(MT 18: 1-5, 10, 12-14)
Kwv tij Hmoob, hnub no peb hnov cov thwj tim los nug Huab Tais Yes Xus saib nyob saum Ntuj Ceeb Tsheej, tus neeg zoo li cas thiaj yuav yog tus loj dua cov. Lawv nug li ntawd, yog tom qab Huab Tais Yes Xus hais paj lug qhia txog Ntuj lub Ceeb Tsheej rau lawv tas. Lawv xav tias Ntuj lub Ceeb Tsheej yog ib lub teb chaws muaj Huab Tais Yes Xus ua vaj, muaj cov tub ncig cov zov keeb zoo li lub ceeb tsheej lawv pom nyob hauv ntiaj teb no. Lawv tso siab tias nyem no lawv tab tom raws Huab Tais Yes Xus, mas muaj ib hnub lawv yuav nrog Huab Tais Yes Xus mus nyob pem Ntuj Ceeb Tsheej, thaum ntawd lawv tus twg thiaj yuav ua tus loj dua cov.
Huab Tais Yes Xus teb li cas rau lawv? Nws hais tias “Kuv hais tseeb rau nej, yog nej tsis hloov rov los ua xws li ib co me nyuam, mas nej yuav mus tsis tau hauv Ntuj lub Ceeb Tsheej. Leej twg rov saib nws me xws li tus me nyuam no, tus ntawd yog tus loj dua nyob hauv Ntuj lub Ceeb Tsheej.”
Kwv tij Hmoob, cov Yus Das thaud, lawv saib tias cov me nyuam yaus yog cov tseem tsis tau hlob tiav txiv, lawv tsis muaj cai yuav chaws mus hauv lub Tuam Tsev Teev Ntuj, lawv tsis muaj qab hau dab tsi nyob ntawm sawv daws xub ntiag. Tab sis ntawm Huab Tais Yes Xus, nws tsis xav li cov Yus Das sawv daws, Huab Tais Yes Xus nco txog thaum nws tseem yau tsis tau nto 12 xyoos, nws nrog niam txiv nyob, nws cia siab rau nws niam nws txiv, nws ua dab tsi los nws vam txog nkawd pab, nws raug dab tsi los nws nco txog nkawd tas mus li. Huab Tais Yes Xus thiaj li hais tias cov yuav mus tau hauv Ntuj lub Ceeb Tsheej yog cov hloov tus kheej los ua zoo li cov me nyuam; lawv cia siab rau Tswv Ntuj, lawv vam txog Tswv Ntuj ua tus pab lawv, lawv nco nraim txog Tswv Ntuj tas mus li.
Huab Tais Yes Xus hais ib lo lus los ntuas cov thwj tim kom lawv qhib siab txais cov me nyuam; yog kom lawv paub ‘hwm’ cov neeg zeej tsoom saib tsis muaj tsim, saib tsis muaj qab hau dab tsi. Ib yam li niaj hnub no, peb pom tias ntiaj teb neeg tsuas hwm cov neeg muaj suab npe, saib taus cov neeg nplua nuj xwb; cov neeg pluag txom nyem, cov neeg me, cov neeg muaj txim, mas sawv daws tsis tshua quav ntseg txog. Huab Tais Yes Xus tsis xav kom peb ib raws li ntiaj teb lub tswv yim no, peb tsum saib lawv muaj tsim zoo tib yam, peb tsum hwm lawv vim tias nyob ntawm Tswv Ntuj, txhua tus neeg puav leej tseem ceeb, Tswv Ntuj hlub sawv daws tib yam, Tswv Ntuj tsis xav kom ib tus twg ploj li. Huab Tais Yes Xus thiaj li hais tias “Nej Txiv nyob saum ntuj tsis xav kom ib tug me nyuam yaus no ploj li” (MT 18: 24).
Kwv tij Hmoob sawv daws, niaj hnub no peb puas xyaum ua tus neeg me cia siab rau Tswv Ntuj, los peb tseem xaiv ua tus loj cia siab rau yus lub peev xwm xwb? Peb puas txais cov neeg luag tej saib tsis muaj qab hau, los peb tseem ua zoo li sawv daws, tsis liam fab txog lawv, es hais tias ‘tsis yog kuv hauj lwm as’?
Hnub no, xav kom peb rov tig ntsia lub neej dhau los, saib muaj pes tsawg zaus peb nyob deb ntawm Tswv Ntuj tab sis Tswv Ntuj tuaj nrhiav thiab coj peb los nyob hauv Tswv Ntuj lub tshav loog.
