Leej Ntshiab Pob Zeb lub npe qub hu ua ‘Xis Moos’. Yes Xus tau hloov Xis Moos lub npe hu ua ‘Pob Zeb’, los yog ‘Kes Fas’ (Cephas) txhais tias lag zeb.
Pob Zeb yog ib tug neeg ntes ntses nyob hauv lub zos Npes Xais Das. Tab sis tom qab no mas nws tsiv los nyob hauv lub nroog Kas Fas Naus. Leej Ntshiab As Nres uas yog Pob Zeb tus kwv, yog tus qhia Yes Xus rau Pob Zeb tias “Kuv tau ntsib nws lawm, nws yog tus uas Tswv Ntuj tsa nws ua vaj.”
Pob Zeb yog ib tug neeg tsis muab hlob, ces thaum Yes Xus hais kom Pob Zeb pov vas mus ntes ntse, Pob Zeb ntes tau ntses ntau, mas Pob Zeb paub tias Yes Xus yog tus Ntshiab tuaj ntawm Tswv Ntuj tuaj, Pob Zeb thiaj txhos caug ntua pe Yes Xus tias “Huab Tais, koj txav mus deb kuv vim kuv yog ib tug neeg txhaum.”
Tab sis Yes Xus hais rau Pob Zeb tias “Koj txhob ntshai, txij no mus koj yuav puav neeg.” Ces txij hnub ntawd los Pob Zeb thiaj ua ib siab raws Yes Xus mus.
Thaum Pob Zeb thiab cov npawg caij nkoj hla dej ntuj, lawv pom Yes Xus mus taw saum dej ntuj, Pob Zeb thov tsuj dej ntuj mus cuag Yes Xus. Thaum nws mus yuav txog Huab Tais Yes Xus, cua nplawm tuaj, Pob Zeb ntshai ces nws tog rau hauv dej ntuj. Pob Zeb qw kom Yes Xus pab, ces Yes Xus thiaj rub Pob Zeb tawm los.
Muaj ib zaug Yes Xus nug Pob Zeb tias “Koj puas paub kuv yog leej twg?”
Pob Zeb teb tias “Koj yog Leej Pleev, Tswv Ntuj Leej Tub.”
Yes Xus hais tias “Kuv tsa koj ua tus coj hloov kuv chaw, kuv muab tus yawm sij qhib Ntuj lub Ceeb Tsheej rau koj.”
Muaj ib hnub Yes Xus qhia cov thwj tim tias cov Fas Lis Xais thiab cov Txwj Laus yuav muab nws tua, ces Pob Zeb txhawj, nws rub Yes Xus mus rau ib qho, nws cheem tsis pub Yes Xus mus pem Yes Lus Xas Les. Tab sis Yes Xus tsawm Pob Zeb tias qhov Pob Zeb tab tom ua ntawd yog Pob Zeb tab tom ua xis tus ntxias neeg lub siab tsis yog qhov xis Tswv Ntuj siab.
Thaum Yes Xus hais rau cov thwj tim tias lawv yuav tso Yes Xus pov tseg, Pob Zeb hais tias “Tab yog kuv yuav tsum nrog koj tuag, los kuv yuav lees koj.” Yes Xus thiaj hais qhov tseeb rau Pob Zeb tias hmo ntawd Pob Zeb yuav tsis lees Yes Xus txog peb zaug.
Thaum cov peeb zeej tuaj ntes Yes Xus hauv lub vaj Kes Ntxes Mas Nis, Pob Zeb rho nws rab ntaj los txiav tus Tuam Leej Choj ib tug tub txib yav pob ntseg, Yes Xus thiaj cheem Pob Zeb tias “Koj rov ntxig ntaj rau hauv hnab, vim tias cov xuas ntaj tua luag, nws kuj yuav raug ntaj tua tuag thiab.”
Lawv ntes Yes Xus mus tom tus Tuam Leej Choj Kais Fas tsev, mas Pob Zeb soj qab raws mus. Pob Zeb nrog cov tub txib zaum nte taws, ces ib tug ntxhais txib hais rau Pob Zeb tias Pob Zeb yog Yes Xus cov thwj tim, tab sis Pob Zeb tsis lees, nws hais tias “Kuv tsis paub koj hais dab tsi.” Tseem muaj ib tug rov hais dua, Pob Zeb kuj tsis kam lees, nws rov hais rau lawv tias “Kuv tsis paub tus neeg ntawd.”
Rov qab muaj dua lwm tus txav los ze Pob Zeb thiab hais tias Pob Zeb yog Yes Xus cov thwj tim tiag, Pob Zeb rov teb tias “Kuv tsis paub tus neeg ntawd.”
Pob Zeb tsis lees paub Yes Xus 3 zaug, ces qaib txawm qua, Pob Zeb thiaj ras tau tias Yes Xus twb xub qhia nws tias nws yuav tsis lees Yes Xus 3 zaug. Pob Zeb tu siab, nws tawm mus quaj sab nraud.
Pob Zeb tu siab rau nws qhov txhaum, ces thaum Mab Liab Mas Ntas Las los hais qhia cov thwj tim tias Yes Xus sawv rov los lawm. Pob Zeb thiaj maj zeeg khiav mus tom lub qhov ntxa. Pob Zeb xav mus thov txim ntawm Yes Xus, tab sis nws tsis pom Yes Xus.
Tom qab Yes Xus tawm tuaj xyuas cov thwj tim tas, muaj ib hnub Pob Zeb thiab cov npawg lawv mus puav ntses hauv dej ntuj Tis Npes Lias, ces Yes Xus rov tawm tuaj xyuas lawv. Yes Xus nug Pob Zeb txog 3 lwm tias nws puas nyiam Yes Xus tiag. Peb Zeb teb 3 lwm tias “Huab Tais, koj paub tias kuv nyiam koj tiag.” Ces Yes Xus thiaj txib kom Pob Zeb zov Yes Xus cov yaj nyob hauv ntiaj teb, Yes Xus hais tias “Koj coj kuv cov yaj mus noj zaub mog.”
Yog li ntawd, thaum lawv txais Leej Ntuj Plig Ntshiab tas, Pob Zeb thiab cov thwj tim thiaj tawm mus tshaj lub Moo Zoo. Pob Zeb mus tsim lub Koom Txoos nyob As Nthias Kias thiab lub Koom Txoos nyob Los Mas.
Xyoo 66 Pob Zeb raug ntes coj mus tua nyob saum ntoo cuam nyob hauv lub tsheej Los Mas. Pob Zeb thov kom muab nws ko taw tsa saum ntuj, muab nws taub hau tig lawm hauv av. Nws hais tias nws tsis tsim nyog tuag xws li Yes Xus uas yog nws tus xib hwb.
Vim Leej Ntshiab Pob Zeb yog thawj tus Tswv Qhia nyob Los Mas thiab nws tseem yog thawj tus Vaj Qhia hauv lub Koom Txoos thiab, ces lub Koom Txoos thiaj muab hnub tim 22 lub 2 hlis ua hnub ua hmoov Leej Ntshiab Pob Zeb tus coj Yes Xus pab yaj (Chair of St. Peter). Lub keeb yog li no: Ib txwm los cov neeg Los Mas muaj ib txoj kab ke hwm tus tuag: thaum lawv noj mov tom toj ntxas mas lawv yuav tshwj ib lub tog zaum cia ua piv txwv tias tus tuag los nrog lawv noj pluas mov ua ke.
Tiam 4 cov neeg ntseeg txais txoj kab ke no los siv, lawv hais tias yog cia nco txog Leej Ntshiab Pob Zeb lub tog zaum ua Vaj Qhia.
Lub ntsiab tiag hauv cov ua Ntuj kev cai txoj kab ke no yog nco tias Yes Xus tau tsa Leej Ntshiab Pob Zeb ua tus ‘Tswv Zov Yaj’, Leej Ntshiab Pob Zeb yog tus tuav Ntuj Ceeb Tsheej tus yawm sij nyob hauv ntiaj teb no, yog tus tau lus tso cai ntawm Yes Xus kom tswj lub Koom Txoos, mas Leej Ntshiab Pob Zeb lub tog zaum ua Vaj Qhia thiaj yog sawv cev tsoom Vaj Qhia chaw tiam dhau tiam. Cov ntseeg txog Yes Xus sib koom ua ib tug nyob hauv lub Koom Txoos tau mas vim muaj tsoom Vaj Qhia ua tus taw ntsa.
Thaum cov ntseeg nco txog Leej Ntshiab Pob Zeb lub tog zaum ua Vaj Qhia, mas lawv thiaj ras tau tias Vaj Qhia yog tus nres lub Koom Txoos, sawv daws tsum hwm Vaj Qhia ua sawv daws tus coj, sawv daws tsum mloog Vaj Qhia cov lus ntuas. Yog Vaj Qhia zeem tseeb txog nqe lus ntseeg twg mas cov ntseeg yuav coj raws li Vaj Qhia tau tshaj tawm.
Leej Ntshiab Paj Lug, nws lub qub npe hu ua ‘Xauv’, yog hu raws li xeem lus Hes Nplaws. Nws yug los ze ntawm xyoo tim 5 los 10 lawv Yes Xus qab nyob Tas Xis, Tws Kis qab teb.
Nws niam thiab txiv kub siab coj Mais Xes txoj cai. Xauv tsev neeg nplua nuj hauj sim. Lawv xa nws mus kawm txuj nyob hauv cov tsev qhia cov txuj txheej siab nyob Tas Xis. Xauv thiaj paub lus Hes Las zoo, thiab paub cov txuj Hes Las zoo.
Thaum Xauv tseem hluas, nws txiv xa nws mus kawm Mais Xes txoj cai nyob Yes Lus Xas Les. Xauv thawj tug Xib Hwb yog Nkas Mas Lias.
Yog xyoo 30 ces Xauv tuaj kawm nyob Yes Lus Xas Les. Xauv ntseeg Mais Xes txoj cai ti txha, thaum Xauv hnov hais tias ib cov neeg nyob Yes Lus Xas Les pib teev Yes Xus thiab saib Yes Xus yog Tswv Ntuj Leej Tub, mas Xauv xav tias cov neeg ntawd ua txhaum thuam Mais Xes txoj cai, lawv thuam His Xas Lais txoj kev ntseeg. Xauv pab cov nom Yus Das muab cov neeg teev Yes Xus tua.
Xauv hnov hais tias muaj ib co neeg teev Yes Xus tsiv mus nyob hauv lub nroog Das Mas, nyob Xis Lias teb, mas Xauv thov kom cov nom Yus Das xa nws mus ntes cov neeg teev Yes Xus nyob Das Mas. Thaum nws tab tom mus rau lub nroog Das Mas, Yes Xus tau yees tawm los rau nws pom xyeem, yam li ua kom muaj ib qho ci dawb vog saum ntuj tuaj nyob ncig nws. Nws poob saum nees rau pem teb, nws hnov ib lub suab hais rau nws tias “Xauv, Xauv, tim li cas koj hiam kuv?”
Xauv thiaj nug tias “Koj xav kom kuv ua dab tsi?”
Lub suab ntawd hais tias “Koj sawv, koj mus hauv nroog. Yuav muaj neeg qhia koj tias yuav ua dab tsi.”
Lub sij hawm ntawd Xauv qhov muag tsis pom kev, lawv tuav Xauv tes coj nws mus hauv nroog Das Mas. Nws nyob 3 hnub, tsis pom kev. Tom qab 3 hnub, nws thiaj tau ntsib ib tug txiv neej hu ua As Nas Nias. As Nas Nias hais rau Xauv tias “Huab Tais kom kuv tuaj ntsib koj.”
Ces Xauv qhov muag rov qab pom kev, thiab Leej Ntuj Plig Ntshiab tuaj nyob puv hauv nws, ces nws hloov siab thiab txais lub Cim Ntxuav.
Muaj ib hnub Npas Nas Npes thiab Xauv mus tshaj Ntuj Lus thawj zaug rau cov pej kum neeg nyob Kws Plos. Ib tug nom Los Mas hu ua Paj Lug txais lub Cim Ntxuav, ces Xauv thiaj hloov nws lub npe tshiab hu ua ‘Paj Lug’.
Paj Lug yog ib tug neeg muaj lub siab kub lug thiab nws tshaj Ntuj Lus mus txhua txhia qhov chaw, ces nws thiaj txhim cov Koom Txoos nyob hauv As Xias Me. Paj Lug thiaj tau lub npe tias tus Hauv Paus Xa Lus rau cov pej kum neeg (Apostle to the Gentiles).
Paj Lug tau sau cov tsab ntawv ntau tshaj mus ntuas cov neeg ntseeg xws li cov ntseeg hauv Los Mas, Kos Lis Nthos, Nkas Las Tias, Es Fes Xos, Fis Lis Pos, Kos Los Xais, Tes Xas Los Nis.
Paj Lug raug cov Yus Das ntes ces nws thov kom lawv xa nws mus txiav txim tim Los Mas. Cov nom Los Mas kav Yus Das teb thiaj xa Paj Lug mus txog Los Mas, lawv muab nws kaw hauv ib lub tsev, ces xyoo 65 Paj Lug thiaj raug txiav caj dab tuag ua tim khawv.
Lub Koom Txoos xaiv hnub tim 25 lub 1 hlis los ua hmoov cav txog Paj Lug yuav siab tshiab (Conversion of Paul the Apostle).