Tus sau: TP. Nyiaj Pov (1999) & TP. Txhiaj Foom (2003)
Hmo Hla peb nco tias Huab Tais Yes Xus tau hla txoj kev tuag, sawv rov los muaj txoj sia nyob mus li. Hmo Hla thiaj yog hmo tseem ceeb tshaj plaws, vim hmo ntawd, Huab Tais Yes Xus yeej txoj kev tuag, Huab Tais Yes Xus pub kom cov neeg ntseeg txog nws hla ntawm txoj kev tsaus nti los nyob hauv txoj kev pom kev thiab kaj siab.
Nyob hauv Hmo Hla, mas lub Koom Txoos Kav Tos Liv ua ib co kab ke cav txog Huab Tais Yes Xus yog txoj kev pom kev. Hmo no cov neeg tuaj ua lub txoos teev Ntuj rauv ib cub tawg rau nraum lub tsev teev Ntuj sab nraud. Thaum cub tawg ciaj loj zuj zus, Xib Hwb tsa suab nrov ceeb toom tias “Thaum ntiaj teb neeg tseem tsis tau paub Huab Taus Yes Xus, ntiaj teb neeg nyob hauv qhov tsaus ntuj, zoo li ziag no peb nyob hauv qhov tsaus ntuj. Huab Tais Yes Xus tawm ntawm nws lub ntxa tuaj kaj lub ntiaj teb zoo li cov hluav taws tawm ntawm lub cub tawg no”.
Thaum hluav taws cig loj, Leej Choj muab cov dej foom hmoov zoo, nws ua 3 lub suab hu nkauj nrov tias “Huab Tais Ntuj nrog nej nyob!” Sawv daws txais tias “Huab Tais Ntuj nrog koj nyob!” Leej Choj coj sawv daws thov Ntuj tias “Peb sawv daws thov Huab Tais! Tswv Ntuj, peb thov koj foom lus zoo rau lub cub tawg tshiab no. Thov koj pub rau peb cov neeg ua lub Ntees Hla kom peb lub siab kub rau txoj kev nyiam Ntuj thiab nyiam neeg, peb thiaj yuav muaj lub tswv yim ntshiab huv, tsim nyog mus pom koj lub teb chaws pom kev kaj lug mus li. Peb vam txog peb tus Huab Tais Yes Xus Pleev. Ua li”
Leej Choj pov dej foom hmoov zoo rau lub cub tawg, muab ib tug tswm ciaj loj loj zes taws hauv lub cub tawg kom cig. Tus tswm ciab ntawd yog tus Tswm Ciab Hla.
Thaum peb tuav cov tswm ciag cig pom kev, mas yog lub cim tias Huab Tais Yes Xus yog peb txoj kev pom kev, raws li lo lus uas Huab Tais Yes Xus hais tias “Kuv yog qhov pom kev kaj lub qab ntuj neeg. Leej twg lawv kuv qab, nws yauv tsis mus hauv qhov tsaus ntuj, nws yuav tau qhov pom kev uas coj mus rau txoj sia” (Z 8: 12).Xib Hwb thiaj li tsa suab nrov ceeb toom tias “Peb xav npaj ib lub cim qhia peb tias Huab Tais Yes Xus yog peb qhov pom kev. Lub cim ntawd yog tus tswm ciab loj no uas Leej Choj tuav. Peb hu tus tswm ciab no los ua tus Tswv Ciab Hla. Hmo no peb saib tus Tswm Ciab Hla yog lub cim tias Huab Tais Yes Xus tuaj kaj peb.”
Leej Choj taws tus Tswm Ciab Hla, nws ua 3 lub suab hu nkauj tias “Yes Xus Pleev sawv rov los muaj hwj chim ci ntsa iab. Nws qhov pom kev rhuav qhov tsaus ntuj nyob ntiaj teb no. Leej Txiv Tswv Ntuj, thov koj ua kom peb zaj teev koj hmo no xa qhov pom kev tuaj nyob hauv peb nruab siab. Peb vam txog peb tus Huab Tais Yes Xus Pleev. Ua li.”
Cov ntseeg sawv daws nyias tuav nyias ib tug tswm ciab, nyias tuaj zes nyias tus tswm ciab ntawm tus Tswm Ciab Hla ua lub cim tias sawv daws tuaj txais kev pom kev tuaj ntawm Huab Tais Yes Xus tuaj.
Tsoom ntseeg tuav tswm ciab lawv Leej Choj qab mus hauv lub tsev teev Ntuj. Leej Choj nqa tus Tswm Ciab Hla. Sawv daws ncig 3 lwm hauv lub tsev teev Ntuj, Leej Choj nres 3 zaug, nws cev tus Tswm Ciab Hla rau cov ntseeg saib, nws tshaj tias “Yes Xus Pleev yog peb txoj kev pom kev.” Tsoom ntseeg teb tias “Peb ua Ntuj tsaug.”
Leej Choj txawb tus Tswm Ciab Hla rau saum ib tug ncej nyob ze lub rooj ua thaj txi Ntuj. Xib Hwb tsa suab ceeb toom tias “Kwv tij sawv daws, nej mloog zaj hu nkauj cav txog tus Tswm Ciab Hla uas yog lub cim hais txog Leej Pleev sawv rov los. Nyias tuav nyias tus Tswm Ciab, nyias mloog thiab ua Ntuj tsaug hauv nruab siab.”
Ces Leej Choj sawv ntsia tus Tswm Ciab Hla, nws hais zaj hu nkauj cav txog Yes Xus yog peb txoj kev pom kev tias
“Tas ib tsoom Tshiab ua Tswv Ntuj cov tub ncig, nej hom khaj zoo siab nyob saum ntuj, nej ua tej pab lom zem txais nej tus Huab Tais Yes Xus mus ntaus rog yeej rov los.
Tas ib zeej tsoom neeg nyob ntiaj teb, nej ntsia Yes Xus, nws yog lub hnub ci ntsa iab, nej zoo siab hu nkauj cav txog nej tus Huab Tais sawv los kaj tas lub qab ntuj neeg.
Tas ib zeej tsoom nyob hauv lub Koom Txoos, peb tus Huab Tais qhov pom kev dawb vog ntsauv nej, nej yuav zoo siab luag nyav mog!
Kwv tij sawv daws uas nej sib sau los ua lub txoos nyob ncig tus tswm Ciab Hla no, nej tsa suab nrog kuv cav txog Tswv Ntuj ua hwj huam yees ntxwv.”
Tas nrho sawv daws tshaj Huab Tais Yes Xus txoj kev sawv rov los zoo li no “As Les Lus Yas, Yes Xus sawv rov los. As Les Lus Yas, nws yeej txoj kev tuag. As Les Lus Yas.”
Leej Choj hu nkauj tias “Hmo no yog zoo hmo. Yog hmo Hla uas tus tseem Yaj Hla thaiv cov neeg ntseeg txog nws. Nws roj ntsha yeej peb txim txhaum, Tswv Ntuj nrog lub ntiaj teb neeg rov cog lus.
Hmo no yog zoo hmo. Yog hmo Tswv Ntuj thau peb cov yawg koob ntawm Hais Nkws Tos xeev ntuj, nws coj lawv hla dhau lub haiv txwv Liab, nws ci li hluav taws coj lawv kev mus.”
Tas nrho sawv daws tshaj Huab Tais Yes Xus txoj kev sawv rov los zoo li no “As Les Lus Yas, Yes Xus sawv rov los. As Les Lus Yas, nws yeej txoj kev tuag. As Les Lus Yas.”
Leej Choj hu nkauj tias “Hmo no yog zoo hmo, nyob thoob qab ntuj, cov neeg ntseeg txog Leej Pleev dim ntawm txoj kev tsaus, lawv hla dhau kev tuag, lawv los nyob hauv Tswv Ntuj haiv neeg Ntshiab.
Hmo no yog zoo hmo, Leej Txiv, koj hlub peb zoo tas nrho, koj tso koj Leej Tub tuaj npo ib co neeg tsis muaj nqe, koj saib peb yog ib co neeg ntshiab, tsuav yog peb ntseeg thiab vam txog koj Leej Tub.”
Tas nrho sawv daws tshaj Huab Tais Yes Xus txoj kev sawv rov los zoo li no “As Les Lus Yas, Yes Xus sawv rov los. As Les Lus Yas, nws yeej txoj kev tuag. As Les Lus Yas.”
Leej Choj hu ntxiv tias “Hmo no yog zoo hmo, yog hmo uas lub ntuj los xyuas lub ntiaj teb. Tswv Ntuj tsa cov neeg ntog rov sawv, Tswv Ntuj ua kom cov neeg ntxhov siab rov nyob kaj lug, Tswv Ntuj ua kom cov neeg sib ntxub rov sib hlub, Tswv Ntuj tsa nws txoj kev Cawm rau zeej tsoom pom xyeem.
Huab Tais Leej Txiv, hmo no peb nyob ze tus Tswm Ciab Hla no, uas yog Leej Pleev. Peb cav txog Leej Pleev sawv rov los rhuav qhov tsaus ntuj, Leej Pleev yog lub hnub tsis txawj poob qho, Leej Pleev kaj tas txhia haiv neeg. Peb tuaj txais kev kaj siab kev thaj yeeb ntawm nws, peb cav txog peb tus Huab Tais Yes Xus Pleev sawv hauv cov tub tuag rov los, thiab muaj txoj sia mus ib txhia ib txhis.”
Sawv daws hu nkauj tias “As Les Lus Yas, Yes Xus sawv rov los. As Les Lus Yas, nws yeej txoj kev tuag. As Les Lus Yas.”
Hmo Hla yog ib lub caij uas lub Koom Txoos Kav Tos Liv nyiam ua lub Cim Ntxuav rau cov neeg txais kev ntseeg tshiab. Cov ntawd yog ib co neeg xub kawm Ntuj kev caij ntev hauj sim, kwv yees li 2 xyoos tej. Thaum txog Hmo Hla, Leej Choj thiaj li pub lawv txais lub Cim Ntxuav. Hmo ntawd, cov txais lub Cim Ntxuav yuav cog lus rau Tswv Ntuj nyob ntawm tsoom ntseeg xub ntiag hais tias lawv nrauj dab phem, thiab txhua yam phem pov tseg, lawv yuav coj lub neej tshiab raws li Yes Xus lub Moo Zoo qhia. Hmo Hla, Leej Choj los Tswv Qhia yog tus ua lub Cim Ntxuav rau cov yauv txais lub Cim Ntxuav.
Thaum ua lub Cim Ntxuav, Leej Choj los Tswv Qhia xub hais 3 zag los nug cov yuav txais lub Cim Ntxuav.
1. Lawv puas nrauj kev teev dab hla Tswv Ntuj lus.
2. Lawv puas nruaj kev ua txhaum rau Tswv Ntuj.
3. Lawv puas nrauj Xas Tas kev haub kev ntxias.
Yog lawv nrauj 3 yam no, mas Leej Choj los Tswv Qhia mam li ua lub Cim Ntxuav rau. Thaum Leej Choj ua lub Cim Ntxuav, mas Leej Choj hliv dej rau saum cov txais lub Cim Ntxuav hauv pliaj, thiab hais tias “Kuv hu txog Leej Txiv, thiab Leej Tub, thiab Leej Ntuj Plig lub npe, los ntxuav koj.”
Leej Choj ua lub Cim Ntxuav zoo li ntawd, mas Huab Tias Leej Txiv, Huab Tais Leej Tub, thiab Huab Tais Leej Ntuj Plig tau ntxuav tus neeg ntawd tej txhaum pov tseg, ces cov txais lub Cim Ntxuav txia ua Tswv Ntuj cov me nyuam zoo nyiam, lawv tau txais Tswv Ntuj cov txiaj ntsim, lawv nplua nuj nyob hauv Tswv Ntuj cov txiaj ntsim tiag.
Hmo Hla kuj yog lub caij rau Leej Choj los Tswv Qhia ua lub Cim Txhab Zog rau cov txais lub Cim Ntxuav tshiab. Leej Choj los Tswv Qhia xub tsa tes rau saum cov neeg yuav txais lub Cim Txhab Zog, nws hais tias “Huab Tais muaj hwj huam tas nrho, koj tau ua kom cov tub txib thiab ntxhais txib nyob ntawm no lawv rov qab yug los tshiab, nyob hauv dej thiab nyob hauv Leej Ntuj Plig Ntshiab lawm. Koj tau ntxuav lawv cov txhaum tas huv tib si pov tseg. Peb thov kom koj xa Leej Ntuj Plig Ntshiab tuaj rau lawv. Peb thov koj xa tus tuaj ntawm Tswv Ntuj tuaj nplij neeg. Peb thov koj xa Leej Ntuj Plig Ntshiab 7 lub txiaj ntsim tuaj. Leej Ntuj Plig Ntshiab pub kev thoob tsib thiab kev txawj kev ntse. Leej Ntuj Plig Ntshiab pub kev xav tom ntej tom qab thiab kev muaj zog. Leej Ntuj Plig Ntshiab pub kev paub txuj thiab kev xyiv fab hawm Tswv Ntuj. Leej Ntuj Plig Ntshiab pub kev hwm Ntuj.”
Tswv Qhia los Leej Choj muab cov Roj Ntshiab tsa ua Leej Choj los pleev cov txais lub Cim Txhab Zog hauv pliaj. Nws hais rau ib leeg zuj zus tias “Thov kom Leej Ntuj Plig Ntshiab muab ib lub thwj los cim koj.” Ces tus txais lub Cim Txhab Zog teb tias “Ua li.”
Tus neeg txais lub Cim Txhab Zog, mas nws muaj Tswv Ntuj lub zog pab nws tiv dab phem tej kev haub ntxias. Nyob hauv nws lub neej, nws muaj tej yam zoo, tej yam dawb huv tuaj nyob hauv nws. Nws yuav ua ib lub neej tawg paj txi txiv nyob hauv txoj kev ua neeg zoo raws li tus Hauv Paus Xa Lus Paj Lug lo lus tias “Ib tug tib neeg mloog Leej Ntuj Plig Ntshiab, mas nws yuav txi tej lub txiv zoo li no; nws nyiam Tswv Ntuj, nws zoo siab ua neeg, nws nyob kaj siab lug, nws ua siab ntev, nws xyiv fab pab luag tej, nws ua siab zoo rau luag, nws tso siab rau luag, nws txawj hlub luag tej, nws txawj kav nws lub cev zoo. Cov neeg ntseeg uas lawv yog Huab Tais Yes Xus Pleev tug, mas lawv muab lawv lub cev thiab lub siab ntshaw ua phem tso pov tseg. Leej Ntuj Plig yog peb txoj sia, peb cia Leej Ntuj Plig Ntshiab coj peb lub neej” (NLT 5: 22-25).
Cov txais lub Cim Ntxuav thiab txais lub Cim Txhab Zog, mas sawv daw muab siab rau tiv dab phem thiab dab phem tej kev haub kev ntxias. Lawv ua raws li lo lus hauv Ntawv Ntshiab tias “Nej tau txais Huab Tais lub hwj huam nyob hauv nej. Nej thiaj yuav tiv yeej dab phem tej cuab yeej uas nws muab los ntxias nej. Peb tsis tsa rog ntaus ib co yeeb ncuab muaj nqaij, muaj ntshav, zoo li peb. Tab sis peb tsa rog ntaus cov Vaj dab phem. Vim li ntawd, peb thiaj yuav tsum hnav Tswv Ntuj lub tsho hlau. Ces thaum txog hnub phem nej thiaj tiv tau dab phem, nej thiaj nyob ruaj. Nej sawv ntsug mog, nej muab qhov tseeb los sia nej duav, nej muab txoj kev ncaj ua tsho hlau hnav. Nej muab lub siab kub lug los ua khau rau, mus xa lub Moo Zoo txoj kev tseeb. Nej tuav rawv txoj kev ntseeg ntawm tes xws li ib daim leem phiaj, ces nej yuav tua tau tus phem cov xub tswm faj. Nej yuav txais Leej Ntuj Plig Ntshiab rab ntaj uas yog Tswv Ntuj lo lus, nej yuav coj ib lub neej teev Ntuj thiab thov Ntuj tsis tseg. Nej yuav tsis ntshai tshaj cov txuj zais tob tob hauv lub Moo Zoo” (EFX 6: 10-19).
Cov neeg ntseeg uas lawv nyuam qhuav txais lub Cim Ntxuav thiab txais lub Cim Txhab Zog lawm, mas lawv muaj peev xwm txais lub Cim Yug.
Lub Cim Yug yog cov txhiam xws yug neeg tus ntsuj plig kom muaj zog tiv kev phem, ua kom peb muaj zog mus cuag Tswv Ntuj. Li ntawd, niaj zaug thaum ua thaj Txiv Ntuj mas cov neeg ntseeg thaj kub siab txais lub Cim Yug, lawv txais Huab Tais Yes Xus tuaj nrog lawv nyob; Huab Tais Yes Xus yog lawv lub zog.
