Tus xav ua Huab Tais Yes Xus thwj tim, nws yuav tsum ua dab tsi (MT 16: 24-28)
Tom qab Huab Tais Yes Xus qhia tias nws yuav raug luag tsim txom thiab muab tua, ces Pob Zeb tsis xav cia Huab Tais Yes Xus mus pem Yes Lus Xas Les, nws nroo tias nws tsis xav kom muaj tej xwm phem ntawd tuaj nphav Huab Tais Yes Xus. Huab Tais Yes Xus thiaj li hais rau Pob Zeb tias “Xas Tas, koj lawv kuv qab, koj thaiv kuv kev. Vim qhov koj xav tsis yog qhov Tswv Ntuj xav, yog tej yam neeg xav xwb” (MT 16: 22-23). Hais li tas Huab Tais Yes Xus mam qhia rau cov thwj tim tias yog lawv xav ua nws thwj tim, lawv yuav tsum ua zoo li cas.
1. Huab Tais Yes Xus hais tias “Yog leej twg xav los raws kuv, nws yuav tsum nrauj nws”, txhais tias tus twg xav ua Huab Tais Yes Xus thwj tim los ntseeg txog Huab Tais Yes Xus, mas tus ntawd tsum txo nws lub hwj chim, nws tsum txhob muab tus kheej saib hlob; tab sis nws tsum muab Tswv Ntuj saib ua qhov loj, ces nws xaiv ua xis Tswv Ntuj siab nyiam.
2. Huab Tais Yes Xus hais tias “Yog leej twg xav los raws kuv, nws yuav kwv nws tus ntoo cuam”, txhais tias tus twg xav los ua Huab Tais Yes Xus thwj tim los ntseeg txog Huab Tais Yes Xus, mas nws yuav tsum zoo siab txais lub luag hauj lwm Tswv Ntuj pub rau nws, tab txawm yuav ntsib kev txom nyem luaj twg los nws yuav tsis muab hle pov tseg.
3. Huab Tais Yes Xus hais tias “Yog leej twg xav los raws kuv, nws yuav lawv kuv qab”, txhais tias tus twg xav los ua Huab Tais Yes Xus thwj tim los ntseeg txog Huab Tais Yes Xus, mas nws yuav yoog raws Huab Tais Yes Xus tus piv txwv, nws yuav kawm ntawm Huab Tais Yes Xus.
Huab Tais Yes Xus hais ntxiv tias “Leej twg xav cawm nws txoj sia, mas nws yuav plam nws txoj sia. Leej twg plam nws txoj sia vim kuv, mas nws yuav rov tau nws txoj sia” txhais tias tus twg ua neej nyob nws tsuas nrhiav kev zoo rau nws lub neej sab nruab yaj xwb, nws tsis nrhiav kev zoo rau sab nruab yeeb, mas txog qhov kawg nws yuav plam txoj sia nyob mus li. Tus twg ua neej nyob nws xaiv ua hauj lwm tsob hwb Tswv Ntuj thiab pab luag tej, tab txawm zoo li nws lub neej tsis muaj kev zoo dab tsi li, tsis kav Tswv Ntuj saib tias nws tsim nyog txais koob haum ntawm Tswv Ntuj, ces txog qhov kawg nws yuav muaj txoj sia nyob mus li.
Kwv tij Hmoob sawv daws, nyiaj txiag, suab npe, hwj chim, ntiaj teb neeg cov lus qhuas lus cav txog peb puas yuav nrog peb nyob mus tas ib txhis. Peb tuag lawm ces tej ntawd yaj ntshis tas. Tsuas muaj tib yam xwb tseem nyog nrog peb txoj sia mus li, yog peb tus plig khaub zig Tswv Ntuj.
