Peb puas vam txog Huab Tais Yes Xus pab peb (MT 17: 14-21)
Kwv tij Hmoob, thaum Huab Tais Yes Xus coj Pob Zeb, Yas Kos, thiab Zam nce mus teev Ntuj saum lub ncov roob, Huab Tais Yes Xus pub nws lub hwj chim rau lawv pom tas, ces lawv rov nqes saum roob los. Huab Tais Yes Xus lawv los txog ntawm taw roob, ib tug neeg dhia los cuag Huab Tais Yes Xus, nws hais tias nws tus tub raug tus dab qaug dab peg, nws coj tuaj rau Huab Tais Yes Xus kho tab sis nws tuaj txog tsis pom Huab Tais Yes Xus lawm, nws muab rau cov thwj tim kho, mas lawv kho tsis tau. Zaum no Huab Tais Yes Xus los txog lawm, thov Huab Tais Yes Xus pab kho, ces Huab Tais Yes Xus thiaj li mam kho nws tus tub. Cov thwj tim nug tias ua cas lawv thiaj li ntiab tsis tau tus dab qaug dab peg ntawd. Huab Tais Yes Xus hais rau lawv tias vim lawv ntseeg tsawg (MT 17: 20).
Kwv tij Hmoob, peb ua neeg ntseeg, mas ntau zaus peb ntsib teeb meem ntau tsav ntau yam, ces peb daws tsis tau, peb dhia los dhia tsis dim; peb vam txog Tswv Ntuj pab npaum cas los peb yeej daws tsis tau li. Tos zoo li ntawd vim dab tsi? Hnub no Huab Tais Yes Xus hais rau peb tias “Vim koj ntseeg tsawg.” Peb xav tias peb muaj peev xwm daws tau, peb muaj zog txaus tiv, ces peb tsis nco cia siab rau Tswv Ntuj ua tus pab.
Huab Tais Yes Xus hais rau cov thwj tim tias “Yog nej ntseeg luaj li lub noob zaub roj, mas nej hais rau lub roob ntawd tias ‘koj txav ntawm no mus lawm tod saib,’ lub roob kuj yuav txav mus” (MT 17: 20).
Ntoo zaub roj yog ib tsav ntoo tawg paj muaj ntsis zoo li zaub ntsuab thiab muaj noob me me li lub noob zaub. Yog li mas Huab Tais Yes Xus thiaj li muab los piv rau neeg lub siab ntseeg vim lub noob me tas npaud muaj zog loj hlob ua tsob ntoo loj tau, tib neeg lub siab ntseeg tab txawm nws ntseeg me me xwb los yeej muaj zog ua tau tej yam loj. Huab Tais Yes Xus xav kom peb kev ntseeg zoo li lub noob zaub roj ntawd, me me tab sis muaj txoj sia.
Tswv Ntuj Lo Lus hnub no xav qhia rau peb tias thaum peb ntsib teeb meem, peb puas vam txog Tswv Ntuj vim peb ntseeg txog Tswv Ntuj, los peb tsuas vam txog peb lub zog lub peev xwm xwb.
