Lub Tuam Tsev Teev Ntuj Leej Ntshiab Mab Liab tus Loj los yog lub Tuam Tsev Teev Ntuj Leej Ntshiab Mab Liab Mas Ntsos Les (Basilica di Santa Maria Maggiore) los yog lub Tuam Tsev Teev Ntuj Leej Ntshiab Mab Liab ntawm cov daus xib daus npu. Lub Tuam Tsev Teev Ntuj no yog ib lub hauv lub Koom Txoos Kav Tos Liv 4 lub Tuam Tsev Teev Ntuj nyob hauv lub tuam ceeb Los Mas, Is Tas Lias teb. Lub Tuam Tsev Teev Ntuj no nyob nrog lub Koom Txoos puag txheej thaud los lawm.
Lub Tuam Tsev Teev Ntuj no lub keeb yog li no: Muaj kwv huam piav tias nyob hauv tiam 4 muaj ib nkawm niam txiv nyob hauv lub tsheej Los Mas, nkawd nplua nuj heev tab sis tsis muaj me nyuam, ces nkawd cog lus tias yuav muab nkawd lub cuab tam tas nrho cev rau niam Mab Liab. Thaum nkawd cog lus li ntawd tas, lub 8 hli tim 4 xyoo 355 ntuj cia li los daus los te saum lub ncov roob Es Nqus (Esquiline). Niam Mab Liab yees tawm tuaj rau nkawd pom nyob hauv npau suav thiab qhia nkawd kom txhim tsa ib lub tsev teev Ntuj rau thaj chaw los daus los te ntawd. Vaj Qhia Lis Npes Lias (Pope Liberius) kuj tau npau suav ib yam li nkawd thiab, ces Vaj Qhia thiab nkawd thiaj tau sib pab txhim tsa ib lub Tuam Tsev Teev Ntuj nyob saum lub ncov roob Es Nqus.
Xyoo 431 lub Koom Txoos ua Rooj Ncauj Lus nyob Es Fes Xos los zeem tseeb tias niam Mab Liab yog Tswv Ntuj tus Leej Niam, yog li Vaj Qhia Xis Tus Peb thiaj li muab npe rau lub Tuam Tsev Teev Ntuj tshiab no hu ua ‘Xaas Tas Mas Lias Mas Ntsos Les’ txhais tias ‘Leej Ntshiab Mab Liab tus Loj’ (St. Mary Major).
Tiam 16 Vaj Qhia Pis Yus Tsib pom zoo cia lub Koom Txoos ua hmoov hnub cev lub Tuam Tsev Teev Ntuj no rau niam Mab Liab, yog li txij tiam 16 ntawd los thaum txog hnub tim 5 lub 8 hli lub Koom Txoos thiaj muaj lub Txoos Teev Ntuj ua hmoov hnub cev lub Tuam Tseev Teev Ntuj Leej Ntshiab Mab Liab tus Loj.
