Lub npe ‘Leej Niam Saw Mab Liab’ yog lub npe uas lub Koom Txoos muab tsa los hwm niam Mab Liab vim nws yog tus niam txhawb kev hais saw Mab Liab.
Raws li keeb kwm hais tseg: Xyoo 1214 Dos Mis Nis (St. Dominic of Osma) mus tshaj Ntuj Lus rau cov coj kev cai As Npis Ntses Xias (Albigensians) nyob Fab Kis teb, mas lawv tsis lees txais Ntuj Lus. Ua rau Dos Mis Nis qaug zog. Dos Mis Nis tau thov Ntuj txog 40 hnub, ces nws pom niam Mab Liab nrog 3 tus Tshiab nqes saum ntuj los nrhiav nws. Niam Mab Liab hais rau Dos Mis Nis tias “Dos Mis Nis! Koj puas paub tias Huab Tais Peb Leeg tau muab rab cuab yeej twg ua twj coj cov neeg phem hloov siab tshiab?”
Dos Mis Nis teb tias “Ab! Leej Niad, koj yog tus paub zoo dua kuv, rau qhov tias dhau ntawm Huab Tais Yes Xus lawd, tsuas yog koj xwb thiaj yog peb txoj kev cawm.”
Niam Mab Liab hais ntxiv tias “Yog koj muaj lub siab xav kom cov neeg ua txhaum hnyav rau Ntuj ntawd, lawv hloov siab tshiab, mas koj yuav hais txoj saw no raws li kuv yuav qhia rau koj.”
Hais tas ces niam Mab Liab muab tau ib txoj saw rau Dos Mis Nis thiab qhia Txiv Plig hais txoj saw ntawd.
Niam Mab Liab hais kom Dos Mis Nis muab txoj sawv Mab Liab los hais thov Ntuj rau cov neeg ua kev cai As Npis Ntses Xias.
Dos Mis Nis thiaj mus qhia cov neeg hauv zej zos hais txoj saw Mab Liab raws li niam Mab Liab qhia ces tau tsiv ntev cov As Npis Ntses Xias thiaj tig los ntseeg txog Yes Xus. Yog vim li no, kev hais saw Mab Liab thiaj ri mus thoob xib fab.
Txog tiam 16, cov ntseeg hauv Los Mas sawv ntaus rog nrog lub kuj cuab Os Tos Mas (Ottoman). Vaj Qhia Pis Yus Tsib (Pope Pius V) tau hais kom cov ua Ntuj kev cai sib koom siab hais txoj saw Mab Liab thov Tswv Ntuj pab, ces hnub tim 7 lub 10 hli xyoo 1571 cov ua Ntuj kev cai hauv Los Mas yeej lub kuj cuab Os Tos Mas. Vaj Qhia Pis Yus Tsib thiaj tsa hnub chiv hauv thawj lis piam lub 10 hli ua hmoov Leej Niam Tus Muaj Yeej (the feast of Our Lady of Victory).
Xyoo 1573, Vaj Qhia Nqes Nkos Lis Kaum Peb (Pope Gregory XIII) thiaj hloov lub npe ‘Leej Niam Tus Muaj Yeej’ los hu tias ‘Leej Niam Saw Mab Liab’. Xyoo 1913 Vaj Qhia Pis Yus Kaum (Pope Pius X) tshwj hnub tim 7 lub 10 hli ua hnub nco txog Leej Niam Saw Mab Liab los txog niaj hnub no.