Zes Laus yug xyoo 347 hauv Das Mes Tshias (Dalmatia), zim txwv no yog Nkos Es Tshias teb (Croatia). Zes Laus txiv yog ib tus neeg ntseeg ces thiaj xa nws mus kawm txuj rau tuam ceeb Los Mas. Nyob Los Mas, Zes Laus poob rau txoj kev ua si lom zem, nws ntsib kev ntxias kev sim siab ntau yam. Muaj ib hnub thaum Zes Laus tab tom mus saib cov toj ntxas, mas nws xav tsis thoob txog nws lub neej, ces Zes Laus xav yuam nws lub cev kom tau ua ib tug neeg siab dawb siab huv.
Xyoo 360 Zes Laus muaj 25 xyoos, nws txais Cim Ntxuav ntawm Tswv Qhia Lis Npes Lis Us (Liberius). Zes Laus tawm ntawm Los Mas mus rau Xis Lias teb, nws hla teb chaws suab puam, nws sau tias ‘Hav suab puam nthuav dav tsuas muaj cov av xuab zeb xws li yog dab teb, kuv tsum tawm tsam kom dhau mus, kuv xav ua Txiv Twj Cuab nyob ntawm no nrog tej me tsiaj’, ces Zes Laus coj lub neej ua Txiv Twj Cuab nyob hauv teb chaws suab puam Xis Lias.
Thaum Zes Laus ua Txiv Twj Cuab, nws kawm lus Hes Las, lus Hes Nplaws, thiab lus As Las Mais. Thaum Zes Laus muaj 38 xyoo, nws thiaj txais Cim Tiag Tes ua Leej Choj. Zes Laus rov los nyob Los Mas. Tus Tswv Qhia nyob Los Mas hu ua Das Mas Xus (Damasus I) txib Zes Laus kom muab Ntawv Ntshiab ntxeev ua lus Las Tis Nas.
Zes Laus yog neeg siab ceev tiam sis nws khuv leej lwm tus, nws siab me tab sis nws mob siab rau lwm tus, nws coj nruj tab sis nws lub siab kub lug cuag hluav taws, nws tawv ncauj tab sis nws coj ncaj. Zes Laus tus cwj pwm no ua rau nws tsis haum nrog cov Leej Choj nyob Los Mas, ces Zes Laus thiaj tuaj nyob lub zos Npes Les Hes, ze lub qhov tsua Yes Xus yug. Zes Laus tsim ib pab Txiv Twj Cuab nyob ntawd. Zes Laus yuav ua nws txoj hauj lwm tas 35 xyoos nyob ntawm no. Zes Laus kawm cov Ntawv Cog Lus Qub thiab cov Ntawv Cog Lus Tshiab tas niaj tas xyoo, nws muab ntxeev ua lus Las Tis Nas. Phau Ntawv Ntshiab Zes Laus ua tiav yog phau ntawv hu ua ‘Vus Nkas Tas’ (Vulgate).
Zes Laus hais tias “Kuv tsis txhais Ntawv Ntshiab raws kuv xav, tab sis kuv txhais raws li Leej Pleev hais. Leej Ntshiab Paj Lug hais tias Leej Pleev yog lub zog thiab yog lub tswv yim, leej twg tsis paub Ntawv Ntshiab mas nws yuav tsis paub Tswv Ntuj lub zog thiab tswv yim. Li ntawd, tus neeg twg tsis paub Ntawv Ntshiab ces nws yuav tsis paub peb tus Huab Tais Yes Xus Pleev.”
Xyoo 420 Zes Laus muaj 80 xyoo, nws mam tuag.
