-1-

1 Phau ntawv qhia txog Yes Xus Pleev lub keeb, uas yog Das Vis leej tub thiab yog Has Nplas Has leej tub¹ : 2 Has Nplas Has yug His Xas Has, His Xas Has yug Yas Kos, Yas Kos yug Yus Das thiab nws cov kwv tij. 3 Yus Das poj niam hu ua Thas Mas yug Fas Les thiab Ntxas Las. Fas Les yug Es Xas Los, Es Xas Los yug As Las, 4 As Las yug As Mis Nas Das, As Mis Nas Das yug Nas As Xoos, Nas As Xoos yug Xas Moos, 5 Xas Moos poj niam hu ua Las Has yug Npuag Oos, Npuag Oos poj niam hu ua Luv yug Os Npes, Os Npes yug Yes Xes, 6 Yes Xes yug tus vaj Das Vis. Das Vis yuav Us Lis tus poj niam, nws yug Xas Los Moos, 7 Xas Los Moos yug Los Npuag, Los Npuag yug As Npias, As Npias yug As Xas, 8 As Xas yug Yos Xa Fas, Yos Xas Fas yug Yos Las, Yos Las yug Os Xias, 9 Os Xias yug Yos As Thas, Yos As Thas yug As Kas, As Kas yug Es Xes Kias, 10 Es Xes Kias yug Mas Nas Xes, Mas Nas Xes yug As Moos, As Moos yug Yos Xias, 11 Yos Xias yug Yes Kos Nias thiab Yes Kos Nias cov kwv tij. Thaum ntawd yog lub caij raug txim nyob Npas Npis Los. 12 Dhau lub caij raug txim nyob Npas Npis Los lawm, Yes Kos Nias yug Xas Las Thias, Xas Las Thias yug Ntxos Los Npas Npes, 13 Ntxos Los Npas Npes yug As Npis Yus, As Npis Yus yug Es Lias Kis, Es Lias Kis yug As Ntxos, 14 As Ntxos yug Xas Dos, Xas Dos yug As Khis, As Khis yug Es Lis Us, 15 Es Lis Us yug Es Les As Ntxas, Es Les As Ntxas yug Mas Thas, Mas Thas yug Yas Kos, 16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev. 17 Tas cov tiam neeg huv tib si : txij Has Nplas Has los txog Das Vis, muaj kaum plaub tiam ; txij Das Vis los txog lub caij raug txim nyob Npas Npis Los, muaj kaum plaub tiam ; txij lub caij raug txim nyob Npas Npis Los txog lub caij Leej Pleev tuaj, muaj kaum plaub tiam.²
18 Yes Xus Pleev³ lub keeb chiv zoo li no : Mab Liab⁴ uas yog Yes Xus niam,⁵ lawv muab qhaib⁶ rau Yos Xes⁷ lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. 19 Yos Xes uas yog Mab Liab tus txiv, yog ib tug neeg ncaj⁸, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm.⁹ 20 Thaum nws txiav siab nrauj li ntawd, Huab Tais tus Tshiab tawm los ua npau suav rau nws, thiab hais rau nws tias : “Yos Xes, Das Vis leej tub, koj txhob ntshai coj Mab Liab, koj tus poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum.”
22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias : 23 Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias : “Tswv Ntuj nrog peb nyob”.¹⁰
24 Thaum Yos Xes tsim los, nws ua raws li Huab Tais tus Tshiab qhia rau nws : nws coj nws poj niam los nyob hauv nws tsev. 25 Nws tsis paub nws poj niam mus txog hnub Mab Liab yug Mab Liab tus tub. Nws tis tus tub npe hu ua Yes Xus.

1. Mas Tais qhia Yes Xus lub keeb vim nws sau lub Moo Zoo rau cov Yus Das. Cov Yus Das hwm Has Nplas Has ua lawv tus yawg koob xub tau txais lo lus foom hmoov zoo ntawm Huab Tais Tswv Ntuj los. Cov Yus Das tso siab tias tus yuav cawm lub ntiaj teb yog Has Nplas Has ib tug xeeb ntxwv. Mas Tais thiaj xav qhia cov Yus Das tias Yes Xus yog Has Nplas Has xeeb ntxwv tiag, ces cov Yus Das yuav ntseeg txog Yes Xus sai. ↩︎
2. Mas Tais faib Yes Xus lub keeb ua 3 txheej muaj 14 tiam neeg kom nco tau yooj yim. Yog zoo li txij Has Nplas Has los txog Yes Xus muaj 42 tiam neeg, tab sis hais qhov tsawg ntshai muaj 75 tiam. ↩︎
3. Lo lus ‘Pleev’ yog ntxeev los ntawm lo lus Hes Nplaws tias ‘Mes Xias’ (Messiah) thiab lo lus Hes Las tias ‘Khes Tos’ (Christ), txhais tias ‘tus tau txais roj pleev los ua vaj, los yog ua Leej Choj’. Lo lus ‘Yes Xus’ mas lus As Las Mais hais tias ‘Yos Hos Suas’ txhais tias ‘Huab Tais yog tus cawm’ (The Lord is Salvation/ Yahweh is salvation). Thaum peb hais tias ‘Yes Xus Pleev’ mas peb yuav hwm Yes Xus ua ‘Vaj’ (King), ua ‘Leej Choj’ (Priest), thiab ua ‘tus cawm lub qab ntuj neeg’ (Salvation). ↩︎
4. ‘Mab Liab’ mas lus Hes Nplaws hais tias ‘Maryam’ yog ncau ntawm cov Hais Nkws Tos lo lus ‘Mri’ los, txhais tias ‘nyiam’. Thaum hais ua xeem lus Hes Las mas yuav hais tias ‘Maria’. ↩︎
5. Mas Tais txhob txwm tsis hais tias Yos Xes yug Yes Xus vim Yos Xes tsis yog Yes Xus tseem txiv, Mas Tais thiaj sau tias Mab Liab yug Yes Xus. ↩︎
6. Nyob hauv cov His Xas Lais txoj cai, mas thaum lawv ‘qhaib’ ib tug ntxhais rau tus txiv neej twg, mas lawv saib tus ntxhais ntawd yog tus txiv neej ntawd poj niam ntag, yog yuav nrauj mas tsum ua ntawv sib nrauj. ↩︎
7. ‘Yos Xes’ mas lus Hes Nplaws hais tias ‘Yosep’ txhais tias ‘Huab Tais ntxiv rau’. ↩︎
8. Raws li cov His Xas Lais hais mas ‘tus neeg ncaj’ (Righteous man) yog tus coj rawv txoj cai ces nws ua qhov yog nyob ntawm Tswv Ntuj xub ntiag, nws ua xis Tswv Ntuj siab. ↩︎
9. Yos Xes yog tus neeg coj rawv Txoj Cai, thaum nws pom tias Mab Liab xeeb tub mas raws kev cai Mab Liab thiab tus me nyuam yuav yog Yos Xes lub cuab tam, tab sis nws tsis xav txeeb lwm tus tej cuab tam los ua nws tug, nws thiaj xav nrauj Mab Liab ntsiag ntsiag. ↩︎
10. Yes Xus yog lub cim qhia tias Tswv Ntuj nrog nraim peb, nws ua tus pov hwm peb thiab pov hwm tas lub ntiaj teb. ↩︎