Tus sau: TP. Nyiaj Pov (Tim 1 lub 9 hlis 1998)
Nyob hauv peb tsoom Hmoob, nyob hauv peb cov zej zos muaj tej tus uas lawv zoo li tus Fas Lis Xais thiab muaj tej tus uas lawv zoo li tus sau se.
Cov uas lawv zoo li tus Fas Lis Xais yog cov Hmoob ua lawv xam tias lawv lub siab ncaj dua luag tej. Lawv tsis pluag, lawv muaj lub tsev huv hauj sim. Hauv lawv tsev neeg tsis muaj tus coj yam ntxwv phem. Lawv tsis thab plaub. Zaum puav lawv pab luag tej me ntsis. Lawv nyob hauv pab txwj laus saib zej zog. Yog lawv teev Ntuj mas lawv yuav sawv xws li tus muaj hwj chim. Lawv yuav hais rau Tswv Ntuj tias :
“Tswv Ntuj, kuv ua koj tsaug vim kuv txoj hmoov zoo. Luag saib kuv muaj tsim. Kuv tsis ua tub sab ib zaug li. Thaum zej zog sau nyiaj pab ub pab no, kuv pub kuv cov nyiaj pab ntau dua luag tej. Kuv tsis raug plaub ntug.” Tus neeg saib tias nws yog ib tug zoo mas nws hais tej yam li ntawd rau Tswv Ntuj, nws teev Ntuj xws li tus Fas Lis Xais.
Nyob hauv peb tsoom Hmoob kuj muaj tej tus zoo li tus sau se thiab.
Cov zoo li tus sau se yog cov raug luag thuam. Yog cov nto moo tsis zoo, xws li nyob Yes Xus teb chaws cov sau se nto moo tsis zoo : lawv tsis ua phem dua luag tej tab sis lawv nto moo tsis zoo vim lawv sau se. Nyob peb tej zos Hmoob kuj muaj cov nto moo tsis zoo. Tej zaus yog vim lawv pluag, lawv poob nyiaj txiag. Tej zaus lawv raug kev mob nkeeg ntau ces lawv ua tsis tau lub neej xws luag.
Los tej zaus lawv tau ua txhaum, ces lawv raug plaub ntug, lawv poob ntsej muag ib zaug. Los tej zaus lawv tsis ntse pes tsawg ces lawv tsis txawj tsim nyiaj txiag me ntsis xws luag. Ces lawv pom tias zej zog tsis saib lawv muaj nqi dab tsi. Lawv zoo li tus sau se nyob hauv Yes Xus zaj paj lug.
Yog cov Hmoob ntawd teev Ntuj mas lawv tsis muab hlob. Lawv paub meej kawg tias lawv tsis muaj nqi. Ces lawv tsuas txawj hais rau Tswv Ntuj tias : “Tswv Ntuj, kuv yog ib tug neeg txhaum, thov koj hlub kuv !”
Kwv tij, Yes Xus pom tias nyob hauv tas txhia pab neeg muaj tej tus zoo li tus Fas Lis Xais thiab muaj tej tus zoo li tus sau se. Yes Xus kuj pom tias nyob hauv peb tsoom Hmoob kuj muaj ob hom neeg ntawd.
Yes Xus hais dab tsi rau peb ? – Yes Xus hais tias peb sawv daws huv si yuav tsum rov saib peb tias peb yog ib co neeg muaj txhaum ntau nyob ntawm Tswv Ntuj xub ntiag. Tswv Ntuj yog tus siab ntshiab huv. Tab txawm yus yog ib tug neeg nto moo zoo los nto moo phem nyob ntawm neeg xub ntiag mas nyob ntawm Tswv Ntuj xub ntiag yus mam yog ib tug pluag tas nrho. Yus tej koob hmoov yog yaj ntshis. Yus tsuas muaj tib qhov chaws tso siab xwb : yog Tswv Ntuj lub siab hlub neeg xwb. Nyob ntawm Tswv Ntuj xub ntiag yus yog ib tug neeg me.
Tab txawm yog tus txoov Tim Tswv kav lub kuj cuab loj tshaj nyob ntiaj teb los yog tus poj niam nrhiav kev plees kev yi, mas nyob ntawm Tswv Ntuj xub ntiag lawv puav leej yuav rov saib lawv yog neeg me.
Tab txawm yog tus hauv zos los yog tus neeg loj leeb mas nyob ntawm Tswv Ntuj xub ntiag lawv puav leej yuav rov saib lawv yog neeg me.
Yus yuav muab yus tej koob hmoov los ua nqis muas Tswv Ntuj lub txiaj ntsim tsis tau.
Yus kawg yuav thov kom Tswv Ntuj pub nws tej txiaj ntsim dawb rau yus xwb.
Yus xav thov Leej Txiv Tswv Ntuj cov paj tshab mas yus kawg vam txog nws Leej Tub Yes Xus nrog yus thov Leej Txiv .
Kwv tij, Yes Xus xaus nws zaj paj lug hais txog tus Fas Lis Xais thiab tus sau se mus hauv lub tsev teev Ntuj mas Yes Xus hais lo lus no : “Tus uas nws tsa nws siab, Ntuj yuav ua kom nws qis. Tus rov saib nws qis, Ntuj tsa kom nws siab.”
Kwv tij, peb yuav rov saib peb yog neeg qis, vim peb yog neeg qis tiag. Peb sawv daws yog neeg qis. Tab sis peb zoo siab luag ntxhi vim peb paub tias Yes Xus tej koob hmoov yog peb qhov chaw nplua nuj. Huab Tais Leej Txiv txais peb nrog Yes Xus tuaj cuag nws.
Nej puas ntseeg tias Yes Xus yog tus cawm peb ?