Thaum peb thov Ntuj, mas ntau zaus Tswv Ntuj sim peb saib puas ntseeg tiag (MT 15: 21-28)
Kwv tij Hmoob, nyob hauv zaj Ntawv Moo Zoo hnub no, thaum tus poj niam Kas Nas Has pom Huab Tais Yes Xus tuaj txog hauv lawv lub zos, nws pom nws tus me nyuam raug ib tug mob hnyav dhau, mas nws hlub tus me nyuam kawg, ces nws ua siab loj tuaj txhos caug ntawm Huab Tais Yes Xus ko taw taij thov Huab Tais Yes Xus pab nws tus ntxhais. Thaum nws thov ntawd, mas Huab Tais Yes Xus nyob twj ywm tsis teb dab tsi. Tus poj niam taij tsis tseg ua rau cov thwj tim meem txom, lawv thiaj li hais rau Huab Tais Yes Xus kom pab tus poj niam ntawd. Huab Tais Yes Xus xav sim tus poj niam Kas Nas Has lub siab ntseeg, mas Huab Tais Yes Xus txhob txwm hais tias Tswv Ntuj xa nws tuaj cawm cov His Xas Lais xwb. Tus poj niam Kas Nas Has hnov li ntawd, los nws tsis tag kev tso siab, nws tseem txav los txhos caug ze dua qub taij thov tas zog. Zaum no Huab Tais Yes Xus hais rau nws tias tsis phim yuav muab me nyuam tej mov pov rau me nyuam dev noj (MT 15: 26). Huab Tais Yes Xus lo lus no yog ib lo lus hnyav, vim tias cov Yus Das saib tias tsuas yog lawv xwb thiaj yog haiv neeg Tswv Ntuj nyiam, lwm haiv neeg xws li cov Kas Nas Has mas Tswv Ntuj saib zoo li yog tej tsiaj xwb.
Huab Tais Yes Xus hais lus hnyav li ntawd rau nws, tsis kav nws tsis chim tsis npau taws dab tsi, nws tseem ua tib zoo lees tias “Huab Tais, yog li koj hais. Tab sis cov me nyuam dev tsuas noj tej tsig mov txeej ntawm lawv tus tswv lub rooj los xwb!” (MT 15: 27). Nws teb li no mas yog nws yeej paub zoo tias nws yog cov pej kum neeg tsis phim rau Tswv Ntuj nyiam thiab muab saib rau nqe dab tsi, tab sis nws vam tias Tswv Ntuj yuav hlub yuav khuv leej nws zoo li tus tswv tsev hlub nws tus me nyuam dev tshaib tshaib plab, ces muab pob txha rau tus me nyuam dev tau kaws cawm siav.
Qhov kawg Huab Tais Yes Xus hais dab tsi rau tus poj niam Kas Nas Has? Huab Tais Yes Xus hais tias “Niam phauj, koj lub siab ntseeg loj kawg. Kom koj tau raws li koj lub siab xav” (MT 15: 28).
Kwv tij Hmoob sawv daws, Tswv Ntuj Lo Lus hnub no xav qhia rau peb tias ntau zaus peb thov Ntuj kom Tswv Ntuj pab peb, mas peb pom tias ua cas Tswv Ntuj tsis pub rau peb raws li peb thov. Tsis yog Tswv Ntuj tsis quav ntsej peb, tsis xav pab peb; tab sis:
1. Tswv Ntuj xav sim peb saib peb lub siab ntseeg puas ruaj;
2. Tswv Ntuj xav kom peb ua tiag thov Tswv Ntuj tsis tseg, txhob ntaus siab yau, txhob tag kev tso siab rau Tswv Ntuj;
3. Thaum peb thov Ntuj mas Tswv Ntuj xav kom peb cia siab rau Tswv Ntuj lub siab hlub, peb ua neeg me tiag tiag los thov.
