8. Koj yuav hwm koj niam koj txiv thiab koj yuav hwm lwm tus
Txuas no mus kuv yuav tham txog kuv lub neej tsis hwm niam thiab txiv pub rau nej mloog. Kuv txaj muag rau nkawd kawg nkaus; kuv tsis hais lus zoo rau nkawd thiab tsis kam lees nkawd vim tias nkawd yog neeg pluag tsis nplua nuj thiab nkawd pub tsis tau raws li kuv ntshaw. Kuv yog ib tug me nyuam tsis hwm niam txiv thiab tsis paub ris nkawd lub txiaj ntsig tiag tiag li. Muaj ib zaug kuv tau hais tias ‘koj tsis yog kuv niam.’
Kuv xav tias kuv coj Tswv Ntuj Lo Lus nqe 4 no tau zoo hauj sim, vim tias thaum nkawd muaj mob mas kuv rho nyiaj los pab kho nkawd ntau kawg li, tab sis tseeb tiag mas cov nyiaj ntawd yog kuv tus txiv li xwb. Kuv tseem muaj ntsej muag hais tias ‘saib mas! Ob tug laus tsis tseg cuab tam cia rau peb li, tsuas yog peb cov ua me nyuam tau tag nyiaj txiag los kho nkawd xwb. Kuv tej phooj ywg lawv niam lawv txiv mas ua cas lawv tuag lawm los, lawv tseem tseg tau ib pob cia rau lawv. Lawv mas zoo dua kuv niam kuv txiv tiag tiag.’
Ces Huab Tais Yes Xus ua kom kuv pom tias yav tas los kuv saib nyiaj txiag ua qhov loj, kuv muab nyiaj los txiav txim rau kuv niam thiab kuv txiv. Thaum kuv muaj nyiaj muaj npe mas kuv lub siab tseem dag qees rau nkawd, kuv tsuas nrhiav txiaj ntsim ntawm nkawd xwb.
Kuv muaj nyiaj, ces kuv saib kuv mas niam yog Tswv Ntuj lawm tiag, kuv pib saib tsis taus kuv niam kuv txiv.
Nej puas paub tias thaum kuv rov pom nkawd mas yam twg ua rau kuv tu siab tshaj?
Yog kuv pom kuv txiv tab tom quaj rau kuv. Kuv txiv yog leej txiv zoo, nws qhia kom kuv txawj hauj lwm, txawj ua siab loj tawm tsam kuv lub neej, txawj nkag mus koom nrog luag lwm tus, txawj kub siab ua kuv tej hauj lwm kom tiav. Tab sis kuv tsis nco qab tej yam nws qhuab ntuas kuv no, tshwj xeeb mas yog kuv txiv yuav tau ua tus piv txwv rau kuv yoog, ua tim khawv txog Tswv Ntuj rau kuv pom; tab sis nws tu siab tias vim yog nws ua tsis tau mas kuv thiaj ua niag neeg phem zoo li no, kuv thiaj tab tom raug txom nyem yuav mus rau dab phem teb; ces kuv txiv tu siab rau nws tus kheej. Kuv txiv nyiam nyiam hais rau kuv niam tias ‘kuv mas thiaj yog txiv neej yawg, vim muaj coob tus poj niam mas xav nrog kuv ua neej’, thiab kuv txiv nyiam haus dej hauv cawv. Txawm li ntawd, los kuv txiv kuj tseem yog ib tug neeg zoo hauj sim thiab.
Thaum kuv tseem me me, muaj ib hnub kuv txiv hais txog lwm tus poj niam rau kuv niam mloog thiab hais lus saib tsis taus kuv niam. Kuv pom kuv niam nyob ntsiag to tsis cav, nws quaj quaj tu siab xwb, ces kuv npau taws rau kuv txiv, kuv khaws qhov npau taws no ua kev chim siab. Loj tuaj kuv thiaj hais rau kuv niam tias ‘niad! Kuv yuav tsis ua niag neeg zoo li koj, koj ua rau peb cov poj niam poob tsim tas, koj ua rau tej txiv neej saib peb cov poj niam tsis muaj nqes. Koj puas paub tias tos peb cov poj niam zoo li ntawd vim tim koj xwb los mas.’
Kuv tau hais rau kuv txiav tias ‘txiv! Koj mloog zoo zoo nawb, kuv yuav tsis pub ib tug txiv neej twg los ua rau kuv li koj tau ua rau kuv niam. Muaj hnub twg cov txiv neej ua siab tsis ncaj rau kuv, mas kuv yuav tsis yeem rau lawv li ntag, lawv ua li cas rau kuv mas kuv yuav ua pauj rau lawv kiag, kom lawv paub tias peb poj niam kuj heev txaus thiab.’
Ces kuv txiv nthe hlo rau kuv tias ‘koj yuav khav tas npaud na niag me nyuam tsaub!’
Thaum ntawd mas kuv tsis paub tias ua cas kuv txiv thiaj cem kuv li ntawd, ces kuv thiaj hais rau kuv txiv tias ‘ua li, koj yuav ntaus kuv lod. Tab sis muaj ib hnub twg kuv yuav txiv thiab nws dag kuv mas kuv yuav tsis yeem nws li ntag. Kuv yuav ua kiag kom nws pom tias thaum lawv ua rau peb cov poj niam mas peb mob siab npaum cas!’
Kuv khaws tej kev npau taws thiab chim siab no cia nrog kuv lub neej, ces kuv pib ua neeg tawv ncauj, kuv pib pom zoo nrog lub tswv yim cia rau poj niam ntaus cev rho me nyuam hauv plab, kuv pom zoo cia poj niam nrauj txiv. Kuv pib tawm tswv yim rau cov poj niam kuv paub kom lawv txhob zwm rau lawv tej txiv neej. Ntawm kuv mas kuv tsis tau ua li hais, tab sis kuv cov lus tau pab kom coob leej ua li ntawd tiag.
Thaum kuv pib muaj, kuv hais rau kuv niam tias ‘niam, koj kav tsij nrauj kuv txiv mas! Koj yuav ua cas ua neej nrog tej txiv neej phem thiab tsis tsim txiaj li kuv txiv mus txog thaum twg nas! Koj yuav tsum paub tiv thaiv koj lub meej mom mas kuv niam!’
Txawm kuv txiv yuav phem phem li kuv hais, tab sis kuv kuj hlub nws.
Qhov no mas vim kuv niam lub siab zoo, tsis muaj ib zaug uas nws yuav txw kom peb cov ua me nyuam ntxub peb txiv los ntxub lwm tus.
Nej xav mas! Kuv niam zoo tas npauv tab sis kuv mas niaj hnub txw kom nkawd sib nrauj xwb. Kuv hais tsawg zaus los kuv niam tsuas teb tias nws yuav tsis ua li kuv hais.
Kuv niam ntxhov siab thiab nyob txom nyem li ntawd tiag, tab sis nws yeem nrog kuv txiv nyob kom peb cov ua me nyuam tau nyob sov so, tau lub npe tias tsis yog me nyuam ntsuag txiv, thiab kuv niam hais ib lo tias ‘yog niam thiab txiv sib nrauj lawm, puas yuav muaj leej twg thov Ntuj pub rau koj txiv mas? Tsuas muaj niam xwb thiaj thov Tswv Ntuj pab koj txiv kom txhob poob mus rau dab phem teb. Niam tej kev txom nyem, tej kua muag iab mas niam twb muab cev ua cov txim koom nrog Huab Tais Yes Xus kev txom nyem nyob saum tus Ntoo Cuam tas lawm. Niaj lis piam niam mus txog tom tsev teev Ntuj mas niam twb txhos caug thov Ntuj tias ‘Huab Tais Yes Xus, kuv thov cev kuv tej kev iab siab thiab kev txom nyem hauv kuv lub cuab rau koj, kuv thov nrog koj ris koj txoj kev txom nyem ua ke, kom xwv kuv tus txiv thiab kuv cov me nyuam tau kev cawm ntawm koj.’ Niam twb tau cev nej txiv rau hauv Huab Tais Yes Xus txhais tes lawm, thaum twg dab phem tuaj rub koj txiv kom mus rau txoj kev txhaum mas niam twb hais saw Mab Liab pab koj txiv kom rov los raws Tswv Ntuj txoj kev, niam rub koj txiv los sawv ntawm lub thaj txi Ntuj thiab niam hais tias ‘Huab Tais Yes Xus, kuv tus txiv nrog kuv nyob ntawm no, kuv tso siab tias koj yuav tsis rho kuv txoj pa mus, yog kuv tsis tau pom kuv tus txiv hloov siab tshiab. Huab Tais Yes Xus, tsis yog kuv thov koj rau kuv tus txiv xwb, kuv tseem thov koj rau cov poj niam ntsib kev txom nyem xws li kuv thiab, tshwj xeeb mas yog cov poj niam, lawv tsis tau txhos caug thov koj, tab sis lawv muaj lub siab xib mus rau kev ua dab saib yaig, lawv tab tom coj lawv lub cuab mus tso hauv dab phem txhais tes. Kuv tus Huab Tais Yes Xus, kuv thov koj rau lawv thiab lawv tsev neeg sawv daws, thov koj pab lawv thiab mog!’
Kuv niam niaj lis piam thov Ntuj zoo li ntawd, ces 8 lub xyoo ua ntej kuv txiv yuav tso ntiaj teb no tseg, nws hloov siab tshiab, nws tu siab rau nws tej txhaum thiab nws thov kom Tswv Ntuj zam rau nws. Huab Tais Yes Xus zam txhaum rau kuv txiv lawm tiag, kuv txiv thiaj tau lub txim nyob hauv cov hluav taws tob tshaj plaws thiab kub tshaj plaws, kom tau hlawv kuv txiv tus ntsuj tus plig kom ntshiab txaus mus nyob pem Ntuj Ceeb Tsheej.
Kev them txim yog yam peb tsis tshua ras txog pes tsawg, peb tsis tshua nco txog. Huab Tais Yes Xus pub lub txiaj ntsim rau peb tau them txim nyob hauv lub Cim Yug; txhua hnub peb mus koom thaj txi Ntuj, mas Tswv Ntuj yuav cia peb pom lub neej tom qab peb tso ntiaj teb tseg, peb cov txhaum, peb tej kev phem, peb cov lus tsis zoo. Yog peb pom yam txaus ntshai hauv kev them txim txhaum mas peb yuav quaj tu siab kawg nkaus.
Muaj ib zaug, kuv niam hais kom kuv txiv pab ntuas kuv tus nus kom tso tseg lub neej ntsaub hauv txoj kev txhaum pov tseg, vim tias nws tab tom taug kuv txiv tus hneev taw. Yog kuv txiv yeem ua raws li kuv niam hais, mas yuav yog ib yam zoo tshaj uas kuv txiv yuav tau ua cov hauj lwm los them nws cov txhaum, tab sis kuv txiv tsis kam, nws tsuas hais tias ‘cov me nyuam lawv tej kev lom zem xwb mas, lawv ua ua mus ces txog thaum txawj xav mas lawv yeej yuav txawj hloov siab tshiab xwb.’ Kuv txiv ua tus qauv rau kuv tus nus yoog raws, nws tsis tau pab kuv tus nus kom tsheej neeg li, ces nyob hauv cov hluav taws hauv teb chaws them txim, kuv txiv ke quaj ke hais tias ‘kuv tau txais kev cawm vim tus poj niam uas yog kuv tus tav, nws tau thov Ntuj rau kuv txog 38 xyoo, mas kuv ua koj tsaug, Tswv Ntuj!’