13. Txhob zes luag txij luag nkawm
Vim kev muab hlob mas kuv xav tias ib txwm los kuv tsis tau hla Tswv Ntuj lo lus ‘koj tsis txhob zes luag txij luag nkawm, thiab koj tsis txhob tso koj lub siab ntshaw zes luag txij luag nkawm’, vim tias kuv ib txwm ua siab ncaj rau kuv tus txiv.
Thiab qhov tseeb mas txij thaum kuv yuav txiv lawm, kuv yeej tsis tau cia lwm tus txiv neej los hnia kuv li, tiam sis Huab Tais Yes Xus qhib rau kuv pom tias kuv tu kuv lub cev nqaij zoo dhau, kuv nyiam hnav tsoos tsho kom pom tej kwj mis, tej tiab luv luv pom puab tais vim kuv xav tias thaum cov txiv neej pom mas lawv yuav ntsia thiab nyiam kuv. Huab Tais Yes Xus ua kom kuv to taub tias thaum cov txiv neej pom li hais mas lawv tau ua txhaum rau kuv. Lawv tsis tau nyiam saib nyiam ntsia xws li kuv tau xav, tiam sis lawv ntsia ce ua rau lawv ntshaw ua plees.
Kuv li txhaum yog ua kom lwm tus muaj lub siab zes luag txij luag nkawm.
Kuv tsis paub tias txiv neej mas lawv muaj lub siab ntshaw zoo li ntawd, kuv tsuas xav tias lawv qhuas kuv, lawv yuav hais tias ‘ua cas koj tu tau lub cev ntxim siab ua luaj os.’
Kuv tsuas xav tias lawv yuav hais li no, tab sis qhov tseeb mas kuv hnav tsoos tsho li hais ces kuv tau ua rau cov txiv neej pom kuv lawv poob hauv kev txhaum. Kuv tsis tau deev dua lwm tus txiv neej, tsis kav kuv tau cia lawv deev kuv hauv sab ntsuj plig lawm. Dhau ntawd mas kuv tau hais rau kuv tias yog kuv tus txiv los lwm tus poj niam tus txiv ua tsis ncaj rau lawv, mas kuv yuav rau tswv yim rau cov poj niam ntawd tias ‘koj txhob zam txim rau koj tus txiv, koj ua kiag kom nws pom tias nws yuav tsum saib taus koj, koj txhob cia nws tswj koj.’
Vim li no mas kuv tau ua rau ib tug poj niam nws nrauj nws tus txiv vim nws mus pom tias nws tus txiv tau hnia lwm tus poj niam. Nws tus txiv yuav los lees txais lub txim thiab thov kom nws zam rau, nws hlub tus txiv ces nws yuav zam rau tab sis kuv hais kom nws txhob zam, ces nkawd thiaj sib nrauj. Ob xyoos tom qab nws mus yuav dua txiv tshiab.
Nej puas to taub qhov kuv hais los no? Thaum kuv rau tswv yim li ntawd rau nkawm niam txiv ntawd, ces yog kuv muaj feem nrog nkawd ua txhaum zes luag txij nkawm thiab.
Huab Tais Yes Xus pub kom kuv pom tias yus lub cev nqaij ua txhaum mas yog yus tab tom rov tsawm yus ntag, txawm tias ntiaj teb yuav hais tias yog yam ntxim rau neeg lub siab ntshaw.
Tas kuv sid mas kuv muaj tib tug hluas xwb yog kuv tus txiv, tab sis kuv tau ze luag txij nkawm hauv lub tswv yim, lo lus, thiab yam tau ua tsheej xeeb.
Yog yam txaus tu siab thaum kuv pom tias kuv txiv kev txhaum vim nws zes luag txij nkawm no tau poob los txog rau peb cov ua me nyuam. Ntawm kuv mas kuv txiv txoj kev txhaum no ua rau kuv tsis nyiam txiv neej, hos ntawm kuv tus nus mas nws tau taug kuv txiv tus lwj lw. Kuv txiv ua neeg saib tsis tau cov poj niam, ua neeg quav cawv, thiab nws tsis ras tias yog nws tab tom tsim txom nws cov me nyuam, yog li kuv txiv thiaj quaj tu siab ntso nyob hauv teb chaws them txim thaum nws pom lub txiv txi ntawm nws cov txhaum thiab nws tus yam ntxwv phem.
Peb tau tsawm peb tus kheej vim peb tau hla Tswv Ntuj lo lus qhia kom txhob zes luag txij nkawm thiab txhob ntshaw ua dev ua npua vim tej ntawd coj peb lub neej mus poob theem qis xws li tej tsiaj.
