HWM MAB LIAB YOG TSWV NTUJ LEEJ NIAM (LK 2: 16-21)
Hnub no peb cov neeg ntseeg hauv lub Koom Txoos Kav Tos Liv thiab Os Thos Dos saib hnub no yog hnub hwm Mab Lab yog Tswv Ntuj leej niam.
Hnub no yog hnub ‘hwm’ mas lub Koom Txoos thiaj xaiv 3 zaj lus los rau peb tau nyeem ua ke.
Zaj 1 nyob hauv phau ntawv Xam Phaj (XP 6: 22-27); yog Huab Tais Tswv Ntuj qhia As Loos thiab nws cov tub tias lawv yuav foom hmoov zoo rau cov His Xas Lais li cas, mas lawv thiaj yuav tau txais Tswv Ntuj txoj koob hmoov.
As Loos thiab nws cov tub, lawv yuav yog cov Leej Choj leg txoj hauj lwm tsob hwb Tswv Ntuj nyob hauv lub Tsev Tsam Phooj yam li niaj hnub no peb pom cov Txiv Plig lawv tuav cov hauj lwm txi Ntuj nyob hauv lub Txoos.
Zaj 2 cov lus tus Hauv Paus Xa Lus sau ntuas cov ntseeg nyob Nkas Las Tias thaum lawv tig los ntseeg txog Yes Xus lawm, lawv txia ntshis ua Tswv Ntuj cov me nyuam lawm tiag, ces nyem no lawv muaj cai txais Tswv Ntuj lub cuab tam xws li cov Yus Das lawm (NLT 4: 4-7).
Zaj 3 yog lub Moo Zoo raws li Lus Kas phau ntawv (LK 2: 16-21). Lus Kas piav txog thaum Tswv Ntuj tus Tshiab tawm tuaj qhia cov zov yaj nyob nruab liaj tias hmo no tus Huab Tais Cawm Seej yug los nyob hauv lub zos Npes Les Hes. Cov zov yaj hnov li ntawd lawv thiaj tuaj xyuas saib puas muaj li tus Tshiab qhia rau lawv. Lawv tuaj pom muaj tseeb li tus Tshiab cov lus, ces lawv tham tej no tawm los. Mab Liab mloog twj ywm thiab khaws lawv cov lus cia nruab siab mus txog hnub Lus Kas yuav sau nws phau ntawv Moo Zoo, ces Lus Kas maj mam tshuaj cov xwm hais txog Yes Xus. Lus Kas nug Mab Liab, mas Mab Liab mam qhia tej ntawd rau Lus Kas paub.
Peb zaj nyeem no puav leej muaj tib lub ntsiab yog ‘kev zoo siab’. Zoo siab tias Huab Tais Tswv Ntuj foom koob hmoov rau Tswv Ntuj haiv neeg. Zoo siab tias yog vim Huab Tais Yes Xus, mas peb thiaj tau ua Tswv Ntuj cov me nyuam. Zoo siab tias tus nkauj ntshiab Mab Liab tau yug Tswv Ntuj Leej Tub, ces txij hnub ntawd los Mab Liab yog Tswv Ntuj leej niam thiab yog peb sawv daws niam.
Muaj ib txhia xav tias Mab Liab yog tib neeg, nws yuav ua Tswv Ntuj leej niam tau li cas. Yog tias Mab Liab yog Tswv Ntuj leej niam, mas Mab Liab kuj loj dua Tswv Ntuj.
Nws tsis yog li ntawd.
Mab Liab yog Tswv Ntuj leej niam, mas txhais tias Mab Liab yog tus Tswv Ntuj xeeb ua lub cev nqaij neeg niam, tsis yog tias Mab Liab yog tus Tswv Ntuj Leej Plig niam.
Nyob hauv hnub hwm Mab Liab yog Tswv Ntuj leej niam no, zoo ntuas peb siab tias txij hnub peb txiav siab ntseeg txog Yes Xus lawm, peb tau lub npe tias yog Tswv Ntuj haiv neeg, yog Tswv Ntuj cov me nyuam, peb muaj Huab Tais Yes Xus ua peb tij los peb tus nus lawm, ces peb yuav mob siab thiab muab siab rau taug Huab Tais Yes Xus txoj kev, muaj ib hnub twg peb thiaj tau mus pom peb niam Mab Liab thiab pom peb tus tij tus nus Yes Xus nyob hauv peb Leej Txiv Tswv Ntuj.
