Vaj Qhia Les Os 14 ntuas cov neeg ntseeg tias tsis yog lawv yuav qee nyiaj txiag pub rau lwm tus xwb, lawv tsum yuav tau qee lub sij hawm (time), kev nyob rau ntawd (presence), thiab kev nkag siab lwm tus (emphathy) nrog rau thiab.
Hnub tim 10 lub 8 hli 2025 Vaj Qhia Les Os 14 coj sawv daws hais zaj tus Tshiab xa xov nyob ntawm Leej Ntshiab Pob Zeb lub tshav puam. Vaj Qhia muab lub Moo Zoo zaj Huab Tais Yes Xus qhia txog neeg lub cuab tam nyob qhov twg, neeg lub siab kuj yuav nyob qhov ntawd (LK 12: 32-48) coj los nthuav ntuas sawv daws.
Nyob hauv zaj lus hauv Ntawv Moo Zoo, Huab Tais Yes Xus hais tias “Muab nej lub cuab tam muag, nej muab pub rau cov pluag.” Lo lus no muaj lub ntsiab lus tob vim tias tsis yog kom pub tej toob xib qhov muag pom tau rau lwm tus xwb, tab sis yog kom peb muab peb lub laj lim (ability), peb lub sij hawm, peb lub siab nyiam siab hlub (affection), peb kev nyob rau ntawd, thiab peb kev nkag siab lwm tus; coj los qee pab sawv daws thiab. Muab hais tau tias tag nrho txhua yam pab kom peb tsheej tau ib tug neeg zoo, mas peb yuav tau muab siv kom hlob loj thiab tawg paj, tsis li ntawd mas txhua yam Tswv Ntuj pub rau peb yuav tsuag mus thiab tsis muaj qab hau ntxiv.
Cov hauj lwm khuv leej neeg yog lub txhab ceev nyiaj tsis muaj tub sab tuaj nyiag tau, thiab tseem yog lub txhab ceev nyiaj ntxeev tau paj tau tshaj thiab. Lub txhab ceev nyiaj no peb muaj peev xwm tso siab tau (entrust) tias peb cov cuab tam yuav nyob ruaj (existence) vim Ntawv Moo Zoo qhia peb tias nyob hauv lub txhab ceev nyiaj no, tus poj ntsuam muaj ob lub txiaj toog me me xwb, los nws yuav txia ua tus nplua nuj tshaj nyob hauv lub qab ntuj (MK 12: 41-44). Leej Ntshiab Aus Nkus kuj tau hais tseg tias “Yam koj pub rau luag yuav hloov ua txoj sia nyob mus li rov los roos koj.”
Vaj Qhia xav kom sawv daws pom tseeb txog nqe lus no mas Vaj Qhia thiaj muab piv rau leej niam puag nws cov me nyuam, los ob tug hluas sib hlub nkawd sib khawg hais tias thaum ntawd lawv yuav hnov zoo li lawv yog tus neeg muaj tshaj sawv daws hauv lub qab ntuj no.
Nyob hauv lub Moo Zoo hnub no, Huab Tais Yes Xus tseem hais ntxiv txog ‘kev npaj kom txhij’ (vigilance) thiab, ces Vaj Qhia thiaj hais tias tab txawm peb nyob rau rooj teb twg, los qhov chaw twg, peb yuav ua tiag kom tsis txhob plam lub cib fim ua cov hauj lwm nyiam luag tej. Qhov no yog kev npaj kom txhij raws li Huab Tais Yes Xus hais qhia; kom peb txhim kho peb tus cwj pwm muab siab rau (habit of being attentive), tos ntsoov (ready), thiab ua siab nyias ntsais (sensitive) rau lwm tus ib yam li Huab Tais Yes Xus tau ua rau peb.