Tus sau: TP. Txhiaj Foom & LTH. Lauj Vam Thaiv (2005/2010)
1) Nej yuav tau hla lub hav suab puam
tiam sis nej yuav tsis tuag dej.
Txawm tias nej yuav tsis paub xub ke
los nej yuav tsis raug xwv txheej.
Nej hais nej cov lus rau lwm haiv
neeg luag yeej yuav to taub nej.
Nej yuav pom Tswv Ntuj thiab muaj sia nyob.
(Txais) Nej tsis txhob ntshai,
kuv ua nej ntej coj nej kev.
Tuaj raws kuv mog.
Kuv yuav nrhiav chaw nej so.
2) Txawm nej hla cov dej nphau npog
hauv hiav txwv nej yuav tsis tog.
Txawm nej hla nruab nrab hauv nplaim taws
nej yuav tsis kub hnyiab.
Txawm dab phem lub hwj huam sawv tawm
tsam thiab kev tuag nyob ib sab.
Nej nco tias kuv nrog nej tiv txhua yam. (Txais)
3) Cov pluag tau hmoov zoo,
Ntuj lub Ceeb Tsheej yog lawv tug.
Cov neeg quaj ntsuag tau hmoov zoo,
muaj ib hnub lawv yuav luag.
Txawm yog muaj cov neeg phem thuam thiab
ntxub nej vim yog nej nrog kuv.
Nej yuav tau txoj hmoov zoo. (Txais)