Xyoo 2000 Vaj Qhia Zam Paj Lug 2 tsa 87 tus neeg ntseeg haiv neeg Suav thiab 33 tus tub tshaj Ntuj Lus Aws Los Pas raug tua tuag ua tim khawv nyob Suav teb hauv xyoo 1814 txog xyoo 1900 ua lub Koom Txoos cov Leej Ntshiab. Lawv 120 tus neeg no muaj 6 tus yog Tswv Qhia, 23 tus yog Leej Choj, 18 tus tub kawm ua Leej Choj, 7 tus Leej Phauj, 36 tus Xib Hwb, 29 tus poj ntsuam, 2 tus tab tom kawm Ntuj kev cai, thiab 9 tus yog me nyuam yaus. Tus mos tshaj mas muaj 9 xyoos, tus laus muaj 72 xyoos. Muaj ib tug hauv pab no yog Txiv Plig Tsaus Zoov.
Thaum Tsaus Zoov muaj 20 xyoo, nws tau mus ua tub rog. Xyoo 1785 nws nrog ib pab tub rog zov cov neeg ntseeg nyob hauv tsev loj faj. Nyob hauv lub tsev loj faj ntawd muaj ib tug Txiv Plig hu ua Txiv Plig Mas Tis Nus Mos. Niaj hnub nws tshaj Ntuj Lus rau cov neeg ntseeg uas nrog nws nyob hauv tsev loj faj.
Niaj hnub Tsaus Zoov pom tias Txiv Plig Mas Tis Nus Mos kub siab teev Tswv Ntuj, ces Tsaus Zoov kuj zoo siab mloog Txiv Plig Mas Tis Nus Mos tshaj Ntuj Lus. Nws nyiam tej lus uas Txiv Plig Mas Tis Nus Mos hais kawg. Ob peb lub hlis tom qab, Txiv Plig Mas Tis Nus Mos rov mus tsev, ces Tsaus Zoov txiav siab tsis ua tub rog ntxiv, nws mus nrog Txiv Plig Mas Tis Nus Mos nyob.
Thaum Tsaus Zoov hnub nyoog 30 xyoo, nws txais lub Cim Ntxuav thiab lub Cim Txhab Zog. Thaum nws txais lub Cim Ntxuav mas nws xaiv Leej Ntshiab Aus Nkus Tis Nus los ua tus Leej Ntshiab pov hwm. Tom qab ntawd Tsaus Zoov kuj kawm ntau yam txuj nyob hauv fab kev ntseeg ntxiv. Nws kuj kawm xeem lus Las Tis Nas. Nyob hauv thaj tsam ntawd muaj tej pab neeg tshaib tshaib plab, ces Tsaus Zoov pub mov rau lawv noj. Nws ua tim khawv piav txoj kev hloov siab tshiab ua neeg ntseeg. Tsis ntev ces Tsaus Zoov txais lub Cim Tiag Tes ua Leej Choj.
Txhua zaus Txiv Plig Tsaus Zoov mus xyuas ib pab neeg ntseeg, mas nws kom tsoom ntseeg tuaj sib sau siab 3 hnub nyob ua ke. Nws siv ib lub caij ntev loo los ua lub Cim Daws Txhaum rau cov ntseeg ib tug zuj zus. Nws ua tej Thaj Txi Ntuj los pab cov ntseeg.
Xyoo 1815 muaj ib pab tub rog tuaj ntes Txiv Plig Tsaus Zoov thiab coj nws mus cuag lub rooj txiav txim nyob hauv lub nroog Tshees Tus. Tus nom txiav txim hais tej lo lus thuam kev ntseeg, ces cov tub ceev xwm muab tej ya xyoob los ntaus Txiv Plig Tsaus Zoov lub pob tw 60 zaus. Lawv muab nws tsim txom ntau yam thiab lawv coj Txiv Plig Tsaus Zoov rov mus kaw nyob hauv tsev loj faj.
Hnub tim 27 lub 1 hlis xyoo 1815 Txiv Plig Tsaus Zoov tas sim neej. Thaum ntawd nws hnub nyoog muaj 69 xyoos.