Mloog Huab Tais Yes Xus mog (MT 17: 1-9)
Kwv tij Hmoob sawv daws, ua ntej Huab Tais Yes Xus yuav pub nws lub hwj chim rau Pob Zeb, Yas Kos, thiab Zam pom, mas Huab Tais Yes Xus xub tau qhia lawv tias lawv nce mus pem Yes Lus Xas Les zaum no, mas cov txwj laus, cov leej choj, thiab cov Kws Ntawv Ntshiab yuav muab nws tua. Huab Tais Yes Xus qhia lawv li ntawd, mas cov thwj tim ntxhov siab kawg (MT16: 21-23). Yog li mas Huab Tais Yes Xus thiaj li coj Pob Zeb, Yas Kos, thiab Zam nrog nws nce mus teev Ntuj pem roob thiab pub nws lub hwj chim tawm tuaj rau lawv pom, kom lawv rov ua tau siab loj. Yog lawv peb leeg no nco tau, mas thaum txog hnub Huab Tais Yes Xus raug tsim txom thiab muab tua saum Ntoo Cuam, mas lawv yuav paub tias txoj kev tuag ua tsis tau dab tsi rau Huab Tais Yes Xus.
Peb tus thwj tim pom Mais Xes thiab Es Lias tawm tuaj nrog Huab Tais Yes Xus tham (MT 17: 3). Ua cas thiaj li yog Mais Xes thiab Es Lias, ho tsis yog lwm tus? Vim tias Mais Xes yog tus tam ‘cov Yus Das txoj cai’ thiab Es Lias yog tus tam ‘cov Yus Das cov Yaj Saub’. Nkawd los sawv ze ntawm Huab Tais Yes Xus yog daim duab qhia tias Huab Tais Yes Xus yog qhov nruab nrab thiab yog tus ua kom Tswv Ntuj kev cawm raws li sau tseg nyob hauv Ntawv Cog Lus Qub tsheej xeeb. Huab Tais Yes Xus tsis yog tuaj rhuav txoj cai thiab cov Yaj Saub cov lus qhia, Huab Tais Yes Xus tuaj ua kom txhua lo lus nyob hauv txoj cai thiab cov Yaj Saub cov lus tiav tuaj.
Thaum Pob Zeb lawv pom Mais Xes thiab Es Lias tawm tuaj nrog Huab Tais Yes Xus tham, mas lawv zoo siab, lawv lub siab xyiv fab hlo, ces Pob Zeb thiaj li hais tias yog Huab Tais Yes Xus kheev, mas nws yuav ua peb lub tsev tsam phooj rau lawv.
Pob Zeb hais li ntawd, ces txawm muaj ib lub suab nrov hauv tw huab ci dawb paug tuaj tias “Tus no, yog kuv leej tub uas kuv nyiam, nws yog kuv qhov chaw zoo siab, nej mloog nws mog!” (MT 17: 5).
Kwv tij Hmoob, Tswv Ntuj lub suab hais rau Pob Zeb lawv tias kom lawv mloog Huab Tais Yes Xus. Tswv Ntuj lub suab no tseem yog hais rau peb thiab. Tswv Ntuj hais rau peb tias “Nej mloog kuv Leej Tub mas!”
Mloog tsis yog kom pob ntseg hnov tias Huab Tais Yes Xus hais dab tsi xwb, mloog yog kom ua raws li Huab Tais Yes Xus cov lus hais. Mloog yog ‘mloog lus’.
Pob Zeb lawv hnov Tswv Ntuj lub suab, lawv ntshai ces lawv khoov ntsej muag ti av. Huab Tais Yes Xus txav los plhws lawv, thiab hais rau lawv tias “Nej sawv, nej txhob ntshai” (MT 17: 6-7). Lawv tsa muag ntsia, tsis pom leej twg li, kawg tshuav Huab Tais Yes Xus tib leeg xwb.
Kwv tij Hmoob sawv daws, nyob hauv peb lub neej thaum ntsib kev nyuaj siab ntxhov plawv, Tswv Ntuj yuav pub ib lub sij hawm rau peb kom tau txais Tswv Ntuj lub txiaj ntsim pab peb muaj kev zoo siab. Thaum peb muaj kev ntshai, thaum peb ntsib teeb meem raug xwv txheej ua rau peb qhov muag plooj ntsia tsis pom dab tsi, mas Huab Tais Yes Xus xav kom peb tsa muag ntsia nws, ces Huab Tais Yes Xus yuav ua tus nplij peb siab.
Thaum peb tau pom tau ntsib Huab Tais Yes Xus lawm, peb muaj kev zoo siab xyiv fab puv npo peb lub siab, mas Tswv Ntuj tsis xav kom peb muab qhov zoo siab ntawd khawg puag rawv cia, Tswv Ntuj xav kom peb coj mus pub rau lwm tus nyob hauv kev tsob hwb lawv, ua lawv tus tub txib. Ib yam li Pob Zeb lawv xav pom Huab Tais Yes Xus, Mais Xes, thiab Es Lias mus li nyob saum roob, tab sis Tswv Ntuj hais rau lawv kom mloog Huab Tais Yes Xus, ces Huab Tais Yes Xus coj lawv rov nqes saum roob los
