Cov neeg ntoj kev tuaj Aws Los Pas teb mus rau As Fis Kas teb mas lawv yuav tau hla Nkas Lis Lais teb, cov yuav mus rau As Las Npias teb los lawv kuj yuav tau hla Nkas Lis Lais teb ib yam. Nyob hauv Nkas Lis Lais teb, lub nroog Kas Fas Naus yog thawj lub nroog cov hla kev yuav tuaj them se hla lub teb chaws.

Mas Kos sau txog tus sau se hu ua ‘Les Vis’ tias nws ua txoj num sau se ntawm tsoom pej xeem nyob hauv lub nroog Kas Fas Naus thiab cov laus pav hla lub nroog. Tab sis Mas Tais hais tias tus sau se ntawd yog nws. Nyob hauv Yes Xus cov Hauv Paus Xa Lus tsis hnov hais txog tus hu ua Les Vis ntxiv (MK 3: 16-19). Li ntawd, tej zaum Les Vis yog Mas Tais ib lub npe.

Les Vis tsis yog sau se rau cov Los Mas, tab sis nws sau se rau Hes Los As Tis Pas tus vaj txheeb kav Nkas Lis Lais xeev ntuj.

Cov Yus Das tsis nyiam cov sau se vim tias cov sau se ua hauj lwm pab cov tseem hwv Los Mas thiab cov sau se lawv nyiam sau kom tshaj tus se, mas lawv thiaj tau qhov tshaj ntawd ua lawv tus nqe zog. Cov Yus Das thiaj li hais tias cov sau se yog ‘cov neeg txhaum’ (sinner). Cov Yus Das saib tias cov neeg txhaum yog cov zoo li no; lawv coj tus yam ntxwv tsis tsim txiaj (bad moral behavior), los yog lawv tsis coj txoj cai kom thoob (did not obey all the extra rules). Li ntawd, tus neeg zes luag txij nkawm thiab tus neeg noj nqaij npua thiaj yog neeg txhaum zoo tib yam. Tus tub sab, tus tua neeg, thiab tus tsis ntxuav tes ua ntej yuav noj mov thiaj yog neeg txhaum zoo tib yam. Cov Yus Das kuj saib tias cov neeg txhaum yog neeg ruam (ignorant), lawv yuav tig los ua ib tug neeg ruaj hauv txoj kev ntseeg tsis tau.

Tej zaum Les Vis tau hnov tsoom sid tham me ntsis txog Yes Xus lawm, los tej zaum nws tau mloog Yes Xus lo lus nyob tom tej ntug zos, ces ntshai muaj ntau lub tswv yim sib ntaus rog nyob hauv nws siab. Les Vis xav mus cuag cov neeg zoo los tsis tau vim tias lawv saib nws yog ib tug neeg tsis huv (unclean), ib tug neeg muaj txhaum, lawv tsis xav txuas lus nrog nws.

Yes Xus mus raws ntug dej ntuj, nws nrhiav saib puas yuav muaj tus zoo siab raws nws, ces nws pom Les Vis. Yes Xus hu Les Vis kom raws nws mus, ces Les Vis tso nws tes dej num tseg, nws raws Yes Xus mus.

Les Vis caw Yes Xus mus noj mov tom nws tsev, nws hu cov phooj ywg sau se tuaj nrog koom rooj qav, vim nws xav pab kom lawv tau ntsib Yes Xus.

Cov Fas Lis Xais (Pharisees) lawv coj txoj cai nruj, lawv xav txuag lawv txoj kev ntseeg kom ntshiab, ces lawv ‘cais’ (separate) lawv ntawm tej yam tsis zoo. Lawv lub npe Fas Lis Xais thiaj txhais tau tias ‘cov neeg muab cais’ (the separate men). Muab coob tus Fas Lis Xais coj zoo, tab sis lawv hais tias lawv txoj cai loj tib yam li Tswv Ntuj txoj cai, ces ntau zaus lawv tsis ua raws Tswv Ntuj cov lus qhia yog lawv saib tias cov lus ntawd tsis haum rau lawv cov kab ke (tradition). Yes Xus hais txog qhov no tias “Nej hais tias yog ib tug hais rau nws niam nws txiv tias cov nyiaj txiag uas kuv yuav muab los pab neb, mas kuv muab qee rau Tswv Ntuj lawm, ces nej tsis hais kom nws ua dab tsi ntxiv rau nws niam nw stxiv” (MK 7: 11-12). Cov Fas Lis Xais thiaj nyiam mloog cov Kws Ntawv Ntshiab cov lus ntau dua mloog Tswv Ntuj. Cov Fas Lis Xais tsis xav kom cov neeg txhaum tej txhaum tsuas lawv, mas lawv tsis kam fim cov neeg txhaum. Lawv pom Yes Xus nrog cov neeg txhaum noj haus ua ke, lawv thiaj li hais tias Yes Xus coj tus yam ntxwv tsis zoo.

Cov Fas Lis Xais xav li ntawd, mas yog lawv yuam kev 2 yam:

1) Yes Xus tuaj nyob hauv lub sim ceeb, kom tau coj cov neeg txhaum rov mus cuag Tswv Ntuj.

2) Yes Xus fim txhua cov neeg, tsis hais tus neeg zoo los tus neeg phem. Tab sis Yes Xus tsis tso nws kom mus taug txoj kev phem.

Yes Xus muab cov Fas Lis Xais piv rau cov neeg noj qab nyob zoo, lawv tsis vam txog kws kho mob; cov Fas Lis Xais xav tias lawv zoo txaus lawm, ces lawv tsis vam khom Yes Xus pab. Yes Xus muab cov neeg txhaum piv rau cov neeg mob, lawv vam txog kws kho mob. Yes Xus yog tus kws kho mob pub tshuaj los cawm tus neeg mob. Yes Xus cov tshuaj yog muab Tswv Ntuj kev nyiam (God’s love) pub rau lawv, kom lawv hloov tus yam ntxwv los taug txoj kev tshiab mloog Tswv Ntuj lus.