Tus sau: TP. Nyiaj Pov (Tim 1 lub 9 hlis 1998)
Kwv tij nyob hauv zaj paj lug no Yes Xus xav qhia 2 yam rau peb.
Yam ib uas Yes Xus xav qhia yog zoo li no : thaum peb thov ib yam ntawm Tswv Ntuj, tej zaus Tswv Ntuj tsis pub yam peb tos sai sai tam sim no. Peb yuav tsis txhob ntau siab me. Peb rov thov Ntuj tas zog tsis tseg.
Tej zaus peb yuav tsum thov ntev hli los ntev xyoo. Peb ua xws li tus poj ntsuam thov tus nom txiav txim ntau zaus. Tus nom txiav txim tub nkeeg thiab siab phem. Nws txhob txwm ziab ntev ntev, saib tus poj ntsuam mas yuav tso tseg. Tab sis vim tus poj ntsuam rov thov ntxiv tsis tseg mas tus nom tub nkeeg uas raws li tus poj ntsuam thov.
Yes Xus hais tias Tswv Ntuj yog tus siab zoo mas nws yeej yuav pub txiaj ntsim rau tus neeg thov nws. Li ntawd peb thov Tswv Ntuj tsis tseg tiag. Xws li Leej Ntshiab Mos Nis Kas, nws pom nws tus tub Aus Nkus tsis quav ntsej txais lub Cim Ntxuav. Mos Nis Kas thov Ntuj 15 xyoo ces Tswv Ntuj tshoj tus tub Aus Nkus thiab Aus Nkus txiav siab txais lub Cim Ntxuav. Tej tus poj niam Hmoob tsis muaj me nyuam, lawv thov Ntuj peb xyoo los plaub xyoo ces xeeb tub. Tej tus neeg raug mob, lawv ntshai tias yuav tuag sai. Lawv thov Ntuj yim cuaj xyoo hos lawv tseem nyob ua tau hauj lwm zoo hauj sim vim lawv thov tas zog kom Ntuj ntxiv zog rau lawv lub cev.
Ua li peb mloog Yes Xus lo lus qhia peb kom peb thov Ntuj tsis tseg, txhob ntau siab me. Tswv Ntuj yuav pub nws lub txiaj ntsim rau peb.
Tseem tshuav ib yam ntxiv uas Yes Xus xav qhia rau peb hauv zaj paj lug hais txog tus poj ntsuam thov tus nom tsis tseg no.
Yog yus rov thov Tswv Ntuj ntev ntev tsis tseg mas Tswv Ntuj tsis nyob dag ntsia yus xwb. Tswv Ntuj ua kom yus lub siab loj tuaj. Tswv Ntuj ua kom yus maj mam to taub yus lub neej zoo dua zuj zus. Ces ntev mus yus lub tswv yim xav zoo li Tswv Ntuj lub tswv yim. Ces yog ib lub txiaj ntsim loj uas Tswv Ntuj pub rau yus vim yus thov nws tas zog, yus tsis ntaus siab me. Tswv Ntuj paub yus zoo dua yus paub yus. Nws txawj pub tej paj tshab zoo heev rau yus.
Thaum yus thov Tswv Ntuj, yog Tswv Ntuj pub tam sim no qhov yus thov mas Tswv Ntuj ua zoo li ob niam txiv pub tas txhia yam rau tus me nyuam thov, ces tus me nyuam ua neeg twm xeeb tsis xav tswv yim dab tsi, nws tsuas txawj taij kom tau raws li lub siab twm xeeb ntshaw xwb. Ob niam txiv yuav tsum ceev faj pab tus me nyuam xav tswv yim kom nws thov tej yam tseem ceeb zoo rau nws lub neej. Tswv Ntuj kuj ua li ntawd rau peb : tej zaus peb thov tej yam uas Tswv Ntuj tsis pom zoo pub. Tab sis yog peb thov tas zog ntev ntev mas Tswv Ntuj ua kom peb txawj xav zoo li nws xav. Li ntawd peb txhob xam tias Tswv Ntuj tsis pub txiaj ntsim. Vim Tswv Ntuj pub txiaj ntsim tiag : nws pub ib lub tswv yim thiab ib lub siab tshiab rau peb. Li ntawd peb kav tsij ua xws li Yes Xus hais : peb thov Tswv Ntuj tas zog. Txhob ntaus siab me. Tswv Ntuj yeej pub yam zoo rau peb.