Mas Tais Ntawv Moo Zoo (MT 19: 16-22)
Tswv Ntuj Lo Lus hnub no yog hais txog tus hluas nplua nuj tuaj nug Huab Tais Yes Xus saib nws yuav ua qhov zoo dab tsi thiaj tau txoj sia nyob mus li. Huab Tais Yes Xus qhia rau nws tias qhov yuav tau txoj sia nyob mus li tsis yog yus ua qhov zoo raws li txoj cai qhia kom ua xwb, yus tsum tso txhua yam tseg kom tau raws Huab Tais Yes Xus thiab.
Thaum Huab Tais Yes Xus hais rau tus hluas nplua nuj tias nws yuav ua raws li cov lus qhia, mas tus hluas hais tias ib txwm nws yeej ua raws nraim li cov lus qhia tib si; nws tsis tua neeg, nws tsis zes luag poj luag sev, nws tsis ua tub sab, nws tsis ua tim khawv cuav dag rau luag tej, nws hwm niam hwm txiv, nws nyiam cov neeg nyob ze nws. Tab sis Huab Tais Yes Xus hais tias tshuav ib yam nws tseem tsis tau ua; yog los raws Huab Tais Yes Xus qab ua Huab Tais Yes Xus thwj tim.
Tus ua Huab Tais Yes Xus thwj tim, nws tsis tas yuav muaj nyiaj ntau thiaj yuav ua tau, nws tsuas muaj siab xwb. Huab Tais Yes Xus thiaj li hais li no “Yog koj xav kom koj zoo tshaj, mas koj rov mus muab txhua txhia yam uas yog koj tug muag, muab pub rau cov pluag, ces koj yuav muaj ib lub cuab tam muaj nqis loj nyob saum ntuj. Ua qhov ntawd tas, mas koj los raws kuv” (MT 19: 21).
Kwv tij Hmoob, nyob hauv Tswv Ntuj Lo Lus hnub no, peb thiaj li pom tias tus xav tau txoj sia nyob mus li, nws tsum ntseeg txog Huab Tais Yes Xus thiab nws tsum ua qhov zoo raws li Tswv Ntuj tau qhia nyob hauv Huab Tais 10 Lo Lus Qhia.
Peb yuav ntseeg Huab Tais Yes Xus tsis tau yog tias peb tseem niaj hnub muab lwm yam saib ua qhov loj thiab tseem ceeb dua Huab Tais Yes Xus. Zoo li tus hluas nplua nuj hauv zaj Ntawv Moo Zoo, nws muab nws lub cuab tam saib hlob, nws muab nws dai rau nyiaj txiag, ces thaum Huab Tais Yes Xus hais kom nws muab nws lub cuab tam muag, mas nws thiaj li tu siab heev.
Huab Tais Yes Xus xav kom peb tsim lub cuab tam nyob saum ntuj ua ntej lub cuab tam nyob ntiaj teb no. Peb yuav tsim lub cuab tam nyob saum ntuj tau li cas?
Huab Tais Yes Xus hais tias “Koj rov mus muab txhua txhia yam uas yog koj tug muag, muab pub rau cov pluag, ces koj yuav muaj ib lub cuab tam muaj nqis loj nyob saum ntuj” (MT 19: 21). Li ntawd, qhov peb yuav tsim lub cuab tam nyob saum ntuj tau thiaj li yog kom peb ‘pub’ yam peb muaj rau tus tsis muaj; yam li nyiaj txiag, zaub mov, txoj kev hlub, lo lus nplij siab, lub sij hawm, thiab ntau ntau yam ntxiv.
Yog peb txawj pub qhov peb muaj rau luag, mas peb thiaj yuav tsis saib qhov peb muaj ntawd ua qhov loj, ces peb thiaj li yuav raws tau Huab Tais Yes Xus, ua Huab Tais Yes Xus thwj tim, ntseeg txog Huab Tais Yes Xus.
Tswv Ntuj nyiam peb tas npaud, nws thiaj yeem muab nws Leej Tub Twm Zeej pub rau peb; yog li peb thiaj yuav zoo siab hlo muab qhov peb muaj pub rau luag tej thiab.
