Thawj txoj kab qhib ntawv Cov Paj Lug hais tias cov paj lug hauv phau ntawv no yog tus vaj Xas Los Moos cov paj lug (CPL 1: 17). Tab sis thaum peb nyeem phau ntawv Cov Paj Lug mas peb pom tias tsis yog ib tug neeg xwb tau sau phau ntawv no, vim muaj ib co lus phim cov neeg nyob tiam 10 ua Yes Xus ntej, ib co lus phim cov neeg tiam 7 ua Yes Xus ntej, thiab tej zaj phim cov neeg nyob tiam 5 ua Yes Xus ntej.
Nyob hauv ntawv Cov Paj Lug muaj ob ntu xub sau dua cov yog ob ntu khaws Xas Los Moos cov lus ntuas tseg; yam li Xas Los Moos 375 lo lus ntuas thiab Xas Los Moos 128 lo lus ntuas. Tej zaus tsis yog tus vaj Xas Los Moos sau cov lus ntawd tib si tab sis ntshai yog lub caij Xas Los Moos ua vaj nws kom lawv khaws nws cov lus ntuas tseg. Thaum Es Xes Kias ua vaj kav Yus Das teb (300 xyoo tom qab Xas Los Moos), nws kom cov Kws Ntawv rov sau Xas Los Moos 128 lo lus ntuas.
Xas Los Moos cov lus ntuas yog ib co lus ntuas zoo li cov neeg teev dab lus ntuas ntau. Nws tsuas hais tias tus mus taug kev ua ncaj, kev hlub luag tej, kev nyiam ua neeg me, kev thoob tsib; mas tus neeg ntawd tau Ntuj pov hwm nws. Xas Los Moos cov lus ntuas tsuas muaj 1 feem 7 xwb thiaj hais txog Tswv Ntuj.
Nyob hauv ntawv Cov Paj Lug tseem muaj tej tus neeg thoob tsib lawv cov lus, muaj lo puav lus yog tuaj ntawm cov neeg thoob tsib Hais Nkws Tos thiab Mes Xos Pos Tas Mias tuaj, thiab muaj ob tug neeg thoob tsib As Las Npias nyob Mas Xas teb cov lus ntuas. Li ntawd, mas cov His Xas Lais hwm cov pej kum neeg thoob tsib. Cov neeg thoob tsib ntawd lawv cov lus phim yog tiam 7 lawv thiaj sau tseg; yog lub caij tseem tsis tau mus nyob txim nyob Npas Npis Los teb.
Thaum txog tiam 5 ua Yes Xus ntej, cov Yus Das rov los nyob Yes Lus Xas Les, lawv sau tej zaj ntxiv rau cov paj lug lawv khaws tseg, ces thiaj tau phau ntawv Cov Paj Lug raws li niaj hnub no. Cov zaj lawv sau ntxiv rau yog cov paj lug hais txog kev thoob tsib thiab tus zoo poj niam.
Ntawv Cov Paj Lug muaj tag nrho 9 ntu 31 zaj.
- Kev thoob tsib cov lus ntuas (CPL 1-9) yog ib co lus hais tias txoj kev thoob tsib yog tuaj ntawm Tswv Ntuj tuaj. Kev thoob tsib zoo li ib tug huab tais ib txwm nyob ze Tswv Ntuj thiab nrog Tswv Ntuj tsim lub ntuj lub teb. Li ntawd, yog zoo li lawv cav tias muaj ib tug Huab Tais Thoob Tsib nyob ze Tswv Ntuj, los Tswv Ntuj yog tus Thoob Tsib ntawd.
- Xas Los Moos 375 lo lus ntuas (CPL 10-22: 16).
- Cov neeg thoob tsib thawj cov lus ntuas (CPL 22: 17-24: 22).
- Cov neeg thoob tsib lwm cov lus ntuas (CPL 24: 23-34)
- Xas Los Moos 128 lo lus ntuas (CPL 25-29).
- Tus Mas Xas hu ua As Nkus cov lus (CPL 30: 1-14)
- Cov paj lug muaj xam phaj (CPL 30: 15-33).
- Tus vaj Mas Xas hu ua Les Mus Es cov lus (CPL 31: 1-9).
- Tus zoo phooj ywg los yog ‘tus zoo poj niam’ (CPL 31: 10-31) yog cov lus hwm tsoom poj niam.