus, tej no peb tsuas pom tau nyob hauv phau ntawv txheeb txoj sia.

Nyob hauv phau ntawv txheeb kuv txoj sia tsuas muaj cov hauj lwm tsis zoo, tsuas muaj kev txhaum xwb.

Huab Tais Yes Xus tshuaj xwm kuv mus txog kiag lub sij hawm kawg, Huab Tais Yes Xus xa ntau leej tuaj cuag kuv, pub ntau yam xwv txheej tuaj nphav kuv kom kuv rov tau pom Tswv Ntuj dua. Huab Tais Yes Xus nrhiav kuv tsis tseg.

Nej puas paub tias peb tus Huab Tais thiab peb Leej Txiv yog leeg twg?

Yog tus Tswv Ntuj muaj kev nyiam, yog tus niaj hnub hu kom peb tig los yuav siab tshiab. Tab sis saib yam peb ua mas! Peb tsis liam fab rau Tswv Ntuj kev nyiam thiab lub suab hu peb.

Kuv xav hais rau Tswv Ntuj tias ‘Huab Tais, koj muab txim rau kuv, koj tsawm kuv mas!’ Tiam sis Tswv Ntuj tsis ua li hais, nws tsis tsawm kuv.

Tswv Ntuj pub kev twj lij rau kuv xaiv tias kuv yuav cia leej twg ua kuv Txiv; Tswv Ntuj los Xas Tas.

Related Post

Leave a Reply

Your email address will not be published. Required fields are marked *

Translate »