1As Das paub nws poj niam. Ces tus poj niam xeeb tub thiab yug tau Kas Ees. Nws hais tias “Kuv tau ib tug tub ntawm HUAB TAIS los.” 2Nws kuj yug tau As Npes, yog Kas Ees tus kwv. As Npes hlob, nws ua ib tug tub yug tsiaj hos Kas Ees ua liaj ua teb. 3Ntev tom qab, Kas Ees txawm muab nws cov qoob los txi rau HUAB TAIS. 4Hos As Npes, nws kuj muab thawj tus me nyuam uas nws cov tsiaj yug tau, los txi Ntuj. Nws tseem muab lawv cov roj los txi huv tib si. HUAB TAIS zoo siab rau As Npes, ces nws txais As Npes cov txim. 5Tab sis HUAB TAIS tsis zoo siab rau Kas Ees thiab tsis txais Kas Ees cov txim, ces Kas Ees npau taws thiab ua ntsej muag dub nciab. 6HUAB TAIS hais rau Kas Ees tias “Vim li cas koj thiaj npau taws thiab ua ntsej muag dub nciab li ko? 7Yog koj txiav siab ua zoo mas koj yuav rov tsa taus koj lub ntsej muag. Hos yog koj tsis txiav siab ua zoo ces kev txhaum nyob rawv ntawm koj qhov rooj, xws li tus tsiaj nyas nrhw yuav tom koj. Yog koj xav yeej, mas koj tseem yuav yeej tau txoj kev txhaum.” 8Tab sis muaj ib zaug, Kas Ees hais rau nws tus kwv As Npes tias “Wb mus yos.” Thaum nkawd mus nrug deb ntawm zos lawm, Kas Ees txawm dhia rhees mos ntiag nws tus kwv, muab tus kwv tua. 9HUAB TAIS nug Kas Ees hais tias “Koj tus kwv As Npes nyob qhov twg?” Kas Ees teb tias “Kuv tsis paub. Kuv puas yog tus zov rawv kuv tus kwv?” 10HUAB TAIS rov hais tias “Koj tau ua dab tsi? Koj sim mloog saib, koj tus kwv cov ntshav quaj qw hauv av tuaj rau kuv! 11Zaum no koj yuav tau hmoov phem thiab koj yuav raug ntiab tawm hauv thaj av zoo uas tau rua ncauj cug koj tus kwv cov ntshav. 12Yog koj ua teb, av yuav tsis txi qoob rau koj lawm. Koj yuav ua neeg loj leeb ncig ntiaj teb.” 13Kas Ees hais rau HUAB TAIS tias “Kuv lub txim hnyav dhau, kuv ris tsis taus. 14Ntsia saib, hnub no koj muab kuv ntiab tawm hauv thaj av zoo no mus, kuv yuav tsum mus tsiv nraim deb ntawm koj lub ntsej muag, thiab kuv yuav ua neeg loj leeb ncig ntiaj teb. Ntshai thawj tus neeg tuaj ntsib kuv yuav muab kuv tua xwb!” 15HUAB TAIS teb tias “Yog leej twg tua Kas Ees mas yuav muaj tus ua pauj rau nws xya zaus.” Ces HUAB TAIS ntaus ib lub cim rau Kas Ees kom thawj tug neeg ntsib nws txhob muab nws tua. 16Kas Ees thiaj txav mus deb ntawm HUAB TAIS xub ntiag. Nws mus nyob lub teb chaws Nos Daws, nyob ntawm lub vaj Es Dees, sab hnub tuaj.
Ntawv Hauv Paus hais tias Kas Ees thiab As Npes yog ob niam txiv hauv paus As Das thiab Es Vas thawj ob tug tub, tab sis ntawv Hauv Paus kuj piav tias Kas Ees twb muaj ib co neeg coob kawg nrog nws tsim tej lub nroog (HP 4: 17), thiab As Npes nyob hauv tej lub zos uas muaj neeg coob yug tsiaj. Vim tej ntawd, mas yuav tsum to taub tias Kas Ees thiab As Npes yog ob lub npe hais txog cov neeg puag thaum lub hauv paus sawv daws tib si. Txij thaum ub los muaj tej tus neeg hwm Tswv Ntuj zoo dua xws li As Npes, thiab muaj tej tus neeg muab hob cia siab rau lawv lub zog ntau xws li Kas Ees.
Kwv tij Hmoob, zaj no peb pom tias cov His Xas Lais hu Tswv Ntuj ua ‘HUAB TAIS’. Lo lus no yog lawv muab los hu Tswv Ntuj lub npe ‘YAS VES’. Yog li peb thiaj paub tias zaj hais txog Kas Ees thiab As Npes, mas cov His Xas Lais muab hauv Txoj Kwv Huam Yas Ves los ntxiv rau hauv lawv phau Ntawv Ntshiab.
Nyob hauv cov His Xas Lais, lawv cov npe neeg los npe chaw puav leej muaj ib lub ntsiab qhia txog ib yam dab tsi; yam li lub npe ‘As Das’ (Adam) txhais tias ‘tib neeg’ los yog ‘tus txiv neej’ (the man), lub npe ‘Es Vas’ (Eve) txhais tias ‘ciaj sia’ (alive). As Das thiab Es Vas muaj 2 tus tub; yog Kas Ees thiab As Npes. ‘Kas Ees’ (Cain) ncau los ntawm lo lus tias ‘QANAH’ txhais tias ‘tau txais’ (to acquire), ‘kav’ (to possess), los sis ‘tsim tawm’ (to create). ‘As Npes’ (Abel) ncau los ntawm lo lus tias ‘HEVEL’ txhais tias ‘txoj pa’ (breath), ‘txoj sia luv’ (with a short life), los sis ‘tsis muaj qab hau’ (without meaning).
Thaum As Das thiab Es Vas ua txhaum, nkawd txaj muag, ces nkawd muab nplooj ncuav pias los ua tsoo npua npog nkawd lub cev. Tswv Ntuj hlub nkawd, Tswv Ntuj thiaj li muab ib tug tsiaj tua thiab muab cov tawv los ua tshoo tsho rau nkawd hnav. Li ntawd, Tswv Ntuj thiaj li xav kom tib neeg muab tsiaj ‘txi’ (offer) rau Tswv Ntuj. As Npes paub txog qhov no, nws thiaj muab thawj tus me nyuam tsiaj rog thiab zoo tshaj los tua txi Ntuj. Ntawm Kas Ees, nws muab nws cov qoob los hlawv txi rau Tswv Ntuj. Tswv Ntuj tsis txais Kas Ees cov txim, tab sis Tswv Ntuj zoo siab txais As Npes cov, ces Kas Ees thiaj li npau taws. As Npes muab thawj tus me nyuam tsiaj los tua txi Ntuj kuj yog daim duab tsom kom pom txog Huab Tais Yes Xus ua tus Yaj Txi Ntuj them qab ntuj neeg cov txhaum.
Tos Tswv Ntuj zoo siab txais As Npes cov txim tsis yog tias As Npes muab tsiaj los txi rau Tswv Ntuj, tab sis yog Tswv Ntuj ntsia pom hauv As Npes nruab siab tias nws muab Tswv Ntuj saib ua qhov loj, nws zoo siab muab thawj tus me nyuam tsiaj zoo tshaj coj los tua txi Ntuj. Ntawm Kas Ees nws pom Tswv Ntuj tsis txais nws cov txim, nws tsis tig los ua zoo xav tias yog vim dab tsi Tswv Ntuj thiaj tsis zoo siab txais nws cov txim, nws xaiv yuav qhov npau taws rau Tswv Ntuj thiab khib nws tus kwv As Npes.
Kas Ees npau taws ua ntsej muag dub nciab, tsis kav Tswv Ntuj tsis chim rau nws, Tswv Ntuj pom Kas Ees ua yuam kev, Tswv Ntuj hlub Kas Ees, ces Tswv Ntuj qhuab ntuas Kas Ees tias “Yog koj txiav siab ua zoo mas koj yuav rov tsa taus koj lub ntsej muag. Hos yog koj tsis txiav siab ua zoo ces kev txhaum nyob rawv ntawm koj qhov rooj, xws li tus tsiaj nyas nrhw yuav tom koj. Yog koj xav yeej, mas koj tseem yuav yeej tau txoj kev txhaum” (HP 4: 7). Tswv Ntuj muab kev txhaum piv rau tus tsiaj tsiv tsaim nyob rawv ntawm yus qhov rooj nyas tos tom yus. Tus Hauv Paus Xa Lus Pob Zeb ntuas cov ntseeg tias “Tus dab phem uas yog nej tus yeeb ncuab, nws zoo li ib tug tsov nyooj laws, nws koos ncig lees nrhiav saib yuav tom leej twg” (1PZ 5: 8).
Tswv Ntuj xav kom Kas Ees tig los ua xis Tswv Ntuj siab tab sis Kas Ees tsis mloog, nws tseem xaiv yuav nws siab li qhov qub, ces nws thiaj nrhiav kev muab As Npes tua. Muaj ib hnub Kas Ees thiaj li yaum As Npes mus yos, ces nws muab As Npes tua.
Tswv Ntuj pom thiab paub qhov Kas Ees muab As Npes tua, tab sis Tswv Ntuj tseem hlub Kas Ees, Tswv Ntuj xav kom Kas Ees tu siab rau nws qhov txhaum, Tswv Ntuj thiaj li txhob txwm nug Kas Ees txog As Npes. Kas Ees tsis tu siab, nws tseem dag tias nws tsis paub. Thaum Tswv Ntuj tsim tib neeg, mas Tswv Ntuj xav kom tib neeg los nyob ua ke sib pab sib nres. Kas Ees tsis lees tias nws muab As Npes tua, mas yog Kas Ees tab tom tsis ua raws li Tswv Ntuj zaj tswv yim npaj tseg.
Kas Ees tsis lees, ces Tswv Ntuj thiaj qhia tias Kas Ees lub txim nws tua neeg ntawd yuav yog dab tsi. Kas Ees hais tias lub txim nws tau txais ntawd hnyav dhau thiab nws ntshai tsam luag muab nws tua xws li nws tau tua As Npes, ces Tswv Ntuj thiaj li ntau ib lub cim rau Kas Ees kom tsis txhob muaj leej twg muab Kas Ees tua (HP 4: 15).
Nyob hauv zaj no peb pom tias thaum tib neeg cev txim rau Tswv Ntuj, mas Tswv Ntuj tsis saib tias cov txim ntawd muaj nqe npaum cas, qhov Tswv Ntuj saib mas yog hauv neeg nruab siab saib neeg xav zoo li cas. Muaj ib zaug Tswv Ntuj tshoj tus Yaj Saub Os Xes kom ntuas cov His Xas Lais tias “Vim yog kev nyiam thiaj xis kuv siab. Cov thaj txi Ntuj tsis xis kuv siab” (OX 6: 6). Huab Tais Yes Xus kuj zeem tseeb tias “Qhov kuv xav yuav yog txoj kev khuv leej, tsis yog thaj txi Ntuj” (MT 12: 7).
Yog li nyob hauv peb kev ua neej, peb puas cev yam zoo tshaj plaws rau Tswv Ntuj? Yam zoo tshaj plaws hauv peb lub neej yog lub sij hawm, peb muab ntau los tsawg rau Tswv Ntuj?
Zaj hais txog Kas Ees thiab As Npes qhia peb tias ‘thaum ib tug neeg cia siab rau nws lub zog dhau kev cai, mas nws tsis pom tias kev hwm Tswv Ntuj puas muaj qab hau ntxiv, ces nws tsis hwm Tswv Ntuj. Thaum nws tsis hwm Tswv Ntuj, mas nws tsis saib neeg yog Tswv Ntuj me nyuam, ces nws tsis hwm neeg.’ Tus tsis hwm ntuj thiab tsis hwm neeg, mas neeg kuj tsis hwm nws thiab, ces Tswv Ntuj tso nws ua neeg loj leeb ncig ntiaj teb.
Zaj no tseem qhia peb tias Tswv Ntuj tsis ntxub Kas Ees uas tau muab neeg tua pov tseg, Tswv Ntuj tseem txuag nws kom nws ua nws lub neej tau ntxiv mus, Tswv Ntuj zam txhaum rau nws, Tswv Ntuj ua siab ntev tos saib Kas Ees puas yuav tig los ua ib tug neeg hwm Tswv Ntuj thiab hwm neeg. Ntawv Ntshiab hais tias Tswv Ntuj ntaus ib lub cim rau nws kom luag tej txhob muab nws tua pov tseg (HP 4: 13-15). Tswv Ntuj hlub tus neeg txhaum, xws li Huab Tais Yes Xus yuav qhia meej kom peb ua.
Txhua zaus peb xaiv ua ib yam dab tsi, mas Tswv Ntuj lub suab nyob hauv peb puas pom zoo cia peb ua los tsis pom zoo?
Tswv Ntuj hu peb kom tau los sib pab sib nres. Li ntawd, niaj hnub peb tsuas ntsia pom peb tus kheej xwb, los peb ntsia pom txog cov nyob ib puag ncig peb, peb puas tau pab lawv thiab nres lawv?
Kwv tij, peb yog neeg muaj txhaum, txhua zaus peb poob rau hauv txoj kev txhaum, mas Tswv Ntuj tseem hlub peb, Tswv Ntuj tsis tso peb tseg, Tswv Ntuj npo peb tsis tseg tab sis peb puas koom tes nrog Tswv Ntuj, peb puas hloov siab tshiab los ua xis Tswv Ntuj siab los peb tseem ua zoo li Kas Ees tsis pom txog peb kev txhaum, ces peb tsis tig los yuav siab tshiab?
