UA TIM KHAWV TXOG YES XUS (Z 1: 19-28)
Tus Hauv Paus Xa Lus Zam hais tseeb kawg tias tus tsis ntseeg tias Huab Tais Yes Xus yog Leej Pleev, mas tus ntawd yog tus tiv Leej Pleev. Tus tsis ntseeg tias Huab Tais Yes Xus yog tus Cawm ntiaj teb neeg, mas tus ntawd tsis yog Tswv Ntuj cov me nyuam. Cov lus no yog cov lus tas nrho cov neeg ntseeg txog Yes Xus tsis hais nyob lub Koom Txoos twg puav leej ntseeg zoo tib yam li ntawd.
Yog nyob nyob muaj tej tus neeg tuaj qhia ib zaj tshiab tias lawv ntseeg Ntuj tab sis lawv tsis ntseeg tias Huab Tais Yes Xus yog Leej Pleev, mas hais tau tias lawv tsis yog cov neeg ntseeg txog Yes Xus los raws li lub qab ntuj hais tias ‘Christian’.
Thov muab ib qho hais ua kev nkag siab rau peb sawv daws tias thaum peb hnov lo lus ‘Chistian’ mas yog hais txog tag nrho cov ntseeg txog Yes Xus, tsis hais Kav Tos Liv, Os Thos Dos, los yog Plos Tes Taas.
Cov ntseeg txog Yes Xus, lawv yog Huab Tais Yes Xus thwj tim, lawv ua tim khawv txog Huab Tais Yes Xus yam li tus Ntxuav Plig Zam hais tias “Kuv tsis yog Leej Pleev. Kuv yog tus neeg nyob hauv teb chaws quav poj lub suab qw tias nej ua kom Huab Tais txoj kev rov tiaj.”
Nyob hauv peb sawv daws, mas peb yuav ua li Zam. Peb yuav nco ntsoov tias peb yog ib tug neeg me me, peb tsuas yog tus twj cia rau Tswv Ntuj ua hauj lwm xwb, txhua yam hauj lwm zoo peb ua, mas yog ua los cav txog Tswv Ntuj.
Peb yuav tsis tsa peb cai, peb yuav tsis hais lus qhuas peb tias “Yog mas, tos lawv muaj txoj kev ntseeg ruaj li ntawd, yeej yog kuv tus no ua tus ntuas lawv ntag!” Yog peb hais zoo li ntawd, mas ceev faj mog, tsis yog Tswv Ntuj yuav muab txim rau peb; tiam sis yog cov neeg nrog peb nyob, lawv yuav yog tus muab txim rau peb.
Peb cov neeg ntseeg, mas peb tsis yog Leej Pleev, peb tsis yog tus cawm lub qab ntuj neeg, peb tsis yog tus yuav txiav txim rau peb cov kwv tij. Cov neeg ntseeg tsuas yog tus ua tim khawv txog Huab Tais Yes Xus txoj kev cawm neeg rau lwm tus, yog tus qauv rau lwm tus pom, kom lawv tig los ntseeg txog Yes Xus, kom lawv tau txais Leej Pleev txoj kev cawm.
Huab Tais Yes Xus yog qhov tseeb, mas peb cov ntseeg txog Yes Xus thiaj ua tim khawv txog qhov tseeb; yam li peb ua neej mus raws li peb txoj kev ntseeg.
Huab Tais Yes Xus yog kev nyiam, mas peb cov neeg ntseeg txog Yes Xus thiaj ua tim khawv txog kev nyiam; yam li peb sis nyiam sis hlub.
Huab Tais Yes Xus yog chaw tso siab, mas peb cov neeg ntseeg txog Yes Xus thiaj ua tim khawv txog kev tso siab; yam li peb ua neej nyob peb muaj kev tso siab.
Peb hais tias peb ntseeg txog Yes Xus, peb ua tim khawv txog Yes Xus tias yog tus Cawm peb, mas txhua hnub peb kuj yuav ua lub neej mus raws kev ncaj, ua zoo, nyiam thiab hlub cov nyob ib ncig, sib pab sib nres siab.
