(2XM 15: 13-14, 16: 5-13; MK 5: 1-20)
Cov neeg yug los nyob hauv lub xeev Nkas Lis Lais lawv teev Tswv Ntuj raws li Mais Xes cov lus qhia. Muaj tej tus neeg teev dab nyob xyaw lawv nyob hauv lub xeev Nkas Lis Lais xws li cov nom tswv thiab cov tub rog Los Mas uas lawv tuaj ntawm pej kum teb tuaj, thiab muaj cov tub lag tub luam hla Nkas Lis Lais teb mus muag toob xib rau cov tswv nkoj cua nquam toob xib hla hiav txwv mus txog lub tuaj tsheej Los Mas. Ua li Huab Tais Yes Xus cov thwj tim niaj hnub pom cov neeg coj ntau txoj kev cai teev ntau yam dab. Tab sis lawv tsis fim cov neeg teev dab, tsis mus nrog lawv noj mov, tsis pw hauv lawv tsev. Lawv xav tias thaum lawv tau nrog ib co neeg teev dab sib tham, lawv rov los tsev lawv yuav yaug tes vim lawv ntshai tsam lawv ki txhaum ntawm cov neeg teev dab.
Huab Tais Yes Xus tsis ntshai fim cov neeg teev dab. Nws nrog lawv tham, nws kho lawv tej tug neeg raug mob, nws mus txog lawv zej zog zaum puav. Huab Tais Yes Xus tsis ntseeg tias yus fim cov teev dab yus yuav ki kev txhaum ntawm lawv. Huab Tais Yes Xus paub tias nws Leej Txiv Tswv Ntuj saib tas ntiaj teb neeg yog nws tsoom tub ki. Huab Tais Yes Xus paub tias Tswv Ntuj tsim sawv daws thiab pov hwm sawv daws.
Huab Tais Yes Xus xav qhia nws cov thwj tim kom lawv txhob ntshai fim cov neeg teev dab, thiab Huab Tais Yes Xus xav ua kom sawv daws pom tseeb kawg tias nws muaj rab peev xwm ntiab cov dab phem nyob hauv cov teb chaws teev dab, ces Huab Tais Yes Xus thiaj coj nws cov thwj tim mus txog Zes Las Xas.
Zes Las Xas teb yog ib rab teb nyob ntawm lub pas dej Nkas Lis Lais sab hnub tuaj, tsuas hla lub pas dej 15 km. tej ces txog.
Cov His Xas Lais tsis yug npua vim Mais Xes txoj cai ib txwm hais tias npua yog ib tus tsiaj tsis huv. Hos cov neeg nyob thaj tsam Zes Las Xas yug npua ntau, lawv ntiav ib co neeg zov lawv tej pab npua nyob ze ntug pas dej uas yog tej thaj av ntxhab. Cov neeg Zes Las Xas kuj muab tej thaj av ntxhab ntawd cia ua toj ntxa. Li ntawd, thaum Huab Tais Yes Xus lawv nqes nkoj, mas cov thwj tim siab txias vim lawv tsuj thaj av tsis huv uas yug npua thiab muaj cov neeg teev dab ntau lub ntxa. Lawv tsis nyiam tsuj tej thaj zoo li ntawd. Huab Tais Yes Xus txhob txwm coj lawv tuaj txog ntawd vim nws xav qhia lawv kom lawv txhob ntshai mus tsham cov teb chaws uas sawv daws teev dab.
Cov His Xas Lais tsis nyiam fim cov teev dab, tab sis Huab Tais Yes Xus saib cov neeg teev dab yuav txais Tswv Ntuj lub Ceeb Tsheej ib yam li cov His Xas Lais; nws lub Moo Zoo yog ib lub Moo Zoo uas Tswv Ntuj xa tuaj rau tas ntiaj teb. Huab Tais Yes Xus xav kom nws cov thwj tim xyaum mus txog cov teb chaws teev dab.
Huab Tais Yes Xus saib cov neeg teev hawm dab zoo li cas?
Huab Tais Yes Xus saib tias cov neeg teev dab, lawv coj tej txoj kev cai uas lawv txais ntawm cov poj yawm txwv koob los. Nyob hauv cov txwj laus txheej thaud muaj tej tus thoob tsib tau qhia cov kev cai uas sawv daws yuav ntseeg thiab yuav coj. Tej kev cai ntawd, ib txhia yog Tswv Ntuj tshoj cov laus, ces cov laus thiaj qhia kom zeej tsooj coj. Hos cov kev cai ib txhia yog cov laus tsim xwb, lawv xav tswv yim tas, ces lawv qhia rau tsoom pej xeem coj. Vim qhov ntawd, cov neeg teev dab lawv txoj kev cai ib nrab yog tuaj ntawm Tswv Ntuj tuaj, ib nrab yog tuaj ntawm neeg tuaj xwb. Hos Huab Tais Yes Xus lub Moo Zoo yog tuaj ntawm Tswv Ntuj tuaj. Tswv Ntuj hlub ntiaj teb neeg, Tswv Ntuj thiaj xa nws Leej Tub tuaj qhia qhov tseeb kom thoob rau cov His Xas Lais thiab rau tas ntiaj teb.
Huab Tais Yes Xus tsis thuam cov txwj laus txoj cai, tab sis nws tuaj kho kev teev dab kom haum Tswv Ntuj lub tswv yim.
Tab sis Huab Tais Yes Xus paub tias cov neeg teev dab kuj muaj ib cov dab phem tuaj ua phem rau neeg. Nyob hauv phau Ntawv Moo Zoo muaj tej zaj qhia tias tej tus neeg raug dab phem tsim txom. Nyem no Huab Tais Yes Xus tuaj txog rab teb teev dab nyob Zes Las Xas. Nws yuav ua ib txog hauj lwm siv hwj huam ntiab ib tug dab phem. Sawv daws thiaj yuav paub tias Huab Tais Yes Xus muaj cai ntiab dab phem nyob hauv cov haiv neeg teev dab.
Sawv daws yuav paub tias Huab Tais Yes Xus lub hwj huam loj tas nrho vim nws ntiab ib pab dab coob muaj zog heev. Peb tsoom Hmoob hnov zaj no thiaj yuav tso siab tias Huab Tais Yes Xus hlub peb thiab tsim nyog peb yuav tso siab rau nws vim tsis muaj ib tug dab yuav tiv tau nws, cov dab txawm muaj zog npaum li cas Huab Tais Yes Xus tseem muaj peev xwm ntiab lawv, lawv paub tias Huab Tais Yes Xus yog Tswv Ntuj Leej Tub.
Tos Huab Tais Yes Xus ntiab cov dab, kuj yog vim nws hlub tus neeg raug dab, nws xav pab kom tus neeg ntawd ua tau lub neej xws luag.
Tas sis lub ntsiab loj uas Huab Tais Yes Xus xav qhia peb, mas yog qhov no; Huab Tais Yes Xus xav qhuab qhia cov neeg ntseeg kom lawv saib kev dim ntawm dab phem yog ib yam muaj nqes dua yus lub cuab tam. Cov neeg nyob Zes Las Xas lawv pom lawv cov npua tuag tas, mas lawv tsis zoo siab rau Huab Tais Yes Xus, tab sis lawv ua tsis tau dab tsi phem rau nws, vim lawv pom Huab Tais Yes Xus lub hwj huam loj.
Lawv tsis txawj pom tias Huab Tais Yes Xus tau kho tus neeg raug dab kom zoo, mas yog ib yam muaj nqes dua ob peb txhiab tus npua. Lawv thov kom Huab Tais Yes Xus txhob nrog lawv nyob. Huab Tais Yes Xus tsis tiv lawv, ces nws txav mus.
Cov neeg ntawd, lawv tsis tau txais Tswv Ntuj ib lub txiaj ntsim ntxiv lawm, vim lawv saib tias lawv cov npua muaj nqes dua Tswv Ntuj cov txiaj ntsim.
Nyob hauv zaj no, Huab Tais Yes Xus xav qhia peb tias Tswv Ntuj cov txiaj ntsim muaj nqes dua ib lub cuab tam loj. Cov neeg tsis ntseeg lo lus no, mas lawv ntiab Huab Tais Yes Xus thiab lawv ntiab Tswv Ntuj Lo Lus tib si. Nyob ntiaj teb no, muaj coob leej tas nrho uas lawv saib nyiaj txiag muaj nqes dua Tswv Ntuj Lo Lus.
