Tus sau: TP. Txhiaj Foom

Peb zoo siab ntseeg txog Tswv Ntuj, thiab peb mloog Tswv Ntuj, vim peb tso siab tias lwm hnub Huab Tais Leej Txiv, Huab Tais Leej Tub thiab Huab Tais Leej Ntuj Plig Ntshiab yuav txais peb mus nrog Tswv Ntuj nyob pem Tswv Ntuj lub Ceeb Tsheej, ces peb yauv tau nyob kaj siab lug mus li.

Cov lus nyob hauv Mas Tais Ntawv Moo Zoo hais li no: Muaj ib hnub Yes Xus nce mus saum lub roob, nws zaum. Nws tsa ncauj qhia tsoom sid, hais txog cov neeg muaj txoj hmoov zoo. Yes Xus hais tias “Cov muaj txoj hmoov zoo yog cov pluag hauv nruab siab, vim Ntuj lub Ceeb Tsheej yog lawv li. Cov muaj txoj hmoov zoo yog cov siab zoo, vim lawv yuav txais lub ntiaj teb ua lawv tug. Cov muaj txoj hmoov zoo yog cov quaj ntsuag, vim yuav muaj tus nplij lawv. Cov muaj txoj hmoov zoo yog cov nqhis thiab tshaib txog txoj kev ncaj, vim yuav muaj tus daws lawv qhov nqhis. Cov muaj txoj hmoov zoo yog cov hlub luag tej, vim yuav muaj tus hlub lawv. Cov muaj txoj hmoov zoo yog cov siab dawb siab huv, vim lawv yuav pom Tswv Ntuj. Cov muaj txoj hmoov zoo yog cov tsim kev thaj yeeb, vim luag yuav hu lawv ua Tswv Ntuj cov me nyuam. Cov muaj txoj hmoov zoo yog cov raug luag hiam vim qhov lawv nyiam txoj kev ncaj, vim Ntuj lub Ceeb Tsheej yuav yog lawv li” (MT 5: 1-8).

Tswv Ntuj yog tus Huab Tais siab ntshiab, li ntawd tsuas yog cov neeg siab ntshiab xwb thiaj tsim nyog yuav tau pom Tswv Ntuj. Tswv Ntuj kuj yog Leej Txiv siab zoo, nws khuv leej neeg, nws hlub neeg tas nrho. Peb tos txog hnub zoo tshaj uas peb yuav tau pom Tswv Ntuj tim ntsej tim muag, nyob pem Tswv Ntuj lub Ceeb Tsheej. Tus Hauv Paus Xa Lus Paj Lug hais tias “Lwm tiam, peb yuav pom Tswv Ntuj ntawm qhov muag” (1KLN 13: 12).

Tus Hauv Paus Xa Lus Zam sau ntawv hais tias “Peb twb yog Tswv Ntuj cov me nyuam. Qhov tias yav tom ntej peb yuav txia ua tus neeg zoo li cas, mas tseem tsis tau tawm tuaj rau qhov muag pom xyeem. Peb paub tias lwm hnub Huab Tais Yes Xus txoj kev nyiam yuav tawm tuaj rau qhov muag pom xyeem. Mas thaum ntawd, peb thiaj yuav tau nyob raws li Leej Txiv Tswv Ntuj tiag. Thaum ntawd, peb yuav tau pom nws puav tam li nws yeej ib txwm nyob” (1Z 3: 2).

Nyob pem Tswv Ntuj lub Ceeb Tsheej peb yauv tau txais kev nplua nuj, Tswv Ntuj uas nws yog Leej Txiv siab zoo, nws yuav pub nws txoj kev hlub rau peb, ces peb yuav tau nyob kaj siab lug mus li tsis muaj caij tag, tsis muaj caij kawg.

Tus Hauv Paus Xa Lus Paj Lug zoo siab coj lub neej npuab Tswv Ntuj mus li. Nws hais tias “Peb lub siab thiaj ruaj nreb. Peb paub tias, lub caij peb lub cev no nyob, yog ib lub caij peb khuam nyob deb ntawm Huab Tais. Peb mus taug kev ntseeg, peb mus taug kev pom kev tseeb. Peb lub siab thiaj ruaj nreb. Peb tso lub cev no pov tseg, mus nyob txawm ze ntawm Huab Tais” (2KLN 5: 6-8).

Nyob saum Tswv Ntuj lub Ceeb Tsheej, peb thiaj yuav tau txais kev zoo siab tiag. Li ntawd, thaum peb muaj ib lub neej laus nkoos, mas peb tso siab tias Tswv Ntuj yuav txais peb mus nrog nws nyob pem nws lub Ceeb Tsheej. Peb tso siab li no, ces lub caij peb yuav ncaim lub ntiaj teb no, mas peb hais rau Tswv Ntuj tias “Txiv, thov koj txais kuv mus nrog koj nyob pem koj lub Ceeb Tsheej mog.”

Tus Haus Paus Xa Lus Paj Lug tseem sau tej lo lus zoo li no tias “Nej yuav zoo siab ua nej Txiv tsaug, vim tias nej Txiv tau hu nej los nrog cov neeg siab ntshiab nyob. Nej yuav tau nrog lawv koom txais ib txog hmoov zoo, nyob hauv lub teb chaws pom kev. Huab Tais Leej Txiv twb thau peb ntawm qhov tsaus ntuj los. Nws tau coj peb los nyob hauv nws lub Ceeb Tsheej, ces nyob hauv Leej Tub, peb tau ib txog kev cawm, thiab daws peb tej txhaum” (KLX 1: 12-14).

Yog vim peb txais lub Cim Ntxuav, mas peb muaj Huab Tais Yes Xus nrog peb nyob, nws coj peb kev, ces peb thiaj tau kev mus pem Tswv Ntuj lub Ceeb Tsheej.

Phau ntawv Qhib Yav Tom Ntej hais tias “Yuav muaj lub ntuj tshiab thiab lub ntiaj teb tshiab. Tswv Ntuj yuav nrog sawv daws nyob txawm. Nws yuav so tas ib zeej tsoom cov kua muag. Txoj kev tuag, yuav tsis muaj ntxiv. Kev ntsaj, kev quaj, kev tu siab, yuav tsis muaj ntxiv lawm” (QYNT 21: 1-4).

Peb hnov cov lus no lawm mas peb tso siab rau Tswv Ntuj, peb ua siab loj siab tawv. Yav tom ntej, yeej muaj ib hnub uas Tswv Ntuj yuav pub peb chaws mus hauv nws lub Ceeb Tsheej.

Xyoo 107 Leej Ntshiab Is Nyas Xyus ua Txiv Tswv Qhia nyob hauv lub nroog As Nthias Kias, nyob tsis deb ntawm lub teb chaws His Xas Lais. Muaj ib hnub, ib pab tub rog tuaj ntes Is Nyas Xyus, lawv xav muab nws tua. Lawv coj nws mus tim lub nroog Los Mas, lawv xav tso cov tsiaj qus los muaj Is Nyas Xyus tom kom tuag rau lawv saib. Nyob ntawm txoj kev mus rau lub nroog Los Mas, Is Nyas Xyus hnov tias cov ntseeg nyob hauv lub nroog Los Mas tau taij tsoom nom tswv kom tso Is Nyas Xyus dim. Thaum Txiv Tswv Qhia Is Nyas Xyus hnov li ntawd, nws thiaj sau ntawv mus rau cov ntseeg nyob Los Mas tias “Tsoom me nyuam hauv Leej Pleev lub npe, kuv hnov tias nej nyiam kuv kawg nkaus. Nej cev lus thov cov nom tswv Los Mas kom lawv txuag kuv txoj sia, mas kuv zoo siab ua nej sawv daws tsaug ntau. Tab sis, thov kom nej ua lwm yam uas yuav zeem tseeb tias nej nyiam kuv tiag. Yam li, thov kom nej tsis txhob mus taij cov nom tswv Los Mas. Nej cia kuv tuag, vim txoj kev tuag yuav xa kuv mus txog Leej Txiv nyob saum ntuj sai.”

Is Nyas Xyus kuj sau tias “Ib tug neeg ua nom kav ib lub teb chaws dav nyob ntiaj teb no, mas nws kuj muaj hwj chim loj. Tab sis qhov uas muaj nqes tshaj ntawd, yog qhov tau nrog Haub Tais Yes Xus koom ua vaj muaj txoj sia nyob pem Tswv Ntuj lub ceeb Tsheej. Li ntawd, thov kom nej tsis txhob khuv xim kuv txoj sia. Tus uas kuv xav nrhiav kom tau yog Huab Tais Yes Xus. Tus yuav pub kev kaj siab lug rau kuv yog Huab Tais Yes Xus tib leeg xwb. Li ntawd, kuv hais tseeb rau nej tias hnub kuv yuav tso ntiaj teb no tseg thiaj yog zoo hnub tshaj plaws, vim tias hnub ntawd kuv yuav rov yug dua tshiab nyob ntawm peb Txiv nyob saum ntuj. Yog lub caij ntawd, mas kuv yuav ua tus tsheej neeg tiag.”

Leej Ntshiab Is Nyas Xyus cov lus no, pab kom peb tso siab tias dhau lub caij nyob ntiaj teb no lawm, mas peb yuav tau mus nrog Tswv Ntuj nyob pem Tswv Ntuj lub Ceeb Tsheej mus li.

Tseem muaj lwm tus Leej Ntshiab, yog Leej Ntshiab Aus Nkus Tis Nus, nws ua Txiv Tswv Qhia nyob As Fis Kas tuam teb. Nws hais tias “Peb cov neeg, tsuas muaj ib lub hom phiaj xwb, yam li peb yuav tau chaws mus pem Tswv Ntuj lub Ceeb Tsheej, thaum ntawd, peb thiaj yuav tau so. Peb yuav pom kev lug. Peb yuav taug kev nyiam kev hlub. Peb yuav teev hawm Tswv Ntuj. Peb nyob pem Tswv Ntuj lub Ceeb Tsheej tsis muaj hnub kawg.”

Leej Ntshiab As Nkus tseem hais zoo li no tias “Tswv Ntuj! Peb lub hom phiaj yog txoj kev hwm koj, yog txoj kev nyiam koj ntag. Nyob hauv koj tib leeg xwb, uas peb lub siab yuav tau chaw so kom pom khawv.”

Peb ua Leej Ntuj Plig Ntshiab tsaug, vim Leej Ntuj Plig tau tshoj cov Leej Ntshiab zoo li Leej Ntshiab Is Nyas Xyus, thiab Leej Ntshiab Aus Nkus Tis Nus no, mas peb thiaj paub tias yav tom ntej peb yuav tau txais Tswv Ntuj lub Ceeb Tsheej los ua peb tug.

Xyoo 1897 Leej Ntshiab Tes Les Xas Hwm Tus Me Nyuam Yes Xus, nws raug mob loj kawg nkaus. Nws mob ntsws, cov kws tshuaj kho tsis tau. Thaum ntawd Leej Phauj Tes Les Xas muaj hnub nyoog 24 xyoo ntau xwb, nws mob hnyav heev, nws pom cov phauj nrog nws nyob txhawj nws, ces nws thiaj hais rau lawv tias “Nej txhob txhawj kuv. Kuv yuav chaws mus hauv Tswv Ntuj lub Ceeb Tsheeb, thiaj yog lub caij kuv yuav thov Tswv Ntuj pab cov neeg txhaum, kom lawv tig los yuav lub siab tshiab. Kuv yuav ua li ntawd mus txog hnub ntiaj teb kawg.”

Leej Ntshiab Tes Les Xas tseem sau ib zaj lus zoo li no tias “Tej zaus, nej yuav xav tias kuv txoj sia tu nrho. Tab sis qhov tseeb lub caij kuv tso ntiaj teb no tseg, thiaj yog lub caij kuv yuav tau chaws mus hauv Tswv Ntuj lub Ceeb Tsheej.”

Lub Koom Txoos Kav Tos Liv saib 3 tug Leej Ntshiab no cov lus yog lus tseem ceeb kawg nkaus. Lawv cov lus ua kom peb tso siab tias, dhau lub caij nyob ntiaj teb no lawm, mas peb yuav tau chaws mus hauv Tswv Ntuj lub Ceeb Tsheej.