Vaj Qhia Npes Nes Dis 16 hais tias lo lus ‘LOVE’ yog lo lus neeg siv ntau tshaj plaws thiab yog lo lus neeg siv tsis raug yog ntau tshaj thiab, vim yog lo lus neeg nthuav lub ntsiab tsis sib xws.
Peb Hmoob muaj 2 lo lus hais txog lo lus As Kiv tias ‘LOVE’ yog lo lus tias ‘HLUB’ thiab lo lus tias ‘NYIAM’. Nyob hauv Ntawv Ntshiab siv 3 lo lus hais txog lo lus ‘LOVE’ los Hmoob hais tias ‘NYIAM/ HLUB’ yog lo lus tias ‘EROS’, ‘PHILIA’, thiab ‘AGAPE’. Cov lus no yog lus Hes Las.
Peb yuav txhais lo lus ‘EROS’ tias ‘HLUB’ vim yog hais txog kev sib tshua sib ntshaw, xav pom xav ntsib, xav tau los ua yus tug, yog txoj kev hlub ntawm txiv neej thiab poj niam. Txoj kev hlub no muaj kev khib thiab qia dub los cuam tshuam nrog. Lo lus no siv nyob hauv Ntawv Ntshiab Cog Lus Qub 2 zaug xwb thiab tsis pom muaj siv nyob hauv Ntawv Ntshiab Cog Lus Tshiab.
‘PHILIA’ txhais tias kev sib raug zoo nrog cov neeg muaj kev xav, muaj lub siab, muaj tus yam ntxwv zoo xws tib yam, lawv ua kwv luag los phooj ywg. Peb txhais tias ‘NYIAM’. Lo lus no siv li 2-3 zaug nyob hauv Ntawv Cog Lus Tshiab xws li lo lus: Leej Txiv nyiam Leej Tub, nws muab ib puas tsav yam nws ua rau Leej Tub saib (Z 5: 20); yog muaj ib tug tsis nyiam Huab Tais, mas kom nws raug txoj hmoov phem (1KLN 16: 22); thiab thaum Huab Tais Yes Xus nug Pob Zeb tias Pob Zeb puas nyiam Yes Xus (Z 21: 15-23).
‘AGAPE’ txhais tias kev nyiam dawb paug rau lwm tus, yog txoj kev nyiam pub dawb txawm tias lwm tus tsis tsim nyog tau txais kev nyiam, yog kev nyiam tsis vam kom lwm tus pauj rov qab, yog kev nyiam lwm tus dua nws txoj sia. Ntawv Ntshiab siv lo lus Hmoob tias ‘NYIAM’.
Lo lus ‘KEV NYIAM’ thiab ‘NYIAM’ mas siv nyob hauv Ntawv Cog Lus Tshiab yog 120 thiab 130 zaus.
Lus Hes Las muaj ib lo lus yog hais tias ‘STORGE’, yog kev sib hlub raws roj ntsha, kev hlub hauv lub cuab thiab caj ces los yog kev hlub li niam txiv pub rau tej me nyuam, me nyuam txoj kev hlub niam txiv.
Huab Tais Yes Xus xav kom nws cov thwj tim muaj txoj kev nyiam pub dawb rau lwm tus, tsis yog txoj kev hlub li nkauj nruag, txoj kev hlub hauv lub cuab, los txoj kev nyiam li phooj ywg. Peb pom tau thaum Huab Tais Yes Xus nug Pob Zeb tias Pob Zeb puas nyiam (AGAPE) Yes Xus dua nws txoj sia. Pob Zeb teb tias nws nyiam (PHILIA) Huab Tais Yes Xus li ib tug phooj ywg xwb. Ces zaug kawg Huab Tais Yes Xus thiaj nug tias yog li koj nyiam kuv xws li ib tug phooj ywg xwb lod? Thaum Pob Zeb hnov li ntawd, nws tu siab. (Z 21: 15-17)
Nyob hauv txoj kev ntseeg Ntuj mas txoj kev NYIAM li ‘AGAPE’ los yog nyiam lwm tus dua yus txoj sia, nyiam pub dawb yog qhov loj tshaj raws li Leej Ntshiab Paj Lug sau ntuas cov neeg ntseeg hauv Kos Lis Nthos tias “Nyem no, txoj kev ntseeg, txoj kev tso siab, thiab txoj kev nyiam AGAPE tseem muaj nyob ua peb txog kev. Tiam sis qhov loj tshaj mas yog txoj kev nyiam AGAPE.” (1KLN 13: 13)
Huab Tais Yes Xus txoj cai loj tshaj nws tau qhia rau peb cov ntseeg yog “Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog. Koj yuav nyiam tus nyob ze koj ib yam li koj nyiam koj” (MK 12: 30-31) txhais tias peb yuav tsum nyiam Tswv Ntuj tshaj tas ib puas tsav yam thiab saib kev nyiam lwm tus yog qhov tseem ceeb txawm tias tus neeg ntawd yog neeg phem, neeg tsis zoo, yog ib tus neeg txhaum los tsis tsim nyog rau peb nyiam vim tias peb nyiam peb li cas ces peb yuav nyiam lawv li ntawd thiab.
Tus Hauv Paus Xa Lus Zam zeem tseeb tias “Tus twg nyob hauv txoj kev nyiam li AGAPE, mas nws kuj nyob hauv Tswv Ntuj thiab Tswv Ntuj nyob hauv nws,” (1Z 4: 16) yog li ‘KEV NYIAM’ li ‘AGAPE’ thiaj yog cov neeg ntseeg Ntuj tus yam ntxwv vim tias Tswv Ntuj yog txoj kev nyiam, Tswv Ntuj tsim neeg los vim txoj kev nyiam, thiab Tswv Ntuj tuaj cawm neeg hauv qhov txhaum vim txoj kev nyiam raws li Leej Ntshiab Zam hais tias “Vim Tswv Ntuj nyiam lub qab ntuj neeg npaum no, nws thiaj muab nws Leej Tub twm zeej rau.” (Z 3: 16)
Thaum peb txais lub Cim Ntxuav, peb yog ib tug neeg ntseeg, yog Yes Xus thwj tim, peb muaj Leej Ntuj Plig lub txiaj ntsim los roos peb, ces peb yuav muaj lub siab nyiam li ‘AGAPE’; yog nyiam peb tus txij nkawm dua peb txoj sia, peb nyiam peb cov me nyuam dua peb txoj sia, peb nyiam peb niam peb txiv dua peb txoj sia, peb nyiam peb cov kwv tij dua peb txoj sia, peb nyiam peb cov phooj ywg dua peb txoj sia, peb nyiam cov nyob ib puag ncig dua peb txoj sia, peb nyiam peb tus yeeb ncuab dua peb txoj sia, peb nyiam Tswv Ntuj dua peb txoj sia, xws li Huab Tais Yes Xus tau ua piv txwv rau peb pom nyob saum tus Ntoo Cuam.
Hais tau tias txoj kev nyiam li ‘AGAPE’ tsis zoo li neeg txoj kev nyiam kev hlub, txoj kev nyiam no yog txoj kev nyiam tuaj ntawm Tswv Ntuj tuaj, yog li cov neeg ntseeg thiaj yuav thov Huab Tais Yes Xus tuaj nrog nraim lawv, thov Tswv Ntuj lub zog los ua lub tsho rau lawv hnav, lawv yuav ua neej raws li Leej Ntuj Plig tshoj lawv lub tswv yim, mas lawv thiaj yuav muaj txoj kev nyiam ‘AGAPE’ no.
Thaum tus neeg twg muaj txoj kev nyiam li hais, mas nws muaj kev zoo siab, nws nyob kaj lug, nws ua siab ntev, nws xyiv fab pab luag tej, nws ua siab zoo, nws tso siab rau lwm tus, (KLN 5: 22) tus neeg muaj siab nyiam, nws yuav txawj ua siab ntev, ua siab sib, tsis txawj khib, tsis khav theeb, tsis muab hlob, tsis ua tub qaug luag, tsis nrhiav qhov zoo rau yus, tsis npau taws, tsis cib nyeej, tsis zoo siab pom luag ua qhov tsis ncaj, txawj zam, txawj ris tas puas tsav yam nyuaj. (1KLN 13: 14-7)
