(Z 12: 24-26)
Kwv tij Hmoob sawv daws, peb saib lub noob nplej, yog tias peb cia nws nyob nws hauv txhab tsis ntub nag li, mas lub noob nplej yuav nyob li ntawd ib xyoos, ob xyoos, los peb xyoos. Yim nyob ntev mas lub noob txoj sia yim yau, ces txog qhov kawg peb coj mus cog los yuav tsis tuaj lawm. Tab sis lub noob nplej twg, nws ntub nag los yog peb maj coj mus cog rau hauv av, mas nws yuav tuaj kaus thiab ua yub sai, thaum ua tsob los yuav yog ib tsob muaj zog hlob loj tau zoo. Nyob hauv peb lub neej zoo ib yam li ntawd. Yog peb ua neej nyob, peb kaw peb cia tsis tawm mus pab luag tej, peb tsuas nrhiav qhov zoo nrhiav nyiaj txiag rau peb xwb, tab txawm peb yuav noj qab nyob zoo luaj twg, los muaj nyiaj txiag cuab tam ntau npaum li cas, los peb txoj sia yuav tsis muaj txiaj ntsim qab hau dab tsi li. Peb tuag mus, ces txhua yam yaj ntshis. Tus twg ua neej nyob, nws nquag tawm rooj pab sawv daws, nws tsis saib nyiaj txiag hlob, nws xaiv ua qhov zoo ua ntej, mas tab txawm nws tuag lawm los, sawv daws nco ntsoov nws txiaj nws ntsig.
Kwv tij Hmoob, peb pom tus piv txwv no zoo tshaj mas yog Huab Tais Yes Xus, nws yeem raug luag muab nws ntes thiab tua nyob saum ntoo cuam, kom tau hliv nws cov ntshav los ntxuav ntiaj teb neeg ntseeg txog nws. Yog muaj Huab Tais Yes Xus txaus siab ua lub noob nplej poob rau hauv av, mas niaj hnub no peb sawv daws thiaj muaj chaw tso siab tias muaj ib hnub peb yuav sawv rov los zoo ib yam li Huab Tais Yes Xus thiab.
Peb tseem hnov Huab Tais Yes Xus hais tias “Tus twg nyiam nws txoj sia, mas nws plam nws txoj sia. Hos nyob hauv lub qab ntuj no, tus twg tsis khuv xim nws txoj sia, mas nws yuav ceev nws txoj sia kom ciaj nyob mus li.” Lo lus no Huab Tais Yes Xus xav qhia rau peb kom tsis txhob muab txoj sia dai rau ntiaj teb lub tswv yim, txhob saib lub cuab tam hauv ntiaj teb no ua qhov loj. Qhov peb yuav muab saib ua qhov loj thiab tseem ceeb tshaj mas yog Tswv Ntuj, peb yuav ua dab tsi mas peb tsum muab Tswv Ntuj saib ua qhov ua ntej, peb yuav ua dab tsi mas peb tsum muab ua tib zoo xav saib puas xis Tswv Ntuj siab, puas yuav haum rau Tswv Ntuj txoj cai Huab Tais Yes Xus qhia rau peb.
Nyob hauv Ntawv Moo Zoo, peb pom ntau zaus tias cov Fas Lis Xais saib hnub Xas Npas Tos loj dua txoj kev hlub luag tej, ces lawv tsis quav ntsej pab cov neeg txom nyem nyob hauv hnub Xas Npas Tos. Qhov no yog lawv ua tsis xis Tswv Ntuj siab, Huab Tais Yes Xus thiaj npau taws rau lawv tsis tseg.
Huab Tais Yes Xus tseem hais ntxiv tias “Tus twg tsob hwb kuv, mas nws yuav tsum los raws kuv. Kuv nyob qhov twg, kuv tus tub txib kuj yuav nyob qhov ntawd thiab. Tus twg tsob hwb kuv, mas Leej Txiv yuav saib nws muaj tsim.”
Kwv tij Hmoob, kev tsob hwb Huab Tais Yes Xus, tsis yog kom peb niaj hnub los niaj lis piam teev Ntuj xwb, tab sis tseem yog kom peb coj lub neej raws Huab Tais Yes Xus thiab.
Peb raws Huab Tais Yes Xus li cas? Huab Tais Yes Xus hais tias “Nej kwv nej tus ntoo cuam, ces nej los raws kuv”, yog kom peb zoo siab ris kev txom nyem nyob hauv txoj kev ua neeg ntseeg, yog kom peb ua raws li cov lus Huab Tais Yes Xus qhia, yog kom peb yoog raws Huab Tais Yes Xus tus piv txwv hlub thiab pab cov neeg txom nyem.
Peb ua li ntawd, Tswv Ntuj thiaj saib tias peb txoj sia nyob ntiaj teb no yog ib txog sia muaj tsim zoo li lub noob nplej tuag kom tau tuaj ua ib tsob nplej txhawv hnab ntau.
Kwv tij Hmoob sawv daws, ziag no peb los tsom hauv peb nruab siab, saib muaj yam twg peb yuav tau muab tua kom tuag mus, peb thiaj li yuav txi taus txiv. Puas yog lub siab qia dub, puas yog lub siab xam khib, puas yog lub siab ntshaw ua tus loj, puas yog txoj kev tub nkeeg?
Niaj hnub peb ua ib yam dab tsi, peb puas nco tias puas yuav haum rau Huab Tais Yes Xus cov lus qhia los tsis haum, peb ua raws li peb siab ntshaw los peb ua xis Tswv Ntuj siab?
Thaum muaj kev txom nyem kev ceeb laj tau raug peb nyob hauv txoj kev ntseeg, peb puas ua zoo txais los peb tso tes khiav?
Thov kom Leej Ntshiab Tub Tsob Hwb Los Lees Ntxos lub neej hnub no peb tau mloog ua ib tug piv txwv rau peb.
