Peb Hmoob yav thaud muaj zaj dab neeg hais tias thaum ub neeg tsis tau muaj txhaum, neeg tuag los neeg txawj rov. Txij li Nkauj Iab thiab Nraug Oo nkawd ob tug tub tau muab qav kaws tua tuag, ces qav kaws thiaj li foom rau ntiaj teb neeg kom tuag mus tsis txawj rov.
Peb Hmoob zaj dab neeg no xws li zaj dab neeg chiv keeb tib neeg hauv Ntawv Ntshiab tias: Neeg lub keeb txhaum yog As Das thiab Es Vas nkawd mloog tus Dab ntxias. Ces nkawd thiaj ua txhaum (HP 3: 1-7). Los txog rau Kas Es thiab As Npes nkawd thiaj txawj sib ntaus sib tua. Nkawd thiaj tau ua txhaum thiab (HP 4: 7-12).
Raws li Hmoob kwv huam mas hais tias thaum neeg tuag mus puv ib tsug 13 hnub mas yog neeg mus plhis tawv xwb. Neeg tseem yuav rov los. Tiam sis txij thaum Nkauj Iab thaib Nraug Oo nkawd ob tug tub tau muab qav kaws tua, mas qav kaws tau foom rau ntiaj teb neeg tias thaum kuv kav lub ntiaj teb mas nqaij yog nqaij hlau, txha yog txha tooj, neeg tuag los neeg txawj rov. Txij no lawm tod nqaij yuav yog nqaij ciab zib, txha yog txha plhaub mag, neeg tuag tsis rov los.
Nyob hauv peb cov ntseeg Ntuj, muaj chiv keeb neeg ua txhaum ob zaug. Zaum ib, yog As Das thiab Es Vas nkawd tau mloog tus nab ntxias nkawd. Nkawd thiaj tau coj ntiaj teb neeg mus zwm rau kev txhaum. Mas Tswv Ntuj thiaj tau ntiab nkawd tawm thiab foom lus phem rau nkawd.
Tus nab yog tus ntse tshaj tas txhua hom tsiaj HUAB TAIS Tswv Ntuj tau tsim los nyob nruab nrag. Nab hais rau tus poj niam tias ‘Li ntawd, Tswv Ntuj hais tias neb yuav tsis txhob noj txhua yam txiv ntoo hauv lub vaj no puas yog?’
Tus poj niam teb rau tus nab tias ‘Wb noj tau cov txiv txi saum cov ntoo hauv lub vaj no tib si. Tsuas tshwj cov txiv txi saum tsob ntoo nyob hauv nruab nrab lub vaj, mas Tswv Ntuj hais tias neb tsis txhob noj, tsis txhob kov, yog neb noj neb kov, mas neb yuav tuag.’
Tus nab teb ntua tus poj niam tias ‘Tsis muaj li ntawd ib zaug! Neb yuav tsis tuag. Vim Tswv Ntuj paub tias, hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem.’
Tus poj niam pom hais tias tus ntoo ntawd yeej zoo noj thiab zoo saib kawg, thiab yog tus ntoo uas yus ntshaw noj kom yus paub qhov zoo thiab qhov phem. Nws de zoj lub txiv ntawm tus ntoo los noj. Nws kuj cev rau nws tus txiv uas nrog nws nyob, ces tus txiv kuj noj thiab. Ces nkawd ob leeg qhov muag qhib plho, nkawd paub hais tias nkawd liab qab. Nkawd thiaj muab nplooj ncuav pias los ua tiab npua.
Tswv Ntuj hais rau tus poj niam hais tias ‘Kuv yuav ua kom koj muaj mob ntau thaum koj xeeb tub xeeb ki. Koj yuav tau mob tau ntsaj, koj thiaj yug tau me tub me nyuam. Tsis kav, koj tseem yuav ntshaw koj tus txiv, tiam sis nws yuav tswj koj.’
Tswv Ntuj hais rau tus txiv neej hais tias ‘Vim koj tau mloog koj tus poj niam lus, koj thiaj noj lub txiv kuv txwv tsis kheev noj, av thiaj raug foom phem vim koj! Koj yuav siv zog khwv tas koj lub neej koj thiaj tau noj. Av yuav tuaj pos tuaj nrhab rau koj, thiab koj yuav noj tej nroj tsuag uas tuaj hauv nruab teb. Koj ntsej muag yuav tawm hws lug koj thiaj tau noj, mus txog hnub koj rov mus ua av, vim koj yog av puab. Koj yog av luaj ces koj yuav rov mus ua av luaj.’ (HP 3: 1-7, 16-19)
Zaum ob, los txog rau Kas Es thiab As Npes nkawd lub neej. Kas Es tau ua txhaum ib zaug ntxiv, mas Tswv Ntuj thiaj tau foom ib lo lus phem rau Kas Es thiab.
Tab sis muaj ib zaug, Kas Ees hais rau nws tus kwv As Npes tias ‘Wb mus yos.’
Thaum nkawd mus nrug deb ntawm zos lawm, Kas Ees txawm dhia rhees mos ntiag nws tus kwv, muab tus kwv tua. HUAB TAIS nug Kas Ees hais tias ‘Koj tus kwv As Npes nyob qhov twg?’
Kas Ees teb tias ‘Kuv tsis paub. Kuv puas yog tus zov rawv kuv tus kwv?’
HUAB TAIS rov hais tias ‘Koj tau ua dab tsi? Koj sim mloog saib, koj tus kwv cov ntshav quaj qw hauv av tuaj rau kuv! Zaum no koj yuav tau hmoov phem thiab koj yuav raug ntiab tawm hauv thaj av zoo uas tau rua ncauj cug koj tus kwv cov ntshav. Yog koj ua teb, av yuav tsis txi qoob rau koj lawm. Koj yuav ua neeg loj leeb ncig ntiaj teb.’
Kas Ees hais rau HUAB TAIS tias ‘Kuv lub txim hnyav dhau, kuv ris tsis taus. Ntsia saib, hnub no koj muab kuv ntiab tawm hauv thaj av zoo no mus, kuv yuav tsum mus tsiv nraim deb ntawm koj lub ntsej muag, thiab kuv yuav ua neeg loj leeb ncig ntiaj teb. Ntshai thawj tus neeg tuaj ntsib kuv yuav muab kuv tua xwb!’(HP 4: 8-14)
Li ntawd, neeg thiaj tau mus zwm rau kev txhaum thiab kev phem, kev tuag kev txhawj xeeb tas txhia yam. Yam li Tswv Ntuj tau tso neeg pov tseg, los ntiab neeg. Tiam sis tsis yog Tswv Ntuj ntiab neeg, yog neeg tsis txais Tswv Ntuj, neeg thiaj ntiab Tswv Ntuj lawm.
Kwv tij, nyem no peb los ua neeg teev Tswv Ntuj lawm. Kuj yog zoo li peb rov los cuag Huab Tais Ntuj lawm tiag. Tiam sis peb yog neeg ntiaj teb, peb tau ris lub keeb txhaum lawm, tab peb yog ib co neeg ntseeg lawm los peb kuj muaj txhaum huv tib sis, tsis hais cov uas tseem coj dab los cov ntseeg sawv daws, puav leej muaj txhaum txhua tus. Mas peb yuav nco peb qhov txhaum uas peb tau ua peb muab cev rau Huab Tais Tswv Ntuj kom nws zam rau peb. Zoo li tus tub ploj rov los. Vim nws tau ua txhaum nws rov qab los nco nws qhov txhaum nws tau ua, nws rov los kom tau lees txhaum thiab thov txhaum, nws hais tias “Txiv! kuv tau ua txhaum rau Ntuj thiab rau koj, kuv tsis tsim nyom koj yuav hu kuv ua koj tus tub lawm.” (LK 15: 21)
Yog zoo li ntawd mas peb paub tias peb yog neeg txhaum, peb yuav lees txhaum kom peb tsim nyog ua Ntuj cov me nyuam.
