Tus xav mus hauv Ntuj lub Ceeb Tsheej, nws tsum ua zoo li cov me nyuam (MT 19: 13-15).
Kwv tij Hmoob, raws li tau hais ua ntej no lawm tias thaud cov Yus Das saib tias cov me nyuam tsis muaj qab hau dab tsi, ces lawv tsis tshua quav ntsej txog tej me nyuam. Ntawm Huab Tais Yes Xus cov thwj tim, lawv los yeej muaj ib lub tswv yim zoo li cov Yus Das sawv daws thiab, ces thaum cov neeg coj lawv cov me nyuam tuaj rau Huab Tais Yes Xus tsa tes thov Ntuj rau, mas cov thwj tim thiaj li cem thiab txwv cov neeg ntawd. Lawv xav tias cia cov me nyuam tuaj rau Huab Tais Yes Xus thov Ntuj rau, mas tsuas tab kaum lub sij hawm Huab Tais Yes Xus tshaj lub Moo Zoo thiab kho sawv daws tej txiab mob xwb. Tab sis Huab Tais Yes Xus hais tias cia cov me nyuam los cuag nws. Huab Tais Yes Xus tseem qhia kom cov thwj tim ras tias yog lawv xav mus hauv Ntuj lub Ceeb Tsheej, lawv tsum ua zoo li cov me nyuam no.
Kwv tij Hmoob sawv daws, muaj tej zaus peb ua zoo li cov thwj tim nyob hauv zaj nyeem hnub no, peb tsis nco qab txog cov neeg pluag txom nyem los cov neeg sawv daws saib tias tsis muaj tsim dab tsi, peb xav tias Tswv Ntuj tsuas hlub thiab nco txog cov neeg ntseeg, cov neeg nquag mus teev Ntuj xwb, ces peb tsis muab siab rau thiab hlub txog lawv.
Hnub no Huab Tais Yes Xus rov txhib peb kom ua zoo li cov me nyuam yaus; yog kom peb cia siab rau Tswv Ntuj ua tus coj peb, peb ua neeg me muaj lub siab dawb paug rau Tswv Ntuj thiab sawv daws, peb qhib siab dav zoo siab hlo txais txhua yam Tswv Ntuj pub rau peb. Yog peb ua li no, mas Tswv Ntuj yuav pub nws cov txiaj ntsim rau peb ib yam li hnub no Huab Tais Yes Xus tsa tes rau saum cov me nyuam tuaj cuag nws.
Kwv tij, niaj hnub no peb los ntseeg txog Yes Xus, mas peb xav thiab ua tus tib neeg zoo li cas, peb puas ua tus neeg me thiab cia siab rau Tswv Ntuj ib yam li cov me nyuam cia siab rau peb cov ua niam ua txiv? Los peb ua ib tug muab hlob yuam kom Tswv Ntuj tsum pub txhua yam rau peb raws li peb lub siab ntshaw? Niaj hnub nyob hauv peb tsev neeg, lub zos, pawg ntseeg, mas peb puas muab siab rau cov txom nyem vam ntsoov kev pab? Los peb tsuas txawj hwm txawj ntsia pom cov nplua nuj muaj suab muaj npes xwb? Peb yog neeg ntseeg, mas peb puas ua tus choj coj luag lwm tus los ntsib Huab Tais Yes Xus, los peb tsuas muaj tav lawv cia kom txhob tau txais Huab Tais Yes Xus cov txiaj ntsim?
