14. Txhob ua tub sab tub nyiag
Kev xyav luag moo yog kev ua tub sab, kuv tau hais tias ib txwm mas kuv tsis tau nyiag luag tej li cuab tam, kuv yog ib tug muaj lub siab ncaj, tab sis tseeb tiag mas kuv tau nyiag ntau yam ntawm Tswv Ntuj. Tswv Ntuj yog tus tsim kuv, kom kuv tsheej neej mas kuv thiaj yuav tu tau lub ntiaj teb no thiab txhim Tswv Ntuj lub Ceeb Tsheej nyob hauv lub ntiaj teb no. Tiam sis tsis yog kuv tsis tau ua txoj hauj lwm Tswv Ntuj muab rau kuv xwb, kuv tseem muab lub tswv yim tsis zoo rau lwm tus thiab ua tus rhuav cov neeg tuaj vam txog kuv thiab. Kuv tsis txawj muab rab peev xwm Tswv Ntuj pub rau kuv no los txhim yam zoo, yog li mas kuv thiaj hais tias yog kuv tau nyiag rab peev xwm no ntawm Tswv Ntuj. Muaj puas tsawg tus neeg uas kuv tau nyiag lawv lub suab lub npe, muaj puas tsawg tus neeg uas kuv tau hais lus xaiv kom lawv poob tsam.
Thaum peb hais lus xyav luag moo, peb hais lus xaiv txog lawv, peb yuav ua li cas thiaj rub tau lawv lub suab npe rov qab?
Yog ib yam tsis yooj yim kiag li, yog li mas nyob hauv teb chaws them txim, cov neeg ua txhaum vim xyav luag moo, taug xaiv, hais lus hiam lwm tus los yog mus kom luag rau tej nom tswv, lawv thiaj raug lub txim txom nyem hnyav.
Peb txhua leej yeej tau siv peb tus nplaig thiab lub ncauj no hais lus txog lwm tus, tsis hais rhuav lawv los yog txuam lawv. Thaum peb tuag mus txog teb chaws them txim mas peb tus nplaig yuav raug hlawv.
Huab Tais Yes Xus taw rau kuv pom tias thaum peb tau xyav luag moo mas yog peb tab tom dag peb tus kheej, piv txwv tias thaum peb pom cov poj ntiav mas peb saib tsis tau nws tab sis Huab Tais Yes Xus hlub nws thiab khuv leej nws, Huab Tais Yes Xus tsom tau hauv nws lub plawv, pom txog nws lub neej thiab paub tias yog vim dab tsi nws thiaj tawm hauv tsev tuaj ua poj ntiav muag cev zoo li ntawd.
Tej zaum nej yeej paub me ntsis tias tos cov poj niam tuaj ua txoj hauj lwm muag cev vim yog peb cov txhaum, vim peb saib tsis tau thiab vim peb tsis txawj nyiam lwm tus xws li Tswv Ntuj xav kom peb nyiam.
Muaj puas tsawg leej yuav cev tes mus pab cov poj ntiav? Muaj puas tsawg leej ntsia ntsoov saib lwm tus puas ua qhov tsis zoo? Peb tsuas yog cav lus txog lwm tus thiab ntsia lwm tus qhov tsis zoo, ces peb yuav hais cem lawv, muab txim nog rau lawv. Ua cas peb tsis kaw peb lub ncauj mas! Thov kom peb txhos caug thiab thov Ntuj rau lawv mog! Vim tias lub caij peb ua tsis tau dab tsi tiam sis Tswv Ntuj ua tau. Thov peb txhob xyav lawv lub moo mog, tsis li ntawd mas tus yuav muaj txhaum kawg yog peb.
Thaum peb xyav luag moo, hais lus xaiv lus dag txog lwm tus mas yog peb tau ua tub sab nyiag kev kaj lug hauv lawv mus.
Nej yuav ceev faj mog, vim kev hais lus dag lus cuav tsis hais qhov me los loj, liab los dawb, mas ua cas los yeej yog lus dag lus cuav, yog qhov tsis zoo, yog dab Xas Tas tus me nyuad.
Ntawm kuv, kuv tau dag ntau yam mas kuv tau dab tsi? tswv Ntuj qhov pom kev tsom kom kuv pom tas txhua yam zais ntshis hauv kuv lub neej. Kuv xav kom nej to taub tias nyob rau nruab yeeb ntawd mas tsis muaj leej twg yuav los pab hais rau koj tau. Nyob ntawd tsuas muaj Tswv Ntuj thiab qhov koj tau ua xwb.
Thaum Tswv Ntuj txiav lub txim rau kuv, kuv niam kuv txiv nyob ntawd, nkawd nrog Tswv Ntuj saib tej yam kuv tau dag tau nyiag ntawm lwm tus. Kuv niam pom mas nws tsis hais dab tsi, nws tsuas ua lub siab mos ntsia kuv xwb.
Qhov kuv tau dag loj tshaj mas yog qhov tias kuv tau dag tus kheej tias kuv tsis tau tua leej twg, kuv tsis tau ua tub sab, kuv yog neeg zoo, kuv tsis tau ua phem rau leej twg, tsis muaj Tswv Ntuj, thiab kuv mas tsim nyog mus nyob pem Ntuj Ceeb Tsheej.
Ziag no kuv paub tias tej lo lus no yog kuv rov hais los dag kuv xwb.
Huab Tais Yes Xus pub kuv pom tias thaum kuv tsev neeg peb noj ib pluas mov seem, peb muab pov tseg, tiam sis nyob hauv lwm luab tsev hauv lub qab ntuj no mas muaj ib co neeg tab tom tshaib plab. Huab Tais Yes Xus hais rau kuv tias “Koj ntsia mas! Kuv tab tom tshaib thiab koj ntsia yam kuv tau muab rau koj mas! Koj muab cov zaub mov kuv pub rau koj pov tseg. Koj saib! Yam koj tau ua mas, koj puas pom tias koj tau ua qhev tsob hwb koj lub cev nqaij, koj siv nyiaj ntau los tu koj lub cev kom zoo nkauj, tiam sis muaj puas tsawg leej neeg lawv tsis muaj ris tsho hnav, tsis muaj txhiam xws noj, tsis muaj nyiaj txaus muas yam tseem ceeb rau lwv lub neej.”
Huab Tais Yes Xus tsom kom kuv pom kuv cov nus muag nyob hauv lub teb chaws no thiab txawv teb chaws txoj kev tshaib nqhis thiab kuv tsum muaj feem pab lawv, vim tias qhov no yog txoj hauj lwm sawv daws yuav tau koom tes sib pab. Huab Tais Yes Xus pub kom kuv pom tias kuv tau ua li cas vim muaj ib zaug kuv tau hais lus tsis zoo txog lwm tus neeg ua rau nws tau poob hauj lwm. Kuv tau nyiag nws lub suab lub npe thiab kuv tau rov coj nws lub suab npe los rau nws li cas?
Huab Tais Yes Xus qhib rau kuv pom tias yog thaum peb nyiag luag ib pob nyiaj mas peb rov qab coj mus cob rau luag mas yooj yim heev vim tej zaud peb rho peb cov nyiaj rov mus pauj, qhov no yog zoo li peb tau mus them txim txhaum. Tab sis yog thaum koj nyiag luag suab npe mas leej twg yuav ua tus rov pub suab npe rau nws tau?
Kuv tau ua tub sab nyob hauv kuv lub cuab, kuv nyiag kuv cov me nyuam lub txiaj ntsim vim tias tsim nyog lawv yuav tau ib leej niam siab zoo siab mos, pub tas lub sij hawm rau lawv. Kuv tau tso lawv nyob nrog lub TV, kuv tsis liam fab rau lawv, kuv tsuas rau siab ntso tawm rooj mus ua hauj lwm nrhiav nyiaj xwb. Kuv tseem hais tau tias kuv yog leej niam zoo txhij tau li cas! 5 teev sawv ntxov kuv tawm mus ua hauj lwm, 11 teev tsaus ntuj kuv mam rov los hauv lub tsev.
Kuv xav tias kev hlub me nyuam yog yuav yam ub yam no rau lawv raws li cov me nyuam ntshaw!
Kuv poob siab ntav thaum kuv pom kuv niam tab tom xav tias nws tau ua dab tsi tsis yog rau kuv, es kuv thiaj ua leej niam tsis liam fab rau kuv cov me nyuam. Kuv niam niaj hnub qhia txog Tswv Ntuj rau peb cov yog nws me nyuam, kuv txiv niaj hnub muab lub sij hawm rau nrog peb nyob. Yog li kuv thiaj hais rau kuv tias ‘txij no mus kuv yuav zoo li cas vim kuv tsis tau ua dab tsi pub rau kuv cov me nyuam li? Thaum Tswv Ntuj txiav lub txim rau kuv mas kuv yuav zoo li cas? Kuv tau nyiag kev kaj siab hauv kuv cov me nyuam, ces kuv txaj muag.
Nyob hauv phau ntawv txheeb txoj sia mas peb yuav pom peb lub neej xws li thaum peb saib xyam. Thaum peb pom cov me nyuam sib hais tias ‘xav kom hnub no niam los tsev lig lig, vim peb niam tsis ntxim hlub, vim peb niam los txog tsev mas nws tsuas cem thiab yws peb xwb’, mas mob siab tiag tiag li. Kuv ob tug me nyuam hais zoo li ntawd, nkawd tsis xav kom nkawd niam los tsev, kuv tau nyiag kev kaj hauv nkawd lub siab.
Tsim nyog kuv yuav qhia kom nkawd paub txog Tswv Ntuj thiab txawj nyiam lwm tus, tiam sis qhov kuv tau qhia rau nkawd mas yog kuv qhia kom nkawd ntxub lwm tus, tsis muaj kev nyiam nyob hauv nkawd.
Kev hais lus dag lus cuav mas yog hla Tswv Ntuj Lo Lus tias ‘koj txhob ua tub sab tuag nyiag’ thiab!
Kuv paub tau li cas? Nej puas paub tias thaum kuv hais lus dag lwm tus ces kuv txias ntshis ua Xas Tas tus me nyuam. Qhov tseeb mas peb xaiv tau tias peb yuav cia Tswv Ntuj ua peb Txiv, los cia Xas Tas ua peb txiv yeej tau tib yam. Tswv Ntuj yog kev nyiam hos kuv muaj kev ntxub ntxaug ces kuv txiv yog leej twg? Tswv Ntuj qhia kom kuv txawj zam rau lwm tus thiab nyiam kuv tus yeeb ncuab, tiam sis kuv hais tias leej twg ua li cas rau kuv mas kuv yuav ua pauj kua zaub ntsuab rau nws. Kub muaj lub siab chim cib nyeej, kuv ua tus neeg hais lus dag lus cuav. Xas Tas yog kev hais lus dag leej txiv, yog li mas leej twg thiaj yog kuv txiv mas?
Tus nplaig kev txhaum mas txaus ntshai tiag tiag, kuv ntsia pom cov hauj lwm phem tawm hauv kuv tus nplaig los, thaum kuv thuam lwm tus, thaum kuv hais lus tsis zoo txog lwm tus, thaum kuv tis tej lub npe los saib tsis taus lwm tus. Tus poj niam kuv tis npe tshiab rau nws kom txaus kuv siab, kom nws ua siab fab ntawd, mas nws yuav xav li cas, kuv cov lus yuav rhuav nws tau li cas? Kuv thov muab hais ua piv txwv rau nej mloog: muaj ib tug poj niam rog heev, ces kuv tau hais lus tso dag rau nws thiab thuam nws, ces nws ntxhov siab vim kuv lo lus mas nws thiaj ua ib siab mus dai tuag!
Muaj ib zaj yog thaum kuv muaj 13 xyoos, kuv ua phooj ywg nrog ib co me ntxhais, peb yog pab neeg txawj ntse thiab hlwb zoo. Vim peb xav tias tsuas yog peb cov phooj ywg xwb thiaj muaj tsim dua lwm cov ces nyob hauv peb kem tsev kawm mas muaj ib tug me ntxhais rog. Peb tau hu nws tias ‘niag poj ntxhw’. Kuv pom hauv phau ntawv txheeb kuv txoj sia tias tus me ntxhais peb thuam nws no mas nws lub siab tsis kaj vim peb lo lus, nws ntsia hauv daim iav tsom, nws lub tswv yim rov dag rau nws tias nws zoo li peb thuam nws tiag, ces nws pib ntxub peb thiab ntxub nws tus kheej. Yim laug hnub mas nws kev ntxub yim ntau tuag. Kev ntxub yog ‘txoj kev tuag’, yog kev tuag sab ntsuj plig. Nws tas kev vam khom ces nws thiaj noj tshuaj ntau ntau saib nws puas yuav yuag tuaj. Qhov kawg nws tsis yuag tab sis tshuaj ua rau nws ob lub qhov muag yuav luag dig. Txij hnub ntawd los nws tsis tuaj kawm ntawv li lawm, ntawm peb mas peb tsis quav ntsej txog nws tej teeb meem. Peb tsis ras tias nws muaj teeb meem mas yog vim peb!
Cov nus muag sawv daws, vim peb lo lus mas peb thiaj tau txov ib tug neeg lub neej, vim peb thuam nws mas dab phem thiaj nkag tau los nyob hauv nws thiab tsim txom nws, thiab nws tau txov lwm tus lub neej vim peb lo lus ua kom kev ntxub nrhau cag nyob hauv nws. Vim li no mas kev phem thiaj xeeb tau thiab ri mus deb. Qhov twg muaj kev ntxub ntxaug, qhov ntawd muaj kev phem. Yam no yog yam peb tau tua peb ib tug phooj ywg.
20 xyoo tom qab, kuv tau ib tug xeeb ntxwv ntxim hlub kawg, kuv qhuab qhia nws kom txawj tu cev, kuv qhia nws kom txawj ua zam mas lwm tus thiaj yuav ntsia nws. Txawm muaj ib hnub nws raug hluav taws kub yuav luag tag nws lub cev.
Kuv ntxhov siab thiab pib cem Tswv Ntuj, kuv mus hauv lub me nyuam tsev teev Ntuj thiab hais rau Tswv Ntuj tias “Tswv Ntuj, yog muaj koj tiag no, koj ua kiag rau kuv pom mas, koj pab kuv tus me xeeb ntxwv mas!”
Nej saib kuv tus xeeb ceem muab hlob mas cov nus muag! Qhov kawg mas kuv tus xeeb ntxwv tsis tuag tab sis nws txhais tes tsis zoo li qhov qub lawm.
Qhov txaus tu siab dua mas yog qhov no: kuv coj nws nrog kuv mus da dej tom lub pas dej, ces cov neeg hauv lub pas dej hais zom zaws tias ‘ua cas koj tsis cia nws nyob twj ywm tom tsev nas! Koj yuav rhuav peb hnub so ua si lod!’
Lawv hais li ntawd vim lawv pom nws lub cev raug kub hnyiab tsis ntxim ob lub qhov muag ntsia. Lawv hais li mas ua rau kuv tus xeeb ntxwv tsis kam tawm hauv tsev li lawm. Nws ntshai lwm tus pom nws, thiab txoj kev ntxub pib tuaj kaus nyob hauv nws lub siab.
Huab Tais Yes Xus qhia kom kuv to taub tias peb tau cai qhov twg los ua kom lwm tus tu siab, ntxhov siab, peb tau cai qhov twg los thuam lwm tus, siab tsis taus lwm tus vim lo lus tawm hauv peb lub ncauj los.
Yog kuv mus txhos caug ntawm lub Cim Yug thiab thov Ntuj lub txiaj ntsim los nplij kuv tus xeeb ntxwv lub siab, mas Tswv Ntuj yuav cawm nws, ntxuav nws lub siab kom rov kaj tuaj, vim tias peb txhua tus nyob hauv Tswv Ntuj kev nyiam. Yog peb kaw qhov rooj rau txoj kev phem, mas Tswv Ntuj yuav qhib qhov rooj los foom koob hmoov rau peb.
Thaum Huab Tais Yes Xus muab Tswv Ntuj 10 Lo Lus los tsom kuv tus plig mas yog Huab Tais Yes Xus tab tom qhia rau kuv tias thaum kuv hais tias kuv nyiam Tswv Ntuj thiab teev hawm Tswv Ntuj tib leeg xwb, mas tseeb tiag yog kuv teev hawm dab phem. Thaum kuv cem thiab yws txog txhua yam hauv kuv lub neej mas sawv daws taw tes los rau kuv. Thaum kuv hais tias kuv nyiam cov neeg nyob ze kuv mas kuv tab tom ua phem rau lawv thiab khib lawv. Thaum kuv hais tias kuv hwm kuv niam kuv txiv mas yog kuv tab tom tsis pom nkawd lub txiaj ntsim thiab tsis ua nkawd tsaug, kuv tsis liam fab tu nkawd thaum kuv muaj hauj lwm ua thiab muaj nyiaj.
Tswv Ntuj tsom kom kuv pom tias kuv tau ua zoo li cas rau lwm tus thiab rau Tswv Ntuj.