Ib txwm los lub Koom Txoos yeej saib tias Mas Kos tau sau nws phau ntawv raws li nws tej hauj lwm tshaj Ntuj Lus nrog tus Hauv Paus Xa Lus Pob Zeb. Ntau zaus Mas Kos sau zoo li nws tau nrog Yes Xus nyob thiab pom cov hauj lwm Yes Xus ua; yam li thaum Yes Xus txwv cua, Mas Kos sau tias muaj lwm lub nkoj nyob ntawd thiab Yes Xus tsaug zog saum lub hauv ncoo (MK 4: 35, 38), thaum Yes Xus ua kom ncuav mov ntsu tuaj, Mas Kos sau tias lawv zaum saum tej nroj ntsuab (MK 6: 39), thaum lawv mus pem Yes Lus Xas Les, Yes Xus mus ua lawv ntej (MK 10: 32), Yes Xus puag cov me nyuam (MK 10: 16), tus dig muag hle hlo nws lub tsho (MK 10: 50).
Mas Kos sau Yes Xus ntau lo lus ua lus As Las Mais; yam li Yes Xus tis npe rau Yas Kos thiab Zam tias ‘Npuas Nes Nkes’ (Boanerges) txhais tias ‘yawm xob cov tub’ (MK 3: 17), Yes Xus tsa Yais Los tus ntxhais mas Yes Xus hais tias ‘Tas Lis Tas Kus’ (MK 5: 41), Yes Xus hais rau tus lag ntseg tias ‘Es Fas Tas’ (MK 7: 34), Yes Xus hu Leej Txiv ua ‘As Npas’ (MK 14: 36), Yes Xus dai saum Ntoo Cuam, nws hais cov lus As Las Mais (Mk 15: 34).
Mas Kos sau nws phau Ntawv Moo Zoo ze xyoo 65 tej. Thaum ntawd, cov ntseeg tab tom raug txom nyem vim lawv ntseeg txog Yes Xus, Mas Kos xav txhib lawv siab, nws thiaj xav qhia lawv tias Yes Xus kuj raug txom nyem loj tab sis yog txoj kev txom nyem raws liTswv Ntuj npaj tseg.
Mas Kos Ntawv Moo Zoo lub ntsiab loj, mas yog tshaj tias Yes Xus yog tus cawm lub ntiaj teb uas tsoom sid tsis to taub nws thiab tsis txais nws, tab sis yog tus uas Tswv Ntuj tsa ua tus muaj tus tseem Huab Tais lub hwj chim. Mas Kos nthuav zoo li no: Chiv thawg tas tsoom sid txais Yes Xus zoo tab sis Yes Xus nyiam ua tus me thiab tsuas hais txog kev tig los yuav lub siab tshiab, ces sawv daws tsis to taub nws. Yes Xus tso Nkais Lis Lais teb tseg, nws coj cov thwj tim nrog nws mus tshaj kev cawm neeg. Yes Xus xub muab siab rau qhia nws cov thwj tim kom lawv to taub zoo, vim tsoom sid tsis txhua to taub. Yes Xus ua nws txoj hauj lwm kawg los qhia nws txoj kev cawm neeg; yog nws kev tuag thiab sawv rov los.
Mas Kos cev Yes Xus zoo li cas?
1. Mas Kos cev Yes Xus yog Leej Pleev raug tuag nyob saum Ntoo Cuam. Yes Xus txoj kev tuag saum Ntoo Cuam yog txoj kev yoog raws li Tswv Ntuj yeej ib txwm npaj; Leej Pleev yuav tsum raug txom nyem nws thiaj yuav cawm neeg. Ntawv Ntshiab twb xub tau hais tias yuav muaj li ntawd, Yes Xus kuj tau hais tias nws txoj kev ua neeg me thiab raug txom nyem yog kev cawm neeg. Yes Xus yeej paub tias tsoom Yus Das yuav tsis to taub nws txoj kev cawm neeg, ces thaum nws ua hwj huam mas nws tsis xav kom ncha hauv zeej tsoom, nws tsis xav kom sawv daws paub tias nws yog Leej Pleev, nws thiaj rov hu nws ua Leej Neeg tus Tub. Tab sis Mas Kos tshaj meej tias Yes Xus yeej tiag, vim Yes Xus sawv rov los.
2. Yes Xus yog Tswv Ntuj Leej Tub (Son of God). Mas Kos hais ntau zaus tias tsoom sid thiab cov thwj tim xav tsis thoob (astonish) txog tej yam Yes Xus tau ua. Tab sis Yes Xus ua tsis tau kom tsoom sid saib nws loj, ces lawv thuam nws, tsis nyiam nws. Lawv ntau leej tiv Yes Xus thiab xav muab nws tua.
3. Yes Xus yog tseem tib neeg (Really human). Mas Kos hais tias Yes Xus yog kws ntoo (MK 6: 3), Yes Xus txawj sab thiab tsaug zog (MK 4: 38), Yes Xus txawj tu siab (MK 6: 34) thiab txawj npau taws rau tej lub tswv yim thiab tej yam hauj lwm phem (MK 3: 5, 11: 15-17).
Mas Kos faib nws phau Ntawv Moo Zoo ua 5 ntus:
1. Yes Xus txais lub Cim Ntxuav (MK 1: 1-13). Mas Kos tsuas piav txog tus Ntxuav Plig Zam ntuas tsoom sid, thiab Yes Xus tuaj txais lub Cim Ntxuav.
2. Yes Xus tshaj lub Moo Zoo nyob Nkas Lis Lais teb (MK 1: 14-7: 23). Ntu no Mas Kos sau hais txog Yes Xus tshaj Ntuj Lus, kho ntau leej mob, ua hwj huam yees ntxwv, nrog cov Fas Lis Xais pib sib cav.
3. Yes Xus tawm ntawm Nkas Lis Lais teb mus tshaj Ntuj Lus (MK 7: 24-9: 50). Mas Kos piav txog Yes Xus nrog nws cov thwj tim mus txog Tws Los, Xis Doos, Des Kas Pos Lis teb thiab rov los rau Nkas Lis Lais teb.
4. Yes Xus rov tso Nkas Lis Lais teb tseg (MK 10: 1-3, 37). Mas Kos piav txog Yes Xus mus Pes Les As teb, mus Yes Lis Kos, thiab Yes Xus tshaj Ntuj Lus nyob Yes Lus Xas Les.
5. Yes Xus raug kev tuag thiab sawv rov los (MK 14: 1-16).
Vim li cas Mas Kos tu tus txheej txhem zoo li ntawd?
Vim nws tsis npaj piav Yes Xus lub neej kom tas, nws tsis piav Yes Xus tej kev mus kev los kom tas. Mas Kos tsuas hais txog Yes Xus tuaj txog Yes Lus Xas Les ib zaug xwb vim nws xav tu txhua yam raws li ib tug txheej txheem yooj yim, ces Mas Kos siv lo lus tias ‘Tam sim ntawd’ (immediately) ntau. Qhov nws npaj piav rau sawv daws paub, mas yog Yes Xus kev tuag thiab sawv rorv los. Mas Kos saib ob yam xwm no yog ‘lub moo zoo’ (good news) rau sawv daws, vim Yes Xus raug txom nyem, mas Tswv Ntuj thiaj cawm tau ntiaj teb neeg raws li lo lus tias “Neeg Leej Tub tsis tuaj kom luag tsob hwb nws, nws tuaj tsob hwb sawv daws thiab muab nws txoj sia los ua nqi txhiv coob leej” (MK 10: 45).
