(MT 18: 15-20)
Cov His Xas Lais los yog cov Yus Das saib tias tsuas yog lawv haiv neeg xwb thiaj yog haiv neeg ntshiab Tswv Ntuj xaiv, lwm haiv mas lawv tsis yog Tswv Ntuj haiv neeg, lawv yog neeg muaj txhaum, lawv tsis tau mus nyob hauv Tswv Ntuj lub Ceeb Tsheej. Cov His Xas Lais los cov Yus Das saib tias tab txawm lawv cov neeg kiag, yog tus twg tig mus teev lwm haiv cov dab, mas lawv yog neeg txhaum. Li ntawd, thaum tus twg ua txoj hauj lwm sau se rau tseem hwv Los Mas, mas tus ntawd tab tom ua cov hauj lwm teev cov Los Mas cov dab thiab, ces tus ntawd thiaj yog neeg muaj txhaum. Cov Yus Das thiaj tsis mus fim cov neeg muaj txhaum thiab tsis pub lawv los so hauv cov Yus Das tsev.
Kwv tij Hmoob sawv daws, hnub no peb hnov Huab Tais Yes Xus hais txog kev ntuas yus ib tug kwv tij tau ua txhaum. Huab Tais Yes Xus hais tias:
1. Koj yuav xub mus ib leeg mus ntuas nws ua ntej ntsiag ntsiag. Tos cia yus ib leeg mus ntuas nws xwb, vim yus hlub nws, yus tsis xav kom ncha tsam nws poob ntsej muag.
2. Yog nws tsis mloog, mas koj yuav coj ib los ob leeg nrog koj mus. Tos coj lawv mus, tsis yog kom lawv nrog koj mus hem kom nws ntshai, ces nws yuav li koj hais. Tab sis kom lawv mus pab koj ntxiv tswv yim, kom lawv mus pab nrog hais.
3. Yog nws tseem tsis mloog koj hais thiab, mas koj yuav hais rau lub Koom Txoos paub, kom lawv nrog koj mus ntuas nws. Lub Koom Txoos yog tas cov neeg ntseeg sib sau nyob ua tej npoj ua ke. Li ntawd, lo lus no thiaj yog kom cov ntseeg zoo ib yam li koj pab nrog koj mus hais.
4. Yog thaum cov ntseeg sib pab hais sib pab ntuas lawm, nws tsis yuav, mas kav liam cia nws ua raws li nws qhov. Tab sis koj tsis txhob tso nws pov tseg, txhob nrauj nws. Ua cas thiaj hais li no, vim peb pom tias nyob hauv Ntawv Moo Zoo, Huab Tais Yes Xus tsis nrauj cov pej kum neeg los cov sau se, Huab Tais Yes Xus tsis tau thuam los saib tsis taus lawv li. Huab Tais Yes Xus nrog cov neeg txhaum thiab cov sau se koom rooj mov, Huab Tais Yes Xus mus so hauv Ntxas Kais uas yog ib tug nom sau se tsev. Huab Tais Yes Xus mus pem Tws Los thiab Xis Doos ob lub nroog cov pej kum neeg nyob. Huab Tais Yes Xus mus hauv cov Xas Mas Lias thiab nrog tus poj niam Xas Mas Lias tham. Huab Tais Yes Xus tsis ntxub lawv, nws ua siab muag siab mos nyiam thiab khuv leej lawv.
Huab Tais Yes Xus tseem hais ntxiv tias yog cov thwj tim khi yam twg nyob ntiaj teb no, mas Ntuj yuav saib yam ntawd yog khi nyob saum ntuj; lawv daws yam twg nyob ntiaj teb no, mas Ntuj saib yawm ntawd yog daws nyob saum ntuj thiab. Yog li mas nyob hauv lub Koom Txoos uas yog cov neeg ntseeg, yog peb mloog Huab Tais Yes Xus cov lus, mas peb yuav zam rau peb cov kwv tij tau ua txhaum ua yuam kev, muaj ib hnub twg peb thiab lawv thiaj yuav tau sib ntsib thiab nyob ua ke.
Lo lus kawg hauv Tswv Ntuj Lo Lus hauv hnub no, Huab Tais Yes Xus hais tias yog peb cov neeg ntseeg ob leeg koom suab thov Ntuj ua ke, mas thaum ntawd Tswv Ntuj yuav mloog thiab pub rau nkawd. Yog cov ntseeg 2 los 3 leeg sib sau tuav txog Huab Tais Yes Xus lub npe, mas Huab Tais Yes Xus nyob hauv nruab nrab lawv.
Kwv tij, Huab Tais Yes Xus tsis tau hais kom peb nyias thov nyias, tab sis yog Huab Tais Yes Xus kom peb koom ib lub suab ib zaj lus los thov Huab Tais Tswv Ntuj. Ib yam li niaj hnub no thaum peb thov Ntuj rau lub teb chaws nyob hauv lub Txoos, peb thiaj cia ib tug yog tus cev lus, ces sawv daws koom ib lub suab thov tias “Peb thov koj, Huab Tais Leej Txiv siab zoo.”
Tuav txog Huab Tais Yes Xus lub npe, tsis yog kom peb ua dab tsi kuj xij, ces peb muab Huab Tais Yes Xus lub npe los hais hais tias yog peb ua nyob hauv Huab Tais Yes Xus lub npe. Tab sis tuav txog Huab Tais Yes Xus lub npe, yog kom peb sib sau ua ib yam hauj lwm dab tsi, mas yog peb tsum ua nyob hauv txoj kev nyiam; nyiam Tswv Ntuj thiab nyiam sawv daws, peb tsum ua nyob hauv txoj kev hlub luag tej.
Kwv tij Hmoob, niaj hnub no muaj ib tug twg ua txhaum rau peb, peb puas mus nrog nws sib tham kom haum, los peb cia li mus nrog nws sib cav sib ceg los cia li coj mus taug xaiv hais qhia rau sawv daws paub? Niaj hnub no peb puas tseem nrog tus ntxub peb tsis nyiam peb sib fim sib tham li tsis muaj dab tsi, los peb txiav peb cais nws tawm hauv peb lub neej mus? Niaj hnub peb puas nrog peb tsev neeg los yog cov ntseeg koom ib lub suab ib zaj lus thov Ntuj ua ke? Niaj hnub peb nyob ua ke nrog cov ntseeg, peb puas muaj lub siab nyiam lawv, los yog peb lam nyob vim lawv thiab peb yog neeg ntseeg tib yam? Niaj hnub peb sib tuav tes ua txoj hauj lwm sib pab, mas peb puas muaj lub siab hlub, los yog peb ua kom luag tej pom hais tias peb yog ib tug neeg zoo xwb?
