Ntau pua xyoo ua ntej Mais Xes tau txais Tswv Ntuj 10 lo lus qhia nyob saum lub roob Xis Nais. Lo lus qhia 3 hais tias “Koj yuav cai Huab Tais Ntuj hnub.” Cov Leej Choj pom tias tsoom His Xas Lais coob leej tsis caiv Huab Tais Ntuj hnub, cov Leej Choj thiaj tsim ib zag piav tias thaum Tswv Ntuj tsim lub ntuj lub teb mas nws ua hauj lwm 6 hnub ces hnub 7 nws so, Tswv Ntuj foom lus zoo rau hnub xya thiab muab hnub xya ua hnub ntshiab (HP 2: 2-3). Yog li tsoom His Xas Lais thiaj tsum caiv Hnub Xya; yuav tsis txhob ua hauj lwm vim yog hnub Tswv Ntuj so, yuav qee Hnub Xya los ua hnub sib sau teev Ntuj thiab txais Tswv Ntuj cov lus.
Pom tias nyob hauv hnub xya Tswv Ntuj ua 3 yam: ua txoj num tiav tas, so, thiab foom lus zoo.
Koom Txoos Cov Lus Qhia (CCC 345-348) qhia tias Tswv Ntuj so (Shabbat) tsis yog vim Tswv Ntuj ua hauj lwm sab, tab sis Tswv Ntuj tsa hnub xya ua hnub so yog kom tau muaj ib hnub Tswv Ntuj thiab tib neeg tau kev sib fim. Tswv Ntuj foom lus zoo rau hnub xya kom ua hnub ntshiab txhais tias Tswv Ntuj muab ib hnub tshwj cia rau tib neeg tau muaj sij hawm los fim Tswv Ntuj. Li ntawd, tib neeg txoj sia lub hom phiaj los yog lub ntsis thiaj li tsis yog rau siab ntso ua hauj lwm tab sis yog kom tib neeg tau nyob ze Tswv Ntuj thiab nrog Tswv Ntuj sib fim.
Hnub xya tsis muaj tsaus ntuj thiab kaj ntug vim tias hnub xya ntawd tsom txog hnub nyob mus ib txhiab ib txhis. Li ntawd, hnub Tswv Ntuj tshwj cia thiaj yog hnub tib neeg tau nrog Tswv Ntuj nyob mus li.
Thaum Huab Tais Yes Xus sawv rov los nyob hauv hnub chiv lis piam tshiab, mas Huab Tais Yes Xus tau tsim tus tib neeg tshiab tsis lo txhaum. Hnub chiv thiaj yog Tswv Ntuj hnub, yog hnub cov neeg ntseeg txog Yes Xus tso qav num tseg kom tau cav txog Tswv Ntuj thiab ua Tswv Ntuj tsaug.
Tswv Ntuj muab av nplaum los puab ua tus tib neeg thiab tshuab pa rau hauv tib neeg qhov ntswg, ces tib neeg ciaj ua ib tug muaj sia (HP 2: 7). Qib lus no qhia tias tib neeg muaj lub cev (av) thiab ntsuj plig (Tswv Ntuj txoj pa). Tab txawm tib neeg yog av tsis kav Tswv Ntuj nyiam tib neeg tas npaud, Tswv Ntuj thiaj li muab nws txoj pa tuaj nyob hauv tib neeg lub cev.
Tib neeg muaj Tswv Ntuj txoj pa nyob hauv tib neeg, mas tib neeg thiaj li ntshaw nrhiav Tswv Ntuj, kom muaj ib hnub twg tib neeg rov tau mus npuab Tswv Ntuj.
Tswv Ntuj puab tau tib neeg tas, Tswv Ntuj mam li cog lub vaj nyob Es Dees, ces Tswv Ntuj muab tib neeg tso rau hauv lub vaj. Lub vaj Es Dees thiaj li yog yam paj tshab Tswv Ntuj npaj tseg rau tib neeg. Lub vaj Es Dees thiaj li yog thawj lub Tuam Tsev Ntshiab (First Sanctuary) Tswv Ntuj thiab tib neeg tau tuaj sib ntsib.
Lub vaj Es Dees yog lub vaj lom zem muaj cov ntoo zoo saib thiab zoo noj (HP 2: 9). Lub vaj Es Dees yog Tswv Ntuj npaj tseg cia rau tib neeg nyob (HP3: 15). Nyob hauv lub vaj muaj ‘cov ntoo pub txoj sia’ thiab ‘tsob ntoo paub qhov zoo thiab qhov phem’ (HP 2: 16). Tsob ntoo pub txoj sia (Tree of Life) yog cov txiaj ntsim ntshiab (Sanctifying Grace) thiab txoj sia nyob mus li. Tsob ntoo paub qhov zoo thiab qhov phem (Tree of Knowledge of Good and Evil) yog tus ntoo Tswv Ntuj cog cia rau tib neeg muab ua cim ntuas tias tib neeg tsum cia siab rau Tswv Ntuj kev thoob tsib thiab tib neeg tsis txhob ua neeg muab hlob tab txawm tib neeg muaj cai ywj siab ua raws kev twj lij Tswv Ntuj pub rau tib neeg. Tib neeg tsum paub txog qhov tseeb tias Tswv Ntuj yog tus Tswv Tsim, hos tib neeg yog tsav Tswv Ntuj tsim los, mas tib neeg tsis muaj cai yuav ua tus txiav tias qhov twg zoo los phem.
Tswv Ntuj coj tas ib puas tsav yam los rau tib neeg xyuas thiab cia tib neeg muab lub npe rau (HP 2: 19). Yog li tib neeg thiaj muaj cai loj dua txhua tsav Tswv Ntuj tsim los thiab Tswv Ntuj pub cai rau tib neeg ua tus sawv Tswv Ntuj chaw tu txhua tsav yam nyob hauv lub ntiaj teb, tsis yog ua tus rhuav lub ntiaj teb.
Tswv Ntuj hlub tib neeg thiab txhawj txog tib neeg lub neej nyob twm zeej, Tswv Ntuj thiaj li pom tias tib neeg nyob ib leeg mas tsis zoo (HP 2: 18), Tswv Ntuj thiaj li tso ib tug dab ntub hlob laum tus txiv neej, ces nws tsaug zog. Tswv Ntuj rho nws ib tug tav los puab ua ib tug poj niam (HP 2: 21-22). Tswv Ntuj coj tus poj niam los cob rau tus txiv neej, ces tus txiv neej hais tias “Tus no yog tseem txha ntawm kuv txha, thiab tseem nqaij ntawm kuv nqaij tiag” (HP 2: 23), ces tus txiv neej thiab tus poj niam thiaj li sib yuav ua txij nkawm koom ib lub cev nqaij (HP 2: 24).
Tswv Ntuj muab txiv neej ib tug txha tav los tsim tus poj niam. Tus txha tav yog tus pob txha nyob ntawm tib neeg ib sab cev, tsis siab dhau los qis dhau, yog tias tus poj niam tawm ntawm tus txiv neej phab tav los, mas nkawd thiaj muaj hwj chim sib npaug zos, nkawd yuav sib hlub vim tus tav nyob ze ntawm lub siab lub plawv.
Tus txiv neej thiab tus poj niam yog ib lub cev nqaij. Lo lus no txhais tias kev ua niam txiv yog ib yam zoo. Txiv neej thiab poj niam muaj lub peev xwm tsim txoj sia, muaj lub peev xwm tsim kom muaj ntiaj teb neeg mus li.
Thaum ntawd, tus txiv neej thiab tus poj niam nkawd ob leeg nyob liab qab, tiam sis ib leeg tsis paub txaj muag rau ib leeg (HP 2: 25) txhais tias nkawd ob leeg puav leej muaj lub siab ncaj siab dawb siab huv tsis muaj ib lub tswv yim qias nyob hauv nkawd lub tswv yim li.
Tsis muaj ib yam dab tsi xub muaj nyob ua ntej Tswv Ntuj. Tswv Ntuj yog tus tsim ntuj tsim teb, mas Tswv Ntuj thiaj li yog txhua tsav yam lub hauv paus. Tib neeg tus plig yog tuaj ntawm Tswv Ntuj tuaj. Tswv Ntuj tsim tib neeg kom Tswv Ntuj tau muab Tswv Ntuj txoj kev nyiam pub rau tib neeg, thiab Tswv Ntujt sim tib neeg kom los sib faib Tswv Ntuj txoj kev nyiam. Tib neeg yog tsav loj dua cov vim tib neeg yog Tswv Ntujt us duab, thiab tib neeg yog tsav nyob ze Tswv Ntuj tshaj plaws.
Tswv Ntuj tsim tib neeg los nyob hauv lub ntiaj teb thiab tu lub ntiaj teb. Yog li ntiaj teb thiaj li yog tib neeg lub tsev thiab yog paj tshab Tswv Ntuj pub rau tib neeg. Li ntawd, tib neeg thiaj tsis txhob rhuav lub ntiaj teb. Ntawv Hauv Paus hais tias Tswv Ntuj coj tus txiv neej mus nyob hauv lub vaj Es Dees kom nws cog lub vaj thiab saib lub vaj (HP 2: 15). Li ntawd, tib neeg thiaj li muaj tsim dua cov tsiaj thiab tib neeg yog ‘tus neeg saib xyuas’ (Steward) Tswv Ntuj lub cuab tam.
Tswv Ntuj muab av los puab ua tib neeg, tib neeg thiaj tau lub npe tias ‘As Das’ yog ncau los ntawm lo lus tias ‘Av’. Txhais tias tib neeg yog tuaj ntawm ntiaj teb tej av tuaj, yog li tib neeg thiab lub ntiaj teb sib khiav tsis dhau, thaum ntiaj teb muaj mob, mas tib neeg thiajraug xwv txheej. Li ntawd, tib neeg thiaj yuav tau nyiam thiab hwm lub ntiaj teb.
Tswv Ntuj lub koob meej thiab qhov zoo nkauj tawm tuaj rau tib neeg pom nyob hauv lub ntiaj teb. Lub ntiaj teb yog qhov chaw ntshiab coj tib neeg mus ntsib Tswv Ntuj, yog li thaum peb taug kev nyob hauv tej hav zoov, peb mloog cov suab cua suab dej, peb ntsia lub ntuj ntsuab, mas peb lub siab thiaj kaj txaus rau peb thov Ntuj thiab cav txog Tswv Ntuj lub txiaj ntsim.
