18. Tswv ntuj pub lub cib fim tshiab rau kuv
Thaum xob tua kuv ntawd, lawv coj kuv lub cev mus txog tom chav kho neeg, cov kws kho mob mas lawv tsuas ntsia kuv xwb, lawv tsis maj los kho kuv. Kuv ib ce mob heev ces kuv pom Huab Tais Yes Xus los cuag kuv, los plhws kuv taub hau thiab hais lus rau kuv tias ‘me nyuad, koj pom kuv, koj tab tom yuav tuag, koj vam txog kuv lub siab khuv leej mas.’
Kuv xav twj ywm tias ‘ua cas kuv thiaj yuav vam txog kev khuv leej, kuv twb tsis tau ua tej yam phem nas!’
Kuv tsis paub txog yam kuv tau ua tsis yog, kuv tsuas ras tias kuv tab tom yuav tuag xwb, kuv nco txog kuv lub nplhaib kub, kuv ntsia ntawm tus ntiv tes kuv pom mas kuv tsuas hais tias tsum muab hle tawm, tsam ib me ntsis lawv muab ua puas. Kuv ua tiag rho lub nplhaib, ces kuv rov nco tau tias kuv tab tom yuav tuag, kuv pib ntshai tsam cov kws kho mob nyiag kuv lub nplhaib kub no mus. Kuv pom kuv tus txiv hluas tuaj txog, ces kuv cev lub nplhaib rau nws pab saib. Kuv hais kom nws hais rau kuv tus niam hluas kom pab tu kuv cov me nyuam thiab.
Thaum kuv yuav tuag tsis tuag li no, saib mas! Kuv tsis siv lub sij hawm luv luv no los thov kev khuv leej rau kuv xws li Huab Tais Yes Xus hais, kuv tsis tau thov kom Tswv Ntuj zam txhaum rau kuv. ‘Kuv yuav hais kom Tswv Ntuj zam txhaum rau kuv tau li cas, vim kuv yog neeg tsis muaj txhaum?’ Kuv xav li ntawd.
Thaum twg peb xav tias peb yog neeg zoo txhij mas yog peb tab tom tsawg peb ntag!
Tswv Ntuj yog peb txiv, nws hlub peb txhua tus neeg, tsis hais tus zoo los tus phem. Nyob hauv peb lub caij kawg mas Tswv Ntuj los nrhiav peb, los plhws peb taub hau, puag peb cia nyob hauv nws lub siab nyiam siab hlub peb. Tswv Ntuj xav cawm peb tsuas yog peb qhib siab txais nws, thov nws zam txhaum rau peb, khuv leej peb, thiab peb tu siab rau peb cov txhaum mas Tswv Ntuj yuav cia peb xaiv saib peb yuav raws tus twg qab mus.
Yog tias peb ua neej nyob peb tsis npuab Tswv Ntuj mas txog hnub ntawd peb kuj yuav tsis kam lees Tswv Ntuj ua peb tus Huab Tais thiab.
Ces phau ntawv txheeb kuv txoj sia rov kaw nti li qhov qub!
Thaum phau ntawv txheeb kuv txoj sia kaw nthi mas kuv lub tau hau rov quav thiab tab tom yuav poob mus rau dab teb cov hluav taws, kuv pib quaj tom hniav nkawv, kuv hu txog cov Leej Ntshiab thov lawv tuaj pab kuv. Kuv hu txog lawv txhua tus tas mas kuv cia li ploj ntais, kuv paub lawm tias yuav tsis muaj leej twg tuaj pab tau kuv lawm. Kuv tsa taub hau ntsia pom kuv niam nyob siab saud, kuv hais rau kuv niam tias ‘Niad! Kuv tau tsawg kuv kom kuv poob los nyob hauv no. Kuv yuav tsis pom koj mus tas ib sid lawm os.’
Thaum ntawd, Huab Tais Yes Xus pub lub txiaj ntsim zoo nkauj tshaj rau kuv. Tswv Ntuj pub kom kuv niam tau tes mus saum ntuj kom kuv pom tias muaj ib nkawm qhov muag ntsia ntsoov kuv. Yam kuv tau pom hauv lub qhov muag ntawd mas yog ib hnub nyob hauv kuv lub neej, kuv tau kho ib tug neeg mob, ces tus neeg mob hais rau kuv tias ‘kws tshuaj, kuv nrog koj tu siab thiab mob siab os! Vim tias koj tau muab koj khi rau ntiaj teb lub cuab tam ntau dhau lawm. Yog tias muaj ib hnub twg koj pom tias koj nyob hauv kev ntshai kev txom nyem, mas koj thov txog Huab Tais Yes Xus pab cawm koj mas Huab Tais Yes Xus yuav zam lub txim rau koj vim tias Huab Tais Yes Xus yuav tsis tso koj pov tseg. Huab Tais Yes Xus yuav muab nws cov ntshav los ua tus nqi txhiv koj os!’
Ces kuv thiaj tsa ncauj thov tias ‘Huab Tais Yes Xus, thov koj khuv leej kuv mas, thov koj zam lub txim rau kuv os, thov koj daws kuv cov txhaum, thov koj pub lub cib fim tshiab rau kuv yuad!’
Ces Huab Tais Yes Xus cev tes tuav kuv txhais tes thiab rub kuv tawm hauv cov hluav taws. Huab Tais Yes Xus hais tias ‘Yog lawm, koj yuav tau txais lub cib fim tshiab, koj yuav rov mus muaj sia nyob. Tsis yog vim koj tsev neeg cov lus thov Ntuj rau koj, tiam sis yog cov neeg tsis muaj feem dab tsi nrog koj lawv tau thov Ntuj pub rau koj, lawv cev lawv lub siab nyiam los thov Ntuj pub rau koj.’
Kuv pom kev thov Ntuj lub zog loj cawm kuv!
Yog tias nej niaj hnub thov Ntuj rau nej cov me nyuam thiab rau tas ntiaj teb neeg mas nej yuav sawv tau nyob ntawm Tswv Ntuj xub ntiag.
Kuv pom ib co qe hluav taws dawb paug me me zoo nkauj ya tuaj cuag Tswv Ntuj, cov qe hluav taws no yog neeg lo lus thov Ntuj, lawv cov lus thov Ntuj rau kuv. Vim lawv pom cov xov xwm hais txog kuv kev txom nyem mas lawv quaj thiab thov Txiv Plig ua thaj txi Ntuj pub rau kuv.
Li ntawd mas tsuas yog kev thov thaj txi Ntuj rau lwm tus xwb thiaj yog lub paj tshab loj tshaj uas peb yuav pub tau rau lwm tus. Tsis muaj yam dab tsi yuav pab tau lwm tus xws li lub thaj txi Ntuj lawm.
Qhov sawv daws sib pab thov Ntuj rau lwm tus thiab koom siab pab lwm tus thiaj yog qhov xis Tswv Ntuj lub siab tshaj plaws.
Nyob hauv cov qe hluav taws ntawd muaj ib lub loj tshaj cov yogi b tug txiv neej uas nyiam kuv tshaj thiab thov Ntuj pub rau kuv. Huab Tais Yes Xus qhia rau kuv tias ‘tus txiv neeg ntawd nyiam koj thiab hlub koj tshaj plaws, nws tsis tau paub dua koj thiab koj los yeej tsis paub nws, neb tsis tau sib paub dua li.’
Tus txiv neej no nws yog ib tug ua liaj teb txom txom nyem nyob puag tim ntug zos. Nws nyob txom nyem tsis muaj noj vim tias nws cov qoob mag hluav taws hlawv tas, nws cov qaib los raug luag tuaj nyiag must as. Tus txiv neej no nws ntoj kev pem roob nqes los koom lub txoos teev Ntuj nram nroog.
Huab Tais Yes Xus pub kom kuv hnov nws cov lus thov Ntuj li no ‘Huab Tais Yes Xus, kuv nyiam koj tas siab, kuv ua koj tsaug rau qhov koj tau pub kom kuv lub cev no tsis muaj mob, kuv thov sawv kuv cov me nyuam chaw ua koj tsaug, kuv ua koj tsaug rau qhov koj tau pub txhua yam rau kuv, kuv thov cav txog koj lub koob meej mus li.’
Nws cov lus thov mas tsuas yog cav txog Tswv Ntuj lub koob meej thiab ua tsaug Tswv Ntuj xwb. Ces kuv pom tias nyob hauv nws lub hnab nyiaj mas muaj ob daim nyiaj; ib daim 5 txhiab, ib daim yog 10 txhiab. Nws lub hnab nyiaj mas muaj ob daim nyiaj no xwb.
Nej puas paub nws ua li cas? Nws rho daim 10 txhiab los cev rau lub tsev teev Ntuj, nws khaws daim 5 txhiab cia.
Nws yeem muab qhov ntau rau lub tsev teev Ntuj, nws tsis khuv xim txog 10 txhiab nyiaj ntawd, los yws txog nws kev txom nyem. Nws tsuas yog ua Tswv Ntuj tsaug thiab cav txog Tswv Ntuj xwb.
Teev Ntuj tas mas nws mus tom lub kiab, nws yuav ib lub tshuaj da dej, ces luag muab daib nplooj ntawv xov xwm los kauv lub tshuaj da dej cev rau nws. Nyob hauv daim nplooj ntawv xov xwm ntawd mas sau txog kuv raug xob tua thiab muaj kuv daim duab kub hnyiab nyob nrog.
Tus txiv neej no nthuav daim nplooj xov xwm los nyeem, nws kua muag poob hntav cuag li tias kuv yog tus nws hlub tshaj plaws. Nws nyo taub hau thiab tsa suab thov Ntuj tawm hauv nruab siab tuaj tias ‘Leej Txiv, koj yog kuv tus Tswv Ntuj, thov koj khuv leej kuv tus muag ntxawm no thiab yuad! Thov koj pab nws mas kuv tus Tswv Ntuj, thov koj pab nws os! Yog tias koj pab nws mas kuv cog lus rau koj tias kuv yuav mus fi ntuj nyob rau Sanctuary of Buga, tiam sis thov koj pab nws thiab mog!’
Nej nrog xav mas, tus txiv neej pluag txom nyem no nws tsis tau yws txog nws kev txom nyem, nws tsev neeg kev tshaib nqhis rau Tswv Ntuj, nws tsuas cav txog Tswv Ntuj thiab ua Ntuj tsaug, thiab nws tseem hlub lwm tus tas npaum li no thiab. Txawm nws yuav tsis tau dab tsi noj yug siav, tsis kav nws yeem ntoj kev hla roob hla hav tuaj fi ntuj rau ib tug neeg nws tsis paub txog thiab.
Huab Tais Yes Xus hais tias ‘qhov no mas thiaj yog kev nyiam lwm tus tseeb tiag! Koj yuav tau nyiam thiab hlub lwm tus zoo li no thiab. Koj yuav rov coj tej yam koj tau pom nyob ntawm no mus qhia rau sawv daws, koj yuav tau ua pov thawj txog tej yam koj tau paub no rau sawv daws, tsis yog ib txhiab zaug xwb, tab sis yogi b txhiab, ib txhiab zaug mog! Txoj hmoov phem yuav poob rau saum tus tau hnov koj cov lus tab sis nws ua lub siab tawv tsis hloov siab ua tus neeg tshiab.’
Li ntawd mas kuv cov nus cov muag sawv daws, tsis yog txoj kev quab yuam, Huab Tais Yes Xus tsis tau yuam leej twg, qhov no tsuas yog lub cib fim tshiab Tswv Ntuj tau pub rau kuv, thiab yog lub cib fim zoo cia rau nej. Qhov no yog ib lub cim tias Tswv Ntuj hlub peb, nyiam peb tas npaud mas Tswv Ntuj thiaj muab daim tsom iav no txawb cia ntawm nej hauv ntej, kom nej rov tsom pom nej. Daim iav tsom no yog kuv, Nkos Lias Pos Los. Vim Tswv Ntuj tsis xav kom peb cov lus tsawm rov poob raug peb, Tswv Ntuj tsuas vam tias muaj ib hnub peb yuav tau mus nrog nws nyob pem Tswv Ntuj lub Ceeb Tsheej. Li ntawd peb thiaj tsum hloov peb tus kheej mas thaum txog lub caij peb ncaim ntawm lub ntiaj teb no mus, peb thiaj yuav pom nyob hauv peb phau ntawv txheeb txoj sia tsuas muaj qhov zoo tsis muaj kev ua phem ua txhaum txuag nrog.
Tswv Ntuj thov tib yam ntawm peb, yog hloov siab tshiab. Txawm tias nyob hauv lub sij hawm kawg nkaus hauv peb txoj sia los Tswv Ntuj kuj thov tib yam zoo li no kom peb thiaj tau lub neej tshiab nyob nrog Tswv Ntuj, vim yog tsis muaj Tswv Ntuj mas peb ua tsis tau dab tsi li.
