Tus sau: TP. Nyiaj Pov (Tim 26 lub 2 hlis 1997)
Zaj hais txog Yes Xus txais lub Cim Ntxuav li ntawd yog ib zag zoo qhia ntau yam rau peb :
Ib tuaj : Yes Xus yog tus tsis muaj txhaum, yog tus siab dawb siab huv. Vim li cas nws tseem thov kom Zam ua lub Cim Ntxuav rau nws ?
Yog vim Yes Xus yuav pib tshaj nws lub Moo Zoo mas nws tsis xav kom zeej tsoom hais tias nws tuaj rhuav cov Yaj Saub uas xub qhia Tswv Ntuj lo lus tau ntau puas xyoo los lawm. Yes Xus tuaj ua Tswv Ntuj cov hauj lwm nyob ntiaj teb no kom tiav. Cov Yaj Saub tsuas pib cev Tswv Ntuj Lo Lus rau haisv neeg tos tus Huab Tais yuav tuaj. Zam kuj cev Tswv Ntuj lo lus rau zeej tsoom. Yes Xus tuaj qhia Tswv Ntuj lo lus kom tiav : mas nws txhob txwm tuaj cuag Zam kom sawv daws paub tias Yes Xus tsis thuam cov ua nws ntej : nws tuaj cuag tus Yaj Saub tab tom qhia Tswv Ntuj Lo Lus kom sawv daws paub tias Yes Xus hwm cov Yaj Saub ua nws ntej. Yes Xus thiaj tuaj txais lub Cim Ntxuav ntawm Zam.
Ob tuaj : Thaum nws tseem yau Zam paub Yes Xus. Yes Xus niam thiab Zam niam yog ob tug neeg sib paub zoo, sib fim kam. Zam mem tau me ntsis tias Yes Xus uas nyob Nas Las Les yog ib tug siab ntshiab uas Tswv Ntuj xa tuaj ua ib yam hauj lwm loj. Nws mem tau tias Yes Xus yog tus Vaj Pleev uas cov Yaj Saub ib txwm ceeb toom tias yuav tuaj cawm nws haiv neeg.
Tab sis Zam tsis to taub zoo tias Yes Xus yog Leej Twg tiag. Vim niaj hnub nws tsuas pom Yes Xus yog ib tug neeg zoo li lwm cov neeg nyob Nas Xas Les xwb. Yes Xus tuaj txais lub Cim Ntxuav, Zam pom thiab hnov peb Leeg Huab Tais zeem tseeb txog Yes Xus. Leej Txiv hais tias : “Tus no yog kuv Leej Tub uas kuv nyiam kawg !” Thaum ntawd Zam thiaj paub zoo dua tias Yes Xus yog yog Leej Pleev tiag. Zam thiaj xav tias nws tej hauj lwm tiav lawm : Leej Pleev twb tuaj txog lawm. Zam hais tias : “Nyem no Yes Xus yuav hlob mus. Ntawm kuv mas kuv yuav yau mus zuj zus.”
Zam yog tus piv txiv uas cov neeg tshaj Yes Xus lub Moo Zoo yuav yoog raws li nws : cov tub tshaj Ntuj lub cev Yes Xus Lo Lus. Lawv tsuas xav kom Yes Xus tib leeg nto koob meej xwb. Cov tub tshaj Ntuj Lo Lus tsis nrhiav kom tau muaj koob meej.