Phau Ntawv Ntshiab piav zaj hais txog Tswv Ntuj tsim ob niam txiv hauv paus, mas peb txhob xav tias yog ib zag dab neeg sib piav ua si xwb. Peb yuav saib zaj no yog Tswv Ntuj ib co lus qhia tej zaj tswv yim tob rau peb. Peb pom tias Tswv Ntuj tsim thawj tug txiv neej thiab thawj tus poj niam nkawd muaj hwj chim thiab muaj txiaj ntsim ntau. Tab sis peb niaj hnub pom cov txiv neej thiab cov poj niam nyob ntiaj teb no coob leej ua ntau yam txhaum tsis phim neeg, yog vim li cas tsoom tib neeg thiaj poob thiab pheeb rau txoj kev ua txhaum?
Phau Ntawv Hauv Paus muaj ib zag piav txog qhov ntawd; Tswv Ntuj tsim tib neeg muaj tsim tab sis Tswv Ntuj kuj xav kom tib neeg coj tus yam ntxwv ntshiab huv ua puav pheej tias tib neeg tsim nyog cov txiaj ntsim uas Tswv Ntuj pub rau ob niam txiv hauv paus.
Phau Ntawv Hauv Paus hais txog ib zaj, yog zoo li ib zag dab neeg tab sis tsis yog dab neeg ua si, yog ib zag qhia tej yam tob hais txog neeg nruab siab.Zaj hais txog As Das thiab Es Vas nkawd noj cov txiv ntoo uas Tswv Ntuj txwv tsis pub noj mas yog ib tug piv txwv qhia tias Tswv Ntuj tsim nkawd muaj lub siab twj lij, nkawd muaj peev xwm xaiv txoj kev mloog Tswv Ntuj los tsis mloog Tswv Ntuj. Nkawd puas yuav zoo siab mloog Tswv Ntuj lo lus qhia, los nkawd puas yuav muab hlob xav ua ib co huab tais xws li Tswv Ntuj?
Ua ntej As Das thiab Es Vas yuav ua txhaum, nkawd nyob hauv lub vaj lom zem, nkawd mloog Tswv Ntuj hais, nrog Tswv Ntuj sib fim zoo, nkawd nyob sib pab sib nres. Tab sis thaum nkawd tsis mloog Tswv Ntuj lawm, txhua yam hloov tas, nkawd ntshai Tswv Ntuj, nkawd tsis sib haum.
Peb pom tias tus nab tuaj nrog Es Vas tham, tus nab txawj hais cov lus kom Es Vas ua xyem xyav txog Tswv Ntuj kev nyiam thiab Tswv Ntuj lub siab zoo. Tus nab thiaj li tsis hais tias puas yog Tswv Ntuj txwv tsis pub noj tsob ntoo tuaj nruab nrab hauv lub vaj, tus nab tsuas nug tias puas yog Tswv Ntuj txwv tsis pub noj txhua yam ntoo hauv lub vaj (HP 3: 1). Es Vas teb tias nkawd noj tau tas cov txiv ntoo hauv lub vaj, tshwj kiag tsob ntoo paub qhov zoo thiab qhov phem, yog nkawd kov los nkawd noj, mas nkawd yuav tuag (HP 3: 2-3). Tus nab ntxias kom Es Vas mloog nws hais, tus nab dag tias yog nkawd noj tsob ntoo Tswv Ntuj txwv, mas nkawd yeej yuav tsis tuag. Tus nab hais ntxiv tias tos Tswv Ntuj txwv tsis pub noj vim yog nkawd noj thaum twg, mas nkawd ‘qhov muag yuav qhib’, ces nkawd yuav paub qhov zoo thiab qhov phem ib yam li cov tswv ntuj (HP 3: 5).
Qhov tseeb tsis yog tus nab txawj hais lus, ces nws los nrog Es Vas tham. Tab sis tus nab yog piv txwv los yog paj lug qhia tias Xas Tas nkag los nyob hauv peb lub siab xws li tus nab. Yog yus tsis ceev faj, mas yus yuav tsis pom tsis hnov tias Xas Tas tab tom los ntxias yus lub siab kom ua qhov tsis haum rau Tswv Ntuj.
Es Vas mloog tus nab cov lus tas, nyob hauv nws nruab siab, nws pib xav tias yog muaj li tus nab hais, mas Tswv Ntuj tsis muab cai rau nkawd noj tau txhua yam txiv ntoo ywj nkawd siab. Es Vas ntsia lub txiv pom tias zoo noj ntxim noj thiab pab kom nws paub qhov zoo qhov phem li cov tswv ntuj. Nws xav ua tus zoo li cov tswv ntuj, nws thiaj li tsis mloog Tswv Ntuj cov lus txwv (HP 3: 6). Es Vas qhov txhaum yog qhov no, yog nws xav ua tus loj. Li ntawd, neeg lub keeb txhaum thiaj li yog ‘KEV MUAB HLOB’.
Qhov no peb yuav pom tias kev txhaum pib sawv thaum peb pib yuav li Xas Tas hais.
Noj tas, As Das thiab Es Vas qhov muag qhib plho, nkawd paub hlo lawm tias yog nkawd tau ua yuam kev lawm. Nkawd pom tias nkawd liab qab tsis muaj hwj chim dab tsi li, ces nkawd txaj muag, nkawd thiaj muab nplooj ncuav pias los npog nkawd lub cev (HP 3: 7). Nkawd xav tsiv nraim kom ib tug tsis txhob pom ib tug.
Tswv Ntuj tuaj ncig lub vaj, As Das thiab Es Vas ntshai Tswv Ntuj, ces nkawd tsiv nraim (HP 3: 8-10). Tswv Ntuj nug nkawd, ces As Das liam tias yog Es Vas muab lub txiv rau nws noj. As Das hais tias “Yog tus poj niam uas koj tso nyob ze kuv, muab lub txiv rau kuv noj, ces kuv thiaj noj” (HP 3: 12). As Das lo lus no tsis yog nws liam rau Es Vas xwb, nws tseem liam txim rau Tswv Ntuj thiab, yog Tswv Ntuj tsis muab Es Vas tso nyob ze nws, mas nws yeej yuav tsis noj. Es Vas tsis pom nws qhov txhaum, nws tseem hais tias yog tus nab ntxias nws (HP 3: 13).
As Das thiab Es Vas nkawd ua txhaum, ces nkawd paub txaj muag rau nkawd lub cev, nkawd ntshai Tswv Ntuj, thiab nkawd pib tsis sib haum xeeb.
Tswv Ntuj thiaj li foom lus phem rau tus nab (HP 3: 14-15) thiab hais qhia rau As Das thiab Es Vas tias txij no mus nkawd yuav ntsib kev txom nyem tas nkawd sid. Tswv Ntuj hais rau Es Vas tias “Kuv yuav ua kom koj muaj mob ntau thaum koj xeeb tub xeeb ki. Koj yuav tau mob tau ntsaj, koj thiaj yug tau me tub me nyuam. Tsis kav koj tseem yuav ntshaw koj tus txiv tiam sis nws yuav tswj koj” Tswv Ntuj hais rau As Das tias “Koj yuav siv zog khwv tas koj lub neej koj thiaj tau noj. Koj ntsej muag yuav tawm hws lug, koj thiaj tau noj, mus txog hnub koj rov mus ua av” (HP 3: 16-19). Yog li mas Tswv Ntuj cov lus foom hmoov kom nkawd yeej meem tsim noob neej thiab yeej meem huam vam (HP 1: 28) thiaj txia ntshis ua ‘kev mob kev ntsaj’. Tus txiv neej thiab tus poj niam nkawd txoj kev sib pab sib nres (HP 2: 20) txia ntshis los ua ‘kev sib ntshaw sib tswj’. Tswv Ntuj tsis tau foom lus phem rau txoj hauj lwm Tswv Ntuj pub rau tib neeg ua, tab sis vim As Das thiab Es Vas ua txhaum, mas nkawd thiaj ntsib kev txom nyem thaum lawv ua hauj lwm. As Das thiab Es Vas tsis mloog Tswv Ntuj hais, mas ntiaj teb thiaj li tsis mloog nkawd ntxiv, ces av thiaj yuav tuaj pos tuaj nrhab rau nkawd.
Tswv Ntuj ntuas As Das kom nco ntsoov tias vim nws ua txhaum, mas txij no mus nws lub cev yuav tsis nyob mus li. Tswv Ntuj hais tias “Koj yog av luaj, ces koj yuav rov mus ua av luaj” (HP 3: 19).
Tswv Ntuj tau cog lus tias muaj ib hnub twg, tus poj niam caj ces yuav tsuj tus nab taub hau (HP 3: 15). Tswv Ntuj lo lus no yog thawj lub moo zoo hais txog tus yuav tuaj cawm ntiaj teb neeg ntawm txoj kev txhaum. Tom qab no peb mam paub tias tus ntawd yog Huab Tais Yes Xus.
Tab txwm As Das thiab Es Vas ua txhaum, tsis kav Tswv Ntuj tseem hlub nkawd, mas Tswv Ntuj thiaj muab tawv tsiaj los ua tsoo rau nkawd hnav (HP 3: 21). Tos Tswv Ntuj tsis muab nplooj ncuav pias ua tsoo rau nkawd hnav vim tias npooj ntoos nyob tau tsis ntev yuav qhuav mus, ces As Das thiab Es Vas nkawd yuav rov liab qab dua. Tswv Ntuj thiaj li ua ib siab muab ib tug tsiaj tua kom tau lawv nws daim tawv los ua tsoo npog nkawd lub cev qhov txaj muag thiab tsis muaj tsim. Qhov no tsom kom pom txog Huab Tais Yes Xus yeem ua tus Yaj txi Tswv Ntuj kom tau hliv nws cov ntshav los ntxuav neeg cov txhaum kom neeg rov sawv taus nyob ntawm Tswv Ntuj xub ntiag.
Tswv Ntuj tshem nkawd tawm hauv lub vaj mus, thiab Tswv Ntuj tso ib co Tshiab Kes Lus Npis zov lub vaj (HP 3: 23-24). Cov Kes Lus Npis yog Tswv Ntuj cov Tshiab ua txoj hauj lwm zov tej chaw ntshiab. Yog li cov Yus Das thiaj xaws cov Kes Lus Npis tus duab cia rau ntawm daim ntaub thaiv kem ntshiab hauv lub Tuam Tsev Teev Ntuj. Thaum Huab Tais Yes Xus tuag, daim ntaub ntawd ntuag ua 2 sab txij yav saud thoob plaws rau hauv taw (MT 27: 51) txhais tias txij hnub ntawd must us twg vam txog Huab Tais Yes Xus, tus ntawd mus cuag Tswv Ntuj tau.
Peb tau dab tsi ntawm ntawv zaj hais txog ‘neeg poob rau kev txhaum’?
1. Peb paub tias niaj hnub yeej muaj ib lub suab hais lus ntxias peb tsis tseg kom ua xyem xyav txog Tswv Ntuj. Yog peb tsis xav qaug qav rau cov lus ntxias no, mas peb yuav tsis txhob hla Tswv Ntuj cov lus.
2. Thaum peb ua txhaum ua yuam kev, peb puas tsiv nraim thiab liam txim rau lwm tus zoo li As Das thiab Es Vas nkawd; los peb yuav tu siab thiab lees txhaum rau Tswv Ntuj?
3. Tab txawm As Das thiab Es Vas ua txhaum, los Tswv Ntuj tseem muab ib lo lus ua chaw tso siab rau nkawd thiab Tswv Ntuj tseem hlub nkawd. Li ntawd, kom peb ras tias tsis muaj ib txoj txhaum dab tsi yuav loj dua Tswv Ntuj lub siab hlub thiab Tswv Ntuj txoj kev zam txhaum.
4. Thaum peb ntsib kev txom nyem, mas peb ras tias tsis yog Tswv Ntuj rau txim rau peb, tab sis yog vim neeg lub keeb txhaum. Tab sis Tswv Ntuj hlub peb, nws tso nws Leej Tub tuaj pab ris peb cov txhaum. Li ntawd, peb yuav muab peb kev txom nyem no koom nrog Huab Tais Yes Xus kev txom nyem cev ua txim txi rau Tswv Ntuj.
5. Huab Tais Yes Xus nyiam cov neeg ntseeg txog nws, Huab Tais Yes Xus thiaj yeem tuag kom tau txhiv sawv daws. Peb pom li no mas peb yuav yoog raws, mas peb thiaj yuav txawj sib hwm sib pab sib nres.
