Yam ua kom neeg tsis huv (MT 15: 1-2, 10-14)
Kwv tij Hmoob sawv daws, cov Fas Lis Xais thiab cov Kws Ntawv Ntshiab lawv yog cov coj Mais Xes txoj cai nruj, ces thaum lawv pom Huab Tais Yes Xus cov thwj tim noj mov tsis ntxuav tes, mas lawv saib tias yog cov thwj tim tsis ua raws li cov kab ke ib txwm ua los. Cov Yus Das lawv hais tias tus neeg twg nws tawm rooj mus qhov ub qhov no, nws ua hauj lwm li ub li no, mas nws tes yuav tsuas tej yam tsis huv, ces yog nws noj mov mas tej tsis huv ntawd yuav nkag rau hauv nws lub cev ua rau lub cev tsis huv. Niaj hnub no cov kws tshuaj yeej qhia peb ib yam li ntawd vim nyob ib ncig peb muaj tej kab mob qhov muag ntsia tsis pom ntau, yog peb tsis xav kom muaj mob, mas peb yuav xub ntxuav tes kom huv tso. Cov Fas Lis Xais thiab cov Kws Ntawv Ntshiab hais raug kawg, tab sis muaj ib yam lawv ua tsis raug, yog qhov tias nyob hauv lawv tsis muaj lub siab nyiam thiab hlub luag tej, lawv hais rau Huab Tais Yes Xus tsis yog lawv hlub cov thwj tim tab sis yog lawv saib tias cov thwj tim hla lawv cov kab ke.
Cov Fas Lis Xais hais li ntawd tas, mas Huab Tais Yes Xus hais rau lawv tias lawv ua zoo li yog neeg zoo tab sis qhov tseeb lawv muab cov kab ke ntawd los rhuav Tswv Ntuj lo lus, lawv muab neeg cov kab ke saib tseem ceeb dua Tswv Ntuj txoj cai. Huab Tais Yes Xus thiaj li hu cov neeg tuaj mloog nws kom txav los ze, ces nws hais rau lawv tias yam uas neeg noj ntawm ncauj mus rau hauv lub cev tsis ua tau kom neeg lub cev tsis huv; yam ua kom neeg lub cev tsis huv mas yog yam tawm hauv neeg lub ncauj los. Yam ntawd yog dab tsi?
Yog lo lus thiab zaj tswv yim tawm ntawm neeg lub ncauj thiab lub siab los.
Cov thwj tim hais tias Huab Tais Yes Xus hais li no ua rau cov Fas Lis Xais tsis txaus siab. Huab Tais Yes Xus thiaj li hais rau cov thwj tim kom tsis txhob quav ntsej txog cov Fas Lis Xais, nws hais tias cia lawv chim lawv, lawv yog ib co neeg dig muag coj ib pab dig muag kev.
Kwv tij Hmoob, peb tsum ua zoo xaiv tus coj peb kev hla lub ntiaj teb no. Tus coj kev zoo tshaj yog Huab Tais Yes Xus, peb yuav xaiv Huab Tais Yes Xus ua tus coj peb, peb yuav mloog Huab Tais Yes Xus cov lus qhia vim tias Huab Tais Yes Xus cov lus yog cov lus pub txoj sia, nws qhia peb kom txawj nyiam Tswv Ntuj thiab hlub ntiaj teb neeg.
Kwv tij Hmoob, hnub no peb khaws 3 yam no coj mus ua raws:
1. Peb yuav xav zoo, hais cov lus pab thiab neeg lub neej kom sawv taus siab.
2. Peb yuav muab lub siab nyiam siab hlub saib ua qhov loj nyob hauv peb kev ua neej.
3. Peb yuav muab siab rau kawm Tswv Ntuj cov lus uas Huab Tais Yes Xus tuaj qhia rau peb.
